ହାଟଡିହୀ,୧୨।୧(ଡି.ଏନ.ଏ.): ଜଣେ ମହିଳା କର୍ମଚାରୀଙ୍କୁ ଅସଦାଚରଣ ଅଭିଯୋଗରେ କେନ୍ଦୁଝର ଜିଲା ହାଟଡିହୀ ବ୍ଲକ ସୋସୋ ବଉଳା କଲେଜର ଭାରପ୍ରାପ୍ତ ଅଧ୍ୟକ୍ଷ ଶିବ ଚରଣ ଖମୁରାଇଙ୍କୁ ମଙ୍ଗଳବାର ପୋଲିସ ଗିରଫ କରିଛି।
ଅଭିଯୋଗ ଅନୁଯାୟୀ, ମହିଳା କର୍ମଚାରୀ ଜଣଙ୍କ ଅସୁସ୍ଥତା କାରଣରୁ ୨୦୨୧ ଅକ୍ଟୋବର ୨୭ରୁ ଏକ ମେଡିକାଲରେ ଚିକିତ୍ସିତ ହେଉଥିଲେ। ମେଡିକାଲରେ ଥିବା ବେଳେ ସେ ଅନ୍ଲାଇନରେ କଲେଜ କାର୍ଯ୍ୟ କରୁଥିଲେ। ଗତ ଡିସେମ୍ବର ୨୮ରେ କଲେଜରେ ଯୋଗ ଦେଇଥିଲେ। ତାଙ୍କର ବକେୟା ଥିବା ୫ ମାସର ଦରମା ପ୍ରଦାନ ପାଇଁ ସେ ଅଧ୍ୟକ୍ଷଙ୍କୁ ନିବେଦନ କରିଥିଲେ। ଗତ ଶନିବାର ସେ ଅଫିସ ରେ କାମ କରୁଥିବା ବେଳେ ଅଧ୍ୟକ୍ଷ ଖମୁରାଇ ତାଙ୍କୁ ଅଶାଳୀନ ବ୍ୟବହାର କରିଥିଲେ। ଏହି ଘଟଣାରେ ଅଧ୍ୟକ୍ଷଙ୍କୁ ଗିରଫ ଦାବି କରି କେତେଜଣ ମହିଳା ସୋମବାର ଥାନା ଦ୍ୱାରସ୍ଥ ହେବାପରେ ପୋଲିସ ଏକ ମାମଲା ( ନଂ.୬/୨୦୨୨) ରୁଜୁ କରିଛି।
ଅନ୍ୟପକ୍ଷେ ଅଧ୍ୟକ୍ଷ ଖମୁରାଇ ମଧ୍ୟ ଥାନାରେ ପାଲଟା ଅଭିଯୋଗ କରିଛନ୍ତି ଯେ, ଉକ୍ତ ମହିଳା କର୍ମଚାରୀଙ୍କ ସ୍ବାମୀ ଓ ଭାଇ ତାଙ୍କ ଅଫିସରେ ପଶି ମାଡ଼ ମାରିବା ସହ ସିସିକ୍ୟାମେରା ଭାଙ୍ଗି ରେକର୍ଡ ପତ୍ର ଚିରି ଦେଇଥିଲେ। ମହିଳା କର୍ମଚାରୀ ଜଣକ ତାଙ୍କ ନାମରେ ମିଥ୍ୟା ଅଭିଯୋଗ କରିଛନ୍ତି। ତେବେ ମହିଳା କର୍ମଚାରୀଙ୍କ ଅଭିଯୋଗ ଅନୁସାରେ ଅଧ୍ୟକ୍ଷଙ୍କୁ ଗିରଫ କରାଯାଇଥିବାବେଳେ ତଦନ୍ତ ଜାରି ରହିଛି ବୋଲି ସୋସୋ ଥାନା ଅଧିକାରୀ ଉପେନ୍ଦ୍ର ନାଥ କହିଛନ୍ତି।
