ସୁନ୍ଦରଗଡ଼,୨୭।୯(ଡି.ଏନ୍.ଏ.): ସୁନ୍ଦରଗଡ଼ ସଦର ଥାନା ଅଧୀନ ବାଉରୀମୁଣ୍ଡା ଜୁନାଡିହି ଗ୍ରାମରେ ପ୍ରେମ ସମ୍ପର୍କକୁ କେନ୍ଦ୍ର କରି ରବିବାର ରାତିରେ ଏକ ହତ୍ୟାକାଣ୍ଡ ଘଟିଛି। ପୁଅର ଅନୈତିକ ପ୍ରେମ ସମ୍ପର୍କ ପାଇଁ ମା’ ଜୀବନ ଯାଇଥିବା ବେଳେ ବାପା ଗୁରୁତର ଆହତ ହୋଇଛନ୍ତି। ତାଙ୍କୁ ସୁନ୍ଦରଗଡ଼ ଜିଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି। ମୃତ ବୃଦ୍ଧା ହେଲେ ବଛା ଓରାମ।
ଖବର ପାଇ ସଦର ଥାନା ପୋଲିସ ସାଇଣ୍ଟିଫିକ ଟିମ୍ ସହ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଛେଦ ପାଇଁ ପଠାଇଛି। ପୋଲିସର ପ୍ରାଥମିକ ତଦନ୍ତ ଅନୁସାରେ ଜୁନାଡିହି ଗ୍ରାମର କାର୍ତ୍ତିକ ଟିଆଙ୍କ ସ୍ତ୍ରୀଙ୍କ ସହ ଗ୍ରାମର ବଳ ଓରାମଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା।
ଘଟଣା ଦିନ ସନ୍ଧ୍ୟାରେ ସ୍ତ୍ରୀଙ୍କୁ ପ୍ରେମିକଙ୍କ ସହ ଅସଞ୍ଜତ ଅବସ୍ଥାରେ ଦେଖିଥିଲେ ସ୍ବାମୀ କାର୍ତ୍ତିକ। ଏଥିରେ ଉତ୍କ୍ଷିପ୍ତ ହୋଇ କାର୍ତ୍ତିକ ଏକ ଟାଙ୍ଗିଆ ଧରି ପ୍ରେମିକ ବଳଙ୍କୁ ଗୋଡାଇ ଥିଲେ। ହେଲେ ସେ ଘଟଣାସ୍ଥଳରୁ ଚମ୍ପଟ ମାରିଥିଲେ। ପରେ କାର୍ତ୍ତିକ ବଳକୁ ନ ପାଇ ତାଙ୍କ ଘରେ ପହଞ୍ଚି ଥିଲେ। ସେଠାରେ ବଳଙ୍କୁ ନ ଦେଖି ତାଙ୍କ ମା’ ଓ ବାପାଙ୍କୁ ଟାଙ୍ଗିଆରେ ଆକ୍ରମଣ କରିଥିଲେ। ଫଳରେ ଘଟଣାସ୍ଥଳରେ ମା’ ବଛା ଓରାମଙ୍କ ମୃତ୍ୟୁ ଘଟିଥିଲା। ବାପା ମାଧ ଓରାମ ଗୁରୁତର ଅସ୍ଥାରେ ସୁନ୍ଦରଗଡ଼ ଜିଲା ମୁଖ୍ୟ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଅଭିଯୁକ୍ତ ଫେରାର୍ ଥିବା ପୋଲିସ କହିଛି।
