ନୂଆଦିଲ୍ଲୀ, ୧୧ା୩(ପି.ଟି.): ପ୍ରାକୃତିକ ବିପର୍ଯ୍ୟୟଜନିତ କ୍ଷୟକ୍ଷତି ହ୍ରାସ କରିବା ନିମନ୍ତେ ପ୍ରତିକ୍ରିୟା ପରିବର୍ତ୍ତେ ସକ୍ରିୟ ଦୃଷ୍ଟିଭଙ୍ଗୀ ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁତ୍ୱାରୋପ କରିଛନ୍ତି। ଏଥିସହିତ ବିପର୍ଯ୍ୟୟ ପରିଚାଳନାରେ ଭବିଷ୍ୟତ ପ୍ରଯୁକ୍ତିର ବ୍ୟବହାର ଉପରେ ସେ ଜୋର୍ ଦେଇଛନ୍ତି। ପ୍ରଧାନମନ୍ତ୍ରୀ ଶୁକ୍ରବାର ବିପର୍ଯ୍ୟୟ ବିପଦ ହ୍ରାସ ଜାତୀୟ ମଞ୍ଚ (ଏନ୍ପିଡିଆର୍ଆର୍)ର ତୃତୀୟ ଅଧିବେଶନକୁ ଉଦ୍ଘାଟନ କରିବା ଅବସରରେ କହିଥିଲେ, ଆମେ ପ୍ରାକୃତିକ ବିପର୍ଯ୍ୟୟକୁ ରୋକିପାରିବା ନାହିଁ, ତେବେ କ୍ଷୟକ୍ଷତି ହ୍ରାସ କରିବା ଲାଗି ବ୍ୟବସ୍ଥା ଆପଣାଇପାରିବା। ସ୍ବାଧୀନତାର ୫ ଦଶନ୍ଧି ପରେ ମଧ୍ୟ ଦେଶରେ ବିପର୍ଯ୍ୟୟ ପରିଚାଳନା ପାଇଁ କୌଣସି ଆଇନ ନ ଥିଲା। ୨୦୦୧ କଚ୍ଛ ଭୂକମ୍ପ ପରେ ପ୍ରଥମ ରାଜ୍ୟ ଭାବେ ଗୁଜରାଟ ବିପର୍ଯ୍ୟୟ ପରିଚାଳନା ଆଇନ ଆଣିଥିଲା। ଏହାକୁ ଆଧାର କରି କେନ୍ଦ୍ର ସରକାର ୨୦୦୫ରେ ଜାତୀୟ ବିପର୍ଯ୍ୟୟ ପରିଚାଳନା ଆଇନ କାର୍ଯ୍ୟକାରୀ କରିଥିଲେ। ପରେ ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ଗଠନ ହୋଇଥିଲା। ବିପର୍ଯ୍ୟୟ କ୍ଷତି ହ୍ରାସ ପାଇଁ ସ୍ଥାନୀୟ ପ୍ରଯୁକ୍ତି ଓ ସାମଗ୍ରୀର ଉନ୍ନତୀକରଣ ସହ ନୂଆ ପ୍ରଯୁକ୍ତିର ଉପଯୋଗ କରିବାକୁ ହେବ ବୋଲି ପ୍ରଧାନମନ୍ତ୍ରୀ କହିଥିଲେ।
