ମାଲକାନଗିରି,୫।୯(ଦୁର୍ଯ୍ୟୋଧନ ପାତ୍ର): ମାଲକାନଗିରି ଜିଲା କାଲିମେଳା ବ୍ଲକ ଅନ୍ତର୍ଗତ ମୋଟୁ ବନ ବିଭାଗ ଦ୍ୱାରା ବୁଧବାର ସକାଳେ ୫୦୦ରୁ ଊର୍ଦ୍ଧ୍ୱ ଜୀବନ୍ତ କଇଁଛ ଜବତ ହୋଇଛି। ଆନ୍ଧ୍ର- ଓଡ଼ିଶା ସୀମାନ୍ତ ମୋଟୁ ତନଖି ଫାଟକ ନିକଟରୁ ବନ ବିଭାଗ ୨ଟି ପିକ୍ଅପ୍ ଭ୍ୟାନ୍ରେ ଥିବା କଇଁଛ ଜବତ କରିବା ସହ ଚୋରାଚାଲାଣରେ ସମ୍ପୃକ୍ତ ୪ଜଣଙ୍କୁ ଗିରଫ କରିଛି।
ବିଶେଷ ସୂତ୍ରରୁ ଖବରପାଇ ମୋଟୁ ବନ ବିଭାଗ ତରଫରୁ ଆନ୍ଧ୍ର-ଓଡ଼ିଶା ସୀମାନ୍ତ ମୋଟୁ-ଚିନ୍ତୁର ରାସ୍ତା ନିକଟରେ ପଇଁତରା ମାରିଥିଲେ। ସେହି ସମୟରେ ୨ଟି ପିକ୍ଅପ୍ ଭ୍ୟାନ୍ ଦ୍ରୁତଗତିରେ ଆସୁଥିବା ବନ ବିଭାଗ କର୍ମଚାରୀମାନେ ଦେଖି ଉକ୍ତ ଗାଡ଼ିକୁ ଅଟକାଇ ଯାଞ୍ଚ କରିଥିଲେ। ଗାଡ଼ିରେ ଥିବା ବ୍ୟକ୍ତିଙ୍କୁ ପଚରାଉଚୁରା କରିବାରୁ ଗାଡିରେ ସାର (ଖତ) ଥିବା ସେମାନେ କହିଥିଲେ। ବନ ବିଭାଗ କର୍ମଚାରୀ ଗାଡ଼ିକୁ ଭଲଭାବେ ତଲାସି କରିବାରୁ ଗାଡ଼ି ଭିତରେ ଏକ କଣ୍ଟେନରରେ ଥିବା କଇଁଛ ଜବତ କରିବା ସହ ୨ଟି ଗାଡ଼ିରେ ଥିବା ୪ ଜଣଙ୍କୁ ଗିରଫ କରିଥିଲେ। ଏହି ଦୁଇଟି ଗାଡ଼ିରେ ୫୦୦ରୁ ଊର୍ଦ୍ଧ୍ୱ କଇଁଛ ଆନ୍ଧ୍ରପ୍ରଦେଶରୁ ଓଡ଼ିଶାକୁ ଚୋରାଚାଲାଣ ହେଉଥିଲା। ଜବତ କଇଁଛ ଓ ୨ଟି ପିକ୍ଅପ୍ ଭ୍ୟାନ୍କୁ ଏମ୍ଭି ୭୯ କାର୍ଯ୍ୟାଳୟରେ ରଖାଯାଇଛି। ଏ ନେଇ ତଦନ୍ତ ଜାରି ରହିଥିବା ବନାଞ୍ଚଳ ଅଧିକାରୀ ରଶ୍ମିରଞ୍ଜନ ସ୍ବାଇଁ ସୂଚନା ଦେଇଛନ୍ତି।
