ମୁମ୍ବାଇ, ୧୨।୮: ମୁମ୍ବାଇ କ୍ଲବ କ୍ରିକେଟର୍ କରନ ତିଓ୍ବାରୀ ଆତ୍ମହତ୍ୟା କରିଛନ୍ତି। ୨୭ ବର୍ଷୀୟ ଏହି ଯୁବ ଦ୍ରୁତ ବୋଲର ମୁମ୍ବାଇ ରଣ୍ଜୀ ଟିମ୍ ପାଇଁ ନେଟ୍ରେ ଅଧିକାଂଶ ସମୟ ବୋଲିଂ କରିଥାନ୍ତି। ମୁମ୍ବାଇ କ୍ଲବ କ୍ରିକେଟ୍ରେ ସେ ‘ଜୁନିୟର ଷ୍ଟେଇନ୍’ ଭାବେ ବେଶ୍ ଜଣାଶୁଣା। ଦକ୍ଷିଣ ଆଫ୍ରିକା ଦ୍ରୁତ ବୋଲର ଡେଲ୍ ଷ୍ଟେଇନ୍ଙ୍କ ସହିତ ତାଙ୍କ ବୋଲିଂ ଶୈଳୀ ମିଶି ଯାଉଥିବାରୁ ତାଙ୍କୁ ସମସ୍ତେ ଜୁନିୟର ଷ୍ଟେନ ବୋଲି ସମ୍ବୋଧନ କରିଥାନ୍ତି। ମଙ୍ଗଳବାର ବିଳମ୍ବିତ ରାତିରେ ଝୁଲନ୍ତା ଅବସ୍ଥାରେ ଗୋକୁଳଧାମସ୍ଥିତ ବାସଭବନରୁ ତାଙ୍କ ମୃତଦେହ ଉଦ୍ଧାର କରାଯାଇଛି ବୋଲି ମୁମ୍ବାଇ କ୍ରିକେଟ୍ ଆସୋସିଏଶନ (ଏମ୍ସିଏ) ପକ୍ଷରୁ କୁହାଯାଇଛି। କରନ ତାଙ୍କ କ୍ୟାରିୟରକୁ ନେଇ ଚିନ୍ତିତ ଥିଲେ ବୋଲି କୁହାଯାଉଛି। ଏପରିକି ତାଙ୍କର କିଛି ସାଙ୍ଗ ମଧ୍ୟ କହିଛନ୍ତି ଯେ, ଆଇପିଏଲ୍ର ୮ଟି ଯାକ ଟିମ୍ରୁ ସେ କୌଣସି ଗୋଟିଏରେ ଖେଳିବାର ସୁଯୋଗ ପାଇ ନ ଥିଲେ। ଏହି କାରଣରୁ କ୍ୟାରିୟରକୁ ନେଇ ଚିନ୍ତିତ ଥିଲେ। ପୋଲିସ ପକ୍ଷରୁ ଏକ ମାମଲା ରୁଜୁ କରାଯାଇ ଘଟଣାର ତଦନ୍ତ କରାଯାଇଛି।
