ଝାରସୁଗୁଡ଼ା ଅଫିସ,୨୩ା୧୦: ଝାରସୁଗୁଡ଼ା ସଦର ଥାନା ଅଧୀନ ଇବ୍ନଦୀ ନିକଟରୁ ପୋଲିସ ଗୁରୁବାର ଜଣେ ଯୁବକଙ୍କ ରକ୍ତ ଜୁଡୁବୁଡୁ ମୃତଦେହ ଜବତ କରିଥିଲା। ଏହା ବ୍ରଜରାଜନଗର ଓରିଏଣ୍ଟ ଥାନା କାଳୀନଗର ଅଞ୍ଚଳର ପଙ୍କଜ କୁମାର(୪୦)ଙ୍କର ବୋଲି ଜଣାପଡିଥିଲା । ପଙ୍କଜଙ୍କ ପ୍ରକୃତ ଘର ବିହାର ଜିଲା ଲଖୀସରାଇ ଇଣ୍ଡଟୋଲା ଗ୍ରାମରେ ହୋଇଥିବା ବେଳେ ସେ ବ୍ରଜରାଜନଗର କାଳୀନଗର ଅଞ୍ଚଳରେ ଏକାକି ରହୁଥିଲେ। କେହି ଦୁର୍ବୃତ୍ତ ତାଙ୍କୁ ଗୁଳିକରି ହତ୍ୟା କରିବା ପରେ ପ୍ରମାଣ ନଷ୍ଟପାଇଁ ଏଠାରେ ଫିଙ୍ଗିଦେଇଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଥିଲା। ଏ ନେଇ ଓରିଏଣ୍ଟ ପୋଲିସ ଏକ ହତ୍ୟା ମାମଲା (ନଂ.୧୮୪/୨୧) ରୁଜୁକରି ତଦନ୍ତ ଆରମ୍ଭ କରିଥିଲା। ଘଟଣାର ଗୋଟିଏ ଦିନପରେ ଶୁକ୍ରବାର ପୋଲିସ ଏହାର ପର୍ଦ୍ଦାଫାଶ କରିଛି। ହତ୍ୟାକାଣ୍ଡରେ ସମ୍ପୃକ୍ତ ୩ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ବରଗଡ଼ ଜିଲା ପଦ୍ମପୁର ଥାନା କେସିଙ୍ଗାର ମୀନକେତନ ବେହେରା(୪୮), ବାଦଲ ବେହେରା(୧୮) ଓ ଅନୁଗୋଳ ଜିଲା ଜରପଡାର ପୂର୍ଣ୍ଣଚନ୍ଦ୍ର ନାୟକ(୩୧)। ଅଭିଯୁକ୍ତମାନେ କାଳୀନଗର ଅଞ୍ଚଳରେ ରହୁଥିଲେ। ମୀନକେତନ ଓ ବାଦଲ ବାପପୁଅ ହୋଇଥିବା ବେଳେ ପୂର୍ଣ୍ଣଚନ୍ଦ୍ର ହେଉଛନ୍ତି ତାଙ୍କ ସହଯୋଗୀ। ପୋଲିସ ତାଙ୍କ ନିକଟରୁ ଏକ ଦେଶୀ ବନ୍ଧୁକ, ଗୁଳି ଓ ହତ୍ୟାକାଣ୍ଡରେ ବ୍ୟବହୃତ ଓଡି୨୩କେ-୫୦୮୫ନଂ ବାଇକ୍ ଜବତ କରିଛି ।
ଏସ୍ପି ବିକାଶ ଚନ୍ଦ୍ର ଦାସ ଏକ ଖବରଦାତା ସମ୍ମିଳନୀରେ କହିଛନ୍ତି, ମୃତ ପଙ୍କଜ ଓ ମୀନକେତନ କାଳୀନଗର ଅଞ୍ଚଳରେ ଚୋରା ମଦ ବ୍ୟବସାୟ କରୁଥିଲେ। ମଦ ବ୍ୟବସାୟକୁ ନେଇ ଉଭୟଙ୍କ ମଧ୍ୟରେ ପ୍ରତିଯୋଗିତା ଚାଲିଥିଲା। ଅନେକ ସମୟରେ ପଙ୍କଜ ମୀନକେତନଙ୍କ ଘରକୁ ଯାଇ ଟଙ୍କା ମାଗିବା ସହ ତାଙ୍କୁ ଧମକଚମକ ଦେଉଥିଲେ। ଏଥିରେ ଅତିଷ୍ଠ ହୋଇ ମୀନକେତନ ତାଙ୍କୁ ରାସ୍ତାରୁ ହଟାଇଦେଲେ ଆଉ କେହି ପ୍ରତିଯୋଗୀ ରହିବେ ନାହିଁ, ମଦ ବ୍ୟବସାୟ ଭଲ ଚାଲିବ ବୋଲି ପୁଅ ବାଦଲ ସହ ଯୋଜନା କରିଥିଲେ। ଏଥିରେ ପୂର୍ଣ୍ଣଚନ୍ଦ୍ର ସହଯୋଗ କରିଥିଲେ। ଏଭଳି ସ୍ଥିତିରେ ଗତ ବୁଧବାର ରାତି ୧୧ଟାରେ ସେମାନେ କାଳୀନଗର ଅଞ୍ଚଳରେ ପଙ୍କଜଙ୍କୁ ଗୁଳିକରି ହତ୍ୟା କରିଥିଲେ। ପରେ ପ୍ରମାଣ ନଷ୍ଟ ପାଇଁ ବାଇକ୍ରେ ମୃତଦେହକୁ ଆଣି ଇବ୍ନଦୀ ନିକଟରେ ଫଙ୍ଗିଦେଇ ଚାଲିଯାଇଥିଲେ । ବାଦଲ ବାଇକ୍ ଚଳାଇଥିବା ବେଳେ ମୃତଦେହକୁ ମଝିରେ ଧରି ପୂର୍ଣ୍ଣଚନ୍ଦ୍ର ପଛରେ ବସିଥିଲେ। ମୀନକେତନ କେବଳ ଚୋରା ମଦ ନୁହେଁ କୋରେକ୍ସ ନିଶା ବ୍ୟବସାୟ ମଧ୍ୟ କରନ୍ତି। ତାଙ୍କ ନାମରେ ପୂର୍ବରୁ ୧୧ଟି ମାମଲା ରହିଛି। ହତ୍ୟାକାଣ୍ଡରେ ବ୍ୟବହୃତ ଦେଶୀ ବନ୍ଧୁକ କେଉଁଠୁ ଆସିଲା ସେ ନେଇ ପୋଲିସ୍ ତଦନ୍ତ ଜାରି ରଖିଛି ବୋଲି ଏସ୍ପି ଦାସ କହିଛନ୍ତି।
