ଭୁବନେଶ୍ବର,୧ା୮(ବ୍ୟୁରୋ): ରାଷ୍ଟ୍ରପତି ନିର୍ବାଚନର ଭୋଟିଂ ଲାଗି କୌଣସି ହ୍ବିପ୍ ଜାରି କରାଯାଇ ନ ଥିଲା। କଂଗ୍ରେସ ପ୍ରାର୍ଥୀଙ୍କୁ ଯେଉଁମାନେ ଭୋଟ୍ ନ ଦେଇଛନ୍ତି ସେମାନଙ୍କ ବିରୋଧରେ ଦଳର ସାମ୍ବିଧାନିକ ବ୍ୟବସ୍ଥା ଯାହା ରହିଛି ସେହି ଅନୁଯାୟୀ କାର୍ଯ୍ୟାନୁଷ୍ଠାନ ହେବ। ଦଳର ସାମ୍ବିଧାନିକ ନିୟମାନୁଯାୟୀ ହାଇକମାଣ୍ଡ ଯାହା ନିଷ୍ପତ୍ତି ନେବେ ତାକୁ ସମସ୍ତେ ମାନିବାକୁ ବାଧ୍ୟ। ତେଣୁ ହାଇକମାଣ୍ଡଙ୍କ ନିଷ୍ପତ୍ତି ଏବଂ ନିର୍ଦ୍ଦେଶ ଅନୁଯାୟୀ ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ଶରତ ପଟ୍ଟନାୟକ କାରଣ ଦର୍ଶାଅ ନୋଟିସ୍ କଟକ-ବାରବାଟୀ ବିଧାୟକ ମହମ୍ମଦ ମୋକିମଙ୍କୁ କରିଛନ୍ତି। କାର୍ଯ୍ୟାନୁଷ୍ଠାନ କ’ଣ ନିଆଯିବ ନ ଯିବ ସେନେଇ ପିସିସି ସଭାପତି କହିପାରିବେ। ମୁଁ ଦଳର ଜଣେ ସାଧାରଣ କର୍ମୀ ବୋଲି ବରିଷ୍ଠ ନେତା ତଥା ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି।
ନିକଟରେ ଶେଷ ହୋଇଥିବା ରାଷ୍ଟ୍ରପତି ନିର୍ବାଚନରେ ଭାଜପା ସମର୍ଥିତ ଏନ୍ଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁ ବିଜୟୀ ହେଲେ। ସେ ବର୍ତ୍ତମାନ ଦେଶର ୧୫ତମ ରାଷ୍ଟ୍ରପତି। କଂଗ୍ରେସ ସମେତ ସମସ୍ତ ବିରୋଧୀ ମିଳିତ ଭାବେ ଯଶଓ୍ବନ୍ତ ସିହ୍ନାଙ୍କୁ ମୁର୍ମୁଙ୍କ ବିରୋଧରେ ପ୍ରାର୍ଥୀ କଲେ। ଗୋଟିଏ ପଟେ ଖଣ୍ଡେ ଭୋଟ୍ ଯେପରି ନାକଚ ନ ହେବ ଏବଂ କ୍ରସ୍ ଭୋଟିଂ ରୋକିବା ଲାଗି ଭାଜପା ପକ୍ଷରୁ ଜୋର୍ଦାର କସରତ ହୋଇଥିଲା। ଅନ୍ୟପଟେ କିନ୍ତୁ ବିଭିନ୍ନ ରାଜ୍ୟର ବହୁ କଂଗ୍ରେସ ବିଧାୟକ ଏନ୍ଡିଏ ପ୍ରାର୍ଥୀଙ୍କୁ ଶେଷ ମୁହୂର୍ତ୍ତରେ ଭୋଟ୍ ଦେଇଥିଲେ। ଓଡ଼ିଶାରୁ ଯେପରି କଟକ-ବାରବାଟୀ ବିଧାୟକ ମହମ୍ମଦ ମୋକିମ୍ ଦଳ ବିରୋଧରେ ଯାଇ ଏନ୍ଡିଏ ପ୍ରାର୍ଥୀଙ୍କୁ ଭୋଟ୍ ଦେଇଛନ୍ତି। ଦଳର ନିଷ୍ପତ୍ତି ବିରୋଧରେ ଯାଇ ମୋକିମ୍ଙ୍କ ଏଭଳି ନିଷ୍ପତ୍ତି ସମସ୍ତଙ୍କୁ ଆଶ୍ଚର୍ଯ୍ୟ କରିଥିବା ବେଳେ ରାଷ୍ଟ୍ରପତି ଭୋଟ୍ ପରଦିନ ରାଜ୍ୟରେ ଏହା ଖବରର ଶିରୋନାମା ପାଲଟିଲା। ହେଲେ ଏ ପର୍ଯ୍ୟନ୍ତ କଂଗ୍ରେସ ମୋକିମ୍ଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନେଇପାରି ନାହିଁ। ଭୋଟିଂର କେତେଦିନ ପରେ ଯାଇ ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ଶରତ ପଟ୍ଟନାୟକ ଏନେଇ ମୋକିମ୍ଙ୍କୁ କାରଣ ଦର୍ଶାଅ ନୋଟିସ୍ ଜାରି କଲେ। କାରଣ ଦର୍ଶାଅ ନୋଟିସ୍ର ଉତ୍ତର ୨ ସପ୍ତାହ ମଧ୍ୟରେ ରଖିବାକୁ କୁହାଯାଇଥିଲା। ନୋଟିସ୍ ହେବାର ପ୍ରାୟ ୧୦ ଦିନ ହୋଇଗଲାଣି। ହେଲେ ଏ ଯାଏ ମୋକିମ୍ଙ୍କ କୌଣସି ଉତ୍ତର ରଖିଲେନି। ଏ ବାବଦରେ ମୋକିମ୍ଙ୍କୁ ଯୋଗାଯୋଗ କରିବାରୁ ସେ କହିଛନ୍ତି, ଆସନ୍ତା ୨ଦିନ ମଧ୍ୟରେ କାରଣ ଦର୍ଶାଅ ନୋଟିସ୍ର ଉତ୍ତର ରଖିବେ। ଏନେଇ ପିସିସି ସଭାପତିଙ୍କୁ ପଚାରିବାରୁ ସେ କହିଛନ୍ତି, ଦଳର ଆଭ୍ୟନ୍ତରୀଣ ବ୍ୟାପାର। ଦଳର ନିୟମାନୁଯାୟୀ ଯାହା ପଦକ୍ଷେପ ନିଆଯିବା କଥା ନିଆଯାଉଛି।
