ଅତାବିରା/ଗୋଡଭଗା,୩୧।୧୦(ଯୁଧିଷ୍ଠିର ମହାପାତ୍ର/ସୁରେଶ ଦାଶ): ବରଗଡ଼ ଜିଲା ଅତାବିରା ଥାନା ଗୋଡଭଗା ଫାଣ୍ଡି ଅନ୍ତର୍ଗତ କୁମେଲସିଂହା ପଞ୍ଚାୟତ ଅଧୀନ ବଗର୍ତ୍ତୀଟିକ୍ରା ଓ ଶବରପଡାରୁ ଥିବା ନିଖୋଜ ବିବାହିତା ମହିଳା, ପୁରୁଷଙ୍କ ମୃତଦେହକୁ ଶୁକ୍ରବାର ପୋଲିସ୍ ଝୁଲନ୍ତା ଅବସ୍ଥାରେ ଉଦ୍ଧାର କରିଛି। ମୃତକଦ୍ୱୟ ହେଲେ ବଗର୍ତ୍ତିଟିକ୍ରା ଗ୍ରାମର ପିଙ୍କି ବଗର୍ତ୍ତି (୩୪) ଏବଂ ଶବରପଡାର ହିମାଂଶୁ ଭୁଏ(୪୦)। ପୋଲିସ୍ ଏ ନେଇ ୨ଟି ଅପମୃତ୍ୟୁ ମାମଲା (ନଂ.୨୧/୨୫, ନଂ.୨୨/୨୫) ରୁଜୁ କରି ମୃତଦେହ ବ୍ୟବଚ୍ଛେଦ କରାଇଛି। ତେବେ ପାରିପାଶର୍ବିକ ସ୍ଥିତି ଓ ପୋଲିସର ପ୍ରାଥମିକ ତଦନ୍ତରୁ ଏହା ଆତ୍ମହତ୍ୟା ଏବଂ ପରକୀୟା ପ୍ରୀତି ଯୋଗୁ ଏଭଳି ଘଟିଥାଇପାରେ ବୋଲି ଅନୁମାନ କରାଯାଉଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ଗୋଡଭଗା ଫାଣ୍ଡି ଅଧିକାରୀ ଗଣେଶ ବାରିକ କହିଛନ୍ତି।
ସୂଚନା ଅନୁଯାୟୀ, ପିଙ୍କି ଏବଂ ହିମାଂଶୁ ଗତ ୨୭ତାରିଖରୁ ନିଖୋଜ ଥିଲେ। ପରିବାର ଲୋକେ ଖୋଜାଖୋଜି କରିବା ସତ୍ତ୍ୱେ ସେମାନଙ୍କ ପତ୍ତା ମିଳି ନ ଥିଲା। ଶୁକ୍ରବାର ସକାଳେ ଶବରପଡାର ଏକ ପୋଟଳ କିଆରିରେ ଥିବା ଆମ୍ବଗଛରେ ଉଭୟଙ୍କ ମୃତଦେହ ଝୁଲୁଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚତ୍ ମୃତଦେହ ଜବତ କରିଥିଲା। ପୋଲିସ୍ ଏ ନେଇ ଅଧିକ ତଦନ୍ତ କରୁଛି। ପ୍ରକାଶ ଥାଉକି, ମୃତ ପିଙ୍କିଙ୍କ ୪ ଏବଂ ହିମାଂଶୁଙ୍କ ୨ ସନ୍ତାନ ଅଛନ୍ତି।
