ଜଣେ ମା’ ଆଗରେ ସବୁକିଛି ସମ୍ଭବ। ଏକଥା କାହାକୁ ବି ଅଛପା ନାହିଁ। ଗୋଟିଏ ପିଲା ପାଇଁ ମା’ ନିକଟରେ ଶତ ସିଂହର ବଳ ଆସେ। ସେମିତି ଏକ ଘଟଣା ଦେଖିବାକୁ ମିଳିଛି ଅଷ୍ଟ୍ରେଲିଆର ପର୍ଥରେ। ଏଠାରେ ରହୁଥିବା ଜଣେ ମହିଳା ୨୬ ବର୍ଷୀୟ ପୁଅକୁ ତାଙ୍କ ପିଠିରେ ବସାଇ ଚାରିଆଡ଼େ ବୁଲୁଛନ୍ତି। କାରଣ ପିଲାଟି ଦିନରୁ ପୁଅ ଜିମିର ଆଖିକୁ ଦିଶୁନାହିଁ। ତେଣୁ ମା’ ନିକି ତାଙ୍କୁ ପିଠିରେ ବସାଇ ସାରା ବିଶ୍ୱ ବୁଲୁଛନ୍ତି।
୧୭ ବର୍ଷ ବସୟରେ ମା’ ହୋଇଥିବା ନିକିଙ୍କୁ ଯେତେବେଳେ ଜଣାପଡ଼ିଲା କି ତାଙ୍କ ପୁଅକୁ ଦେଖାଯାଉନାହିଁ। ସେ ସେବେଠାରୁ ଭାବିଥିଲେ ନିଜ ଆଖିରେ ସେ ପୁଅକୁ ସାରା ବିଶ୍ୱ ଦେଖାଇବେ।
ଏବେ ନିକିଙ୍କୁ ୪୩ ବର୍ଷ। ତାଙ୍କ କହିବା କଥା ବୟସ ବଢ଼ିଚାଲିଛି। ଆଗକୁ ଆଉ ଉଠାଇ ପାରିବି କି ନାହିଁ। କିନ୍ତୁ ଯେତେଦିନ ପର୍ଯ୍ୟନ୍ତ ମୁଁ ପୁଅକୁ ଉଠାଇ ପାରୁଥିବି ସେତେଦିନ ପର୍ଯ୍ୟନ୍ତ ପିଠିରେ ବସାଇ ସାରା ବିଶ୍ୱ ଦେଖାଉଥିବି। ଅଷ୍ଟ୍ରେଲିଆର ଅନେକ ସ୍ଥାନ ବୁଲାଇ ସାରିଲେଣି। ଏବେ କାନାଡା ଯିବା ପାଇଁ ଯୋଜନା ରଖିଛନ୍ତି। ନିକି କହିଛନ୍ତି, ଜିମି ଜନ୍ମରୁ ଅନ୍ଧ ସହିତ ତାଙ୍କ ଶରୀରରେ ବି ଅନେକ ଅସୁବିଧା ଅଛି। ଯେଉଁ କାରଣରୁ ତାଙ୍କୁ ୨୪ ଘଣ୍ଟା ପର୍ଯ୍ୟନ୍ତ ଦେଖାଶୁଣା କରିବାକୁ ପଡୁଛି।
ନିକି କୁହନ୍ତି, ଜିମି ମୋ ପ୍ରେରଣା, ମୁଁ ତାକୁ ଦେଖୁଛି। ସେ ସବୁବେଳେ କେମିତି ଖୁସିରେ ରହୁ। ସେ ମୋତେ ଭଲ ଭାବରେ ଦେଖିପାରୁନାହିଁ। ମାତ୍ର ମୁଁ ତାକୁ ଠିକ୍ ଭାବରେ ଦେଖିପାରୁଛି, ବୁଝିପାରୁଛି। ଯେତେବେଳେ ସେ ଅନ୍ଧ ବୋଲି ଜାଣିଥିଲି ମୋ ହୃଦୟ ଭାଙ୍ଗି ଯାଇଥିଲା। କିନ୍ତୁ ନିଜକୁ ସମ୍ଭାଳି ନେଇ ପୁଅକୁ ସବୁଦିନ ମୋ’ ଆଖିରେ ଦୁନିଆ ଦେଖାଇବି ବୋଲି ଶପଥ ନେଇଥିଲି। ଯାହା ଆଜି ପର୍ଯ୍ୟନ୍ତ କରିଆସୁଛି। ଶରୀରରେ ବଳ ଥିବା ଯାଏ କରୁଥିବି। ନିକିଙ୍କ କଥା ଶୁଣି ଲୋକେ ପ୍ରଶଂସା କରୁଛନ୍ତି। ଏମିତି ମା’ଙ୍କୁ ଶହେ ସଲାମ।
