ନୂଆଦିଲ୍ଲୀ, ୮।୯: ଦେଶର ଅର୍ଥନୈତିକ ସ୍ଥିତିକୁ ନେଇ ବିରୋଧୀ ଦଳ ପକ୍ଷରୁ ଲଗାତାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କୁ ଘେରିବା ଉଦ୍ୟମ ଜାରି ରହିଛି। ଏନେଇ କଂଗ୍ରେସ ପକ୍ଷରୁ ରାହୁଲ ଗାନ୍ଧୀ ମୋଦିଙ୍କୁ ଟାର୍ଗେଟ୍ କରି ନୂଆ ଟୁଇଟ୍ କରିଛନ୍ତି। ସେ କହିଛନ୍ତି ଯେ, ମୋଦି ସରକାରୀ କମ୍ପାନୀକୁ ବିକିବା ଯୋଜନା କରୁଛନ୍ତି। ଧୀରେଧୀରେ ସରକାରୀ କମ୍ପାନୀରୁ ପୁଞ୍ଜିପ୍ରତ୍ୟାହାର କରି ଶେଷରେ ଏହାର ଘରୋଇକରଣ କରାଯିବା ଲାଗି ଷଡ଼ଯନ୍ତ୍ର ହେଉଛି। ଏଲ୍ଆଇସିକୁ ବିକିବା ପାଇଁ ମଧ୍ୟ ମୋଦି ସରକାର ପ୍ରୟାସ କରୁଛନ୍ତି। ଦେଶର ଜନସାଧାରଣ ନିଜ ଭବିଷ୍ୟତକୁ ଦୃଷ୍ଟିରେ ରଖି ଏଲ୍ଆଇସିରେ ସଞ୍ଚୟ କରିଥାନ୍ତି। ଏପରିସ୍ଥଳେ ଲୋକଙ୍କ ପ୍ରତି ବିଶ୍ୱାସଘାତ କରିବା ଅତ୍ୟନ୍ତ ଲଜ୍ଜା ଜନକ ଘଟଣା। ଏପରି କରି ମୋଦି ସରକାର ନିଜର ପାଣ୍ଠି ବଢ଼ାଉଥିବା ରାହୁଲ ଅଭିଯୋଗ କରିଛନ୍ତି। ମୋଦି ସରକାର ଦେଶର ଅର୍ଥବ୍ୟବସ୍ଥାକୁ ନଷ୍ଟ କରିବା କାର୍ଯ୍ୟ ବିମୁଦ୍ରୀକରଣଠାରୁ ଆରମ୍ଭ କରିଥିଲେ। ଏବେ ଏହାଯୋଗୁ ଦେଶର ଜିଡ଼ିପିରେ ସଙ୍କଟ ଦେଖାଦେଇଛି। ୨୦୧୬ ନଭେମ୍ବର ୮ରେ ବିମୁଦ୍ରୀକରଣ ହୋଇଥିଲା। ଇତିମଧ୍ୟରେ ୩ ବର୍ଷ ୧୦ ମାସ ବିତିଛି। ଏହାର ପ୍ରଭାବ ଏବେ ପଡ଼ିବା ଆରମ୍ଭ କରିଛି। ଦେଶର ଗରିବଙ୍କ ପେଟରେ ମୋଦି ସରକାର ଲାତ ମାରିଛନ୍ତି। ଦିନ ମଜୁରିଆ ଖଟିଖିଆଙ୍କ ଅବସ୍ଥା ଦିନକୁ ଦିନ ଖରାପ ହେଉଥିବାବେଳେ ଏଥିପ୍ରତି ମୋଦି ସରକାରଙ୍କ ତିଳେ ହେଲେ ଚିନ୍ତା ନ ଥିବା ରାହୁଲ କହିଛନ୍ତି।
