କୋଲକାତା, ୧୪ା୭ (ପି.ଟି.)-ହକି ଷ୍ଟଲଓ୍ବାର୍ଟ ଅଶୋକ କୁମାରଙ୍କୁ ଲାଇଫ୍ ଟାଇମ୍ ଆଚିଭ୍ମେଣ୍ଟ ପୁରସ୍କାରରେ ସମ୍ମାନିତ କରିବ ସହରର ପ୍ରତିଷ୍ଠିତ କ୍ଲବ ମୋହନ ବାଗାନ। କ୍ଲବର ସାଧାରଣ ସମ୍ପାଦକ ଶ୍ରୀଞ୍ଜୟ ବୋଷ ସୋମବାର ସୂଚନା ଦେଇଛନ୍ତି। ମୋହନବାଗାନ ୧୯୧୧ରେ ଇଷ୍ଟ ୟର୍କଶାୟାର ରେଜିମେଣ୍ଟକୁ ୨-୧ ଗୋଲରେ ପରାସ୍ତ କରି ଆଇଏଫଏ ଶିଲ୍ଡ ହାସଲ କରିଥିଲା। ପ୍ରଥମ ଭାରତୀୟ ଦଳ ଭାବେ ଏକ ବ୍ରିଟିଶ ଫୁଟ୍ବଲ ଟିମ୍କୁ ହରାଇଥିବାରୁ ଏହି ସଫଳତାର ବିଜୟ ଉତ୍ସବ ପ୍ରତିବର୍ଷ ଜୁଲାଇ ୨୯ରେ କ୍ଲବ ପାଳି ଆସୁଛି। କୋଭିଡ୍-୧୯ ମହାମାରୀ ଯୋଗୁ କ୍ଲବ ଏଥର ମୋହନବାଗାନ ଦିବସ ପାଳନ ନ କରି ଏକ ଫିଜିକାଲ ପ୍ରୋଗ୍ରାମ୍ କରିବା ଲାଗି କ୍ଲବର କାର୍ଯ୍ୟନିର୍ବାହୀ କମିଟି ନିଷ୍ପତ୍ତି ନେଇଛି। କୋଲକାତାରେ ଯେଉଁମାନେ ଉପଲବ୍ଧ ହେବେ ସେମାନଙ୍କୁ ହିଁ ବ୍ୟକ୍ତିଗତ ଭାବେ ପୁରସ୍କାର ପ୍ରଦାନ କରାଯିବ। ଯେଉଁମାନେ ଉପଲବ୍ଧ ନ ହେବେ ପରେ ପରିସ୍ଥିତି ସ୍ବାଭାବିକ ହେଲେ ସେମାନଙ୍କୁ ପୁରସ୍କାର ଦିଆଯିବ। ସୂଚନାଯୋଗ୍ୟ, ହକି ଯାଦୁକର ଧ୍ୟାନଚାନ୍ଦଙ୍କ ପୁଅ ଅଶୋକ କୁମାର ୧୯୭୫ରେ କୁଆଲାଲମ୍ପୁରରେ ଭାରତ ଓ ପାକିସ୍ତାନ ମଧ୍ୟରେ ଅନୁଷ୍ଠିତ ହକି ବିଶ୍ୱକପ୍ ସ୍ବର୍ଣ୍ଣ ପଦକ ମ୍ୟାଚରେ ଭାରତ ପାଇଁ ଏକ ଗୁରୁତ୍ୱପୂର୍ଣ୍ଣ ଗୋଲ ସ୍କୋର କରିଥିଲେ। ୧୯୭୫ ସ୍ବର୍ଣ୍ଣ ବ୍ୟତୀତ ୭୦ ବର୍ଷୀୟ ଅଶୋକ କୁମାର ୧୯୭୧ ଓ ୧୯୭୩ ବିଶ୍ୱକପ୍ ଯଥାକ୍ରମେ ବ୍ରୋଞ୍ଜ ଓ ରୌପ୍ୟ ଜିତିଥିଲେ। ଏହାଛଡ଼ା ୧୯୭୨ ମ୍ୟୁନିକ୍ ଅଲିମ୍ପିକ୍ରେ ମଧ୍ୟ ଏକ ବ୍ରୋଞ୍ଜ ପଦକ ପାଇଥିଲେ। ଅଶୋକ କୁମାର ୧୯୬୦ ଦଶକ ଶେଷ ଭାଗରେ ମୋହନବାଗାନରେ ଯୋଗ ଦେଇଥିଲେ। ଭାରତୀୟ ହକି ଦଳ ପାଇଁ ମନୋନୀତ ହେବା ପୂର୍ବରୁ ସେ ବେଙ୍ଗଲ ତରଫରୁ ମଧ୍ୟ ପ୍ରତିନିଧିତ୍ୱ କରିଥିଲେ। କ୍ଲବର ଫୁଟ୍ବଲ ରାଇଟ୍ ନିକଟରେ ଆର୍.ପି. ସଞ୍ଜୀବ ଗୋଏଙ୍କା ହାସଲ କରିଛନ୍ତି। ୮୦ ପ୍ରତିଶତ ଅଂଶଧନ ଏହି ଗ୍ରୁପ୍ର ରହିଛି। କ୍ଲବ ଏଣିକି ଏଟିକେ ମୋହନ ବାଗାନ ଏଫ୍ସି ରୂପେ ପରିଚିତ ହେବ। କ୍ଲବର ବିତ୍ତ ସମ୍ପାଦକ ଦେବାଶିଷ ଦତ୍ତ କହିଛନ୍ତି, ଆମେ କେବଳ ମାତ୍ର ଫୁଟ୍ବଲ ରାଇଟ୍ ହରାଇଛୁ। କିନ୍ତୁ ଆମର ମୋହନ ବାଗାନ ଆଥଲେଟିକ୍ କ୍ଲବ ନାମ ବଜାୟ ରହିଛି। ତେଣୁ ଆମ ପୁରସ୍କାର ନାମରେ କୌଣସି ପରିବର୍ତ୍ତନ ହେବାର ପ୍ରଶ୍ନ ଉଠୁନାହିଁ। ଚଳିତ ବର୍ଷର ମୋହନ ବାଗାନ ରତ୍ନ ଗୁରୁବକ୍ସ ସିଂ ଏବଂ ପଲାଶ ନନ୍ଦୀଙ୍କୁ ପ୍ରଦାନ କରାଯିବ।
ପୁରସ୍କାର ବିଜେତାଙ୍କ ତାଲିକା- ମୋହନ ବାଗାନ ରତ୍ନ: ଗୁରୁବକ୍ସ ସିଂ (ହକି) ଓ ପଲାଶ ନନ୍ଦୀ (କ୍ରିକେଟ)। ଲାଇଫ୍ ଟାଇମ୍ ଆଚିଭମେଣ୍ଟ: ଅଶୋକ କୁମାର (ହକି), ପ୍ରଣବ ଗାଙ୍ଗୁଲି (ଫୁଟ୍ବଲ), ମନୋରଞ୍ଜନ ପୋରେଲ (ଆଥଲେଟିକ୍ସ)। ବେଷ୍ଟ ଫୁଟ୍ବଲର: ଜୋସେବା ବିଟିଆ (ସିନିୟର)। ବେଷ୍ଟ ୟୁଥ୍ ପ୍ଲେୟର: ସଜଲ ବାଗ୍ (୧୮ ବର୍ଷରୁ କମ୍ ଦଳ)।
