ପଣଜୀ,୧୨।୧୦ : ଗୋଆରେ ଏକ ମିଗ -୨୯ କେ ଯୁଦ୍ଧ ବିମାନ ଦୁର୍ଘଟଣାଗ୍ରସ୍ତ ହୋଇଛି। ଗୋଆ ଉପକୂଳରେ ନିୟମିତ ବିମାନ ଉଡ଼ାଣ ସମୟରେ ଏହି ଦୁର୍ଘଟଣା ଘଟିଛି। କୁହାଯାଉଛି ଯେ ବିମାନଟି ଦୁର୍ଘଟଣାଗ୍ରସ୍ତ ହେବା ପରେ ପାଇଲଟ ବାହାରକୁ ଆସିବାରେ ସଫଳ ହୋଇଛନ୍ତି। ଫଳରେ ତାଙ୍କ ଜୀବନ ରକ୍ଷା ପାଇଛୀ। ଭାରତୀୟ ନୌସେନା ପକ୍ଷରୁ ଏହି ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଛି। ଯାନ୍ତ୍ରିକ ତ୍ରୁଟି ଜଣାପଡ଼ିବା ପରେ ବିମାନଟି ବେସକୁ ଫେରୁଥିବା ବେଳେ ଏହି ଦୁର୍ଘଟଣା ଘଟିଥିବା ଅଧିକାରୀ କହିଛନ୍ତି।
ରୁଷର ମିକୋୟାଙ୍ଗ କମ୍ପାନୀ ଦ୍ୱାରା ନିର୍ମିତ ମିଗ -୨୯ କେ ବିମାନ ଭାରତୀୟ ସେନାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ବାୟୁସେନାରେ ଏହାର ସଂଖ୍ୟା ୭୦ ପାଖାପାଖି ରହିଛି। ବାୟୁସେନା ସହିତ ଭାରତୀୟ ନୌସେନା ମଧ୍ୟ ଏହି ବିମାନ ବ୍ୟବହାର କରିଥାଏ।
ଏହାପୂର୍ବରୁ ରାଜସ୍ଥାନର ବାରମେରରେ ଚଳିତ ବର୍ଷ ଜୁଲାଇ ୨୯ ରେ ଟ୍ରେନିଂ ଉଡ଼ାଣ ସମୟରେ ଭାରତୀୟ ବାୟୁସେନାର ଏକ ମିଗ -୨୧ ଯୁଦ୍ଧ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣାରେ ବିମାନରେ ଥିବା ଉଭୟ ପାଇଲଟ ଶହୀଦ ହୋଇଥିଲେ।
