ଖୋର୍ଦ୍ଧା ଅଫିସ,୨୫।୬: ଖୋର୍ଦ୍ଧା ଟାଉନ ଅନ୍ତର୍ଗତ ଜରିପୁଟ ସ୍କୁଲ କ୍ୟାମ୍ପସରେ ଥିବା କୂଅରୁ ପୋଲିସ ଗୁରୁବାର ଜଣେ ଯୁବତୀ ଙ୍କ ମୃତଦେହ ଉଦ୍ଧାର କରିଛି। ସେ ହେଲେ ସେହି ଗ୍ରାମର ନିତୁ ମହାପାତ୍ର(୧୯)। ସେ ଖୋର୍ଦ୍ଧା ମହିଳା ମହାବିଦ୍ୟାଳୟର ଯୁକ୍ତ ତିନି ଦ୍ବିତୀୟ ବର୍ଷ ଛାତ୍ରୀ ବୋଲି ଜଣାପଡିଛି। ପୋଲିସ ସାଇଣ୍ଟିଫିକ ଟିମ୍ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଏସ୍ପି ଅଜୟ ପ୍ରତାପ ସ୍ବାଇଁ, ଅତିରିକ୍ତ ଏସ୍ପି କେ.ପି. ଜେନା, ଏସ୍ଡିପିଓ ସୁଶିଲ ମିଶ୍ର, ଟାଉନ ଥାନା ଅଧିକାରୀ ଉମାଶଙ୍କର ସିଂ ପ୍ରମୁଖ ପରିସ୍ଥିତି ଅନୁଧ୍ୟାନ କରିଛନ୍ତି। ପୋଲିସ ମୃତଦେହକୁ ଜବତ କରି ବ୍ୟବେଚ୍ଛଦ ଲାଗି ଜିଲା ମୁଖ୍ୟ ଚିକିତ୍ସାଳୟକୁ ପଠାଇଛି।
ଅପରପକ୍ଷେ ମୃତା ଯୁବତୀଙ୍କ ପ୍ରେମିକ ଓ ମା’ଙ୍କ ବିରୋଧରେ ସମ୍ପର୍କିୟ ଦାଦା ବସନ୍ତ ରଣା ଗୁରୁବାର ଥାନାରେ ଅଭିଯୋଗ କରିଛନ୍ତି । ଏନେଇ ପୋଲିସ୨୧୩।୨୦ରେ ମାମଲା ରୁଜୁ କରି ପ୍ରେମିକଙ୍କୁ ଥାନାରେ ଅଟକ ରଖିଛି।
ଅଭିଯୋଗରେ ଦର୍ଶାଯାଇଛି, ପ୍ରେମିକଙ୍କ ମା ମଙ୍ଗଳବାର ଝିଅ ଘରକୁ ଆସି କଟୁ ଭାଷାରେ ଗାଳିଗୁଲଜ କରିଥିଲେ। ସେହିଦିନ ରାତିରେ ନିତୁ ଘର ଛାଡି କେଉଁ ଆଡେ ଚାଲି ଯାଇଥିଲେ। ପରିବାରଲୋକେ ତାଙ୍କୁ ନ ପାଇ ବୁଧବାର ଥାନାରେ ସେହି ଗ୍ରାମର ଯୁବକ(ପ୍ରେମିକ)ଙ୍କ ବିରୋଧରେ ଅପହରଣ ଅଭିଯୋଗ କରିଥିଲେ। ଗୁରୁବାର ତାଙ୍କ ମୃତଦେହ ଉଦ୍ଧାର କରାଯାଇଛି। ତେବେ ସେ ଆତ୍ମହତ୍ୟା କରିଛନ୍ତି ନା କେହି ତାଙ୍କୁ ହତ୍ୟା କରି କୂଅରେ ଫୋପାଡି ଦେଇଛନ୍ତି ତାହାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଯୋର ଧରିଛି ।
