ନୀଳଗିରି,୨୮।୮(ପ୍ରଶାନ୍ତ ବିଶ୍ୱାଳ): ରାଜ୍ୟରେ କ୍ଷୁଦ୍ର ଓ ନାମମାତ୍ର ଚାଷୀଙ୍କ ଆର୍ଥତ୍କ ଅବସ୍ଥାରେ ଉନ୍ନତି ଆଣିବା ଓ ଲୋକଙ୍କ ପୁଷ୍ଟିସାଧନକୁ ଦୃଷ୍ଟିରେ ରଖି ସରକାର ମିଲେଟ ମିଶନ ଯୋଜନା ଆରମ୍ଭ କରିଛନ୍ତି। ମାତ୍ର ବାଲେଶ୍ୱର ଜିଲା ନୀଳଗିରି ଅଞ୍ଚଳରେ ଏହି ମିଶନ ଫେଲ୍ ମାରିିଛି। ମାଣ୍ଡିଆ, ଯଅ ଓ ବାଜରା ଚାଷ ଆଶାନୁରୂପ ହୋଇ ପାରିନି।
ସୂଚନା ଅନୁଯାୟୀ, ନୀଳଗିରି ବ୍ଲକରେ ମିଲେଟ ଚାଷ ପାଇଁ କୃଷି ବିଭାଗ ତରଫରୁ ବେସରକାରୀ ସଂସ୍ଥା ଏଫ୍ଏ (ଫେସିଲେଟିଙ୍ଗ ଏଜେନ୍ସି) ସମ୍ବନ୍ଧ ମାଧ୍ୟମରେ ଏହାର ସହକାରୀ ସଂସ୍ଥା ସୁବର୍ଣ୍ଣରେଖା (ସିବିଓ)କୁ ଦାୟିତ୍ୱ ଦିଆଯାଇଛି। ନୀଳଗିରି ବ୍ଲକରେ ଏହି ସଂସ୍ଥା ଗତ ୨ମାସ ତଳେ କାର୍ଯ୍ୟ ଆରମ୍ଭ କରିଥିବା ବେଳେ ନୀଳଗିରି କୃଷି ବିଭାଗ କାର୍ଯ୍ୟାଳୟରୁ ବିହନ ସଂଗ୍ରହ କରି ତରବରିଆ ଭାବରେ ହିତାଧିକାରୀ ଚୟନ କରି ବାଣ୍ଟିଥିଲେ। ନୀଳଗିରି ବ୍ଲକରେ ୨୦୦ ହେକ୍ଟର ଜମିରେ ସଘନ ପ୍ରଣାଳୀରେ ଚାଷ କରିବା ପାଇଁ ଆସିଥିଲା। ପ୍ରଥମେ ନୀଳଗିରି ବ୍ଲକର ୧୧ ପଞ୍ଚାୟତକୁ ଉକ୍ତ ସଂସ୍ଥା ଚୟନ କରିଥିଲା। କିନ୍ତୁ ପରିତାପର ବିଷୟ ମିଲେଟ ମିଶନ ଯୋଜନାରେ ଯେଉଁ ସବୁ ହିତାଧିକାରୀମାନଙ୍କୁ ଚୟନ କରାଯାଇ ସେମାନଙ୍କର ଜମିରେ ଏବେ ଚାଷ କରିବା ପାଇଁ ବିହନ ବଣ୍ଟନ କରାଯାଇଥିଲା ସେ ସବୁ ଜମିରେ ପ୍ରକୃତ ପକ୍ଷେ ଚାଷ କରା ନ ଯାଇ ଧାନ ଚାଷ କରାଯାଇଥିବା ବିଶେଷ ସୂତ୍ରରୁ ଖବର ମିଳିଛି। ୨୦୦ ହେକ୍ଟର ପାଇଁ ନାମ ପଞ୍ଜୀକରଣ କରାଯାଇଥିବା ବେଳେ ୧୧ ପଞ୍ଚାୟତର କିଛି କିଛି ପ୍ଲଟରେ ୧୫ଡିସିମିଲ, ୨୫ଡିସିମିଲି ହିସାବରେ ଚାଷ ହୋଇଥିବା ବେଳେ ଅନ୍ୟ ଚାଷ ଜମିରେ ବିହନ ପଚି ଯାଇଥିବା ସଂସ୍ଥା ସଫେଇ ଦେଇଛି।
ଏ ସମ୍ପର୍କରେ ନୀଳଗିରି ବ୍ଲକ କୃଷି ଅଧିକାରିଣୀ ମିତାଲି ନାୟକଙ୍କୁ ପଚାରିବାରୁ ୨୦୦ ହେକ୍ଟର ମାଣ୍ଡିଆ, ଯଅ, ବାଜରା ଚାଷ ପାଇଁ ବିହନ ଦିଆଯାଇଛିି। କିନ୍ତୁ ଏନ୍ଜିଓ ସଂସ୍ଥା ଠିକ୍ ତଥ୍ୟ ଦେଇ ନ ଥିବାରୁ ସେ ଅସନ୍ତୋଷ ପ୍ରକାଶ କରିଛନ୍ତି। ଯାହା ଫଳରେ କୃଷି ବିଭାଗ ପାଖରେ ଚାଷୀଙ୍କ ନାମ ନ ଥିବା ବେଳେ କେତେ ଜମିରେ ଚାଷ ହୋଇଛି ସଠିକ୍ ତଥ୍ୟ ନ ଥିବା ସୂଚନା ଦେଇଛନ୍ତି। ଏଭଳି ଏକ ଗୁରୁତ୍ୱପୂର୍ଣ୍ଣ ଯୋଜନାକୁ ଫେଲ୍ କରିବାରେ ଯେଉଁମାନଙ୍କର ହାତ ରହିଛି ସେମାନଙ୍କୁ ଲୋକଲୋଚନକୁ ଆଣିବା ପାଇଁ ଦାବି ହେଉଛି। ଉଲ୍ଲେଖଯୋଗ୍ୟ, ମିଲେଟ ଚାଷ ନିମନ୍ତେ ଆଗରୁ ଦିଆଯାଉଥିବା ପ୍ରୋତ୍ସାହନ ସମୟ ସୀମା ୩ବର୍ଷ ବଦଳରେ ୫ବର୍ଷକୁ ବୃଦ୍ଧି କରାଯାଇଛି। ଏହି ୫ ବର୍ଷିଆ ଯୋଜନାରେ ହେକ୍ଟର ପିଛା ୧୦ହଜାର ବଦଳରେ ୨୬ହଜାର ୫ଶହ ଟଙ୍କା ପ୍ରୋତ୍ସାହନ ରାଶି ପ୍ରଦାନ ପାଇଁ ନିଷ୍ପତ୍ତି ନିଆଯାଇଛି।
