ନୂଆଦିଲ୍ଲୀ,୨୧।୭: କକ୍ରୋଚ ଜନତା ପାର୍ଟିର ଆହୱାନ କ୍ରମେ ସୋମବାର ବଡ଼ ସଂଖ୍ୟାରେ ପ୍ରଦର୍ଶନକାରୀମାନେ ପଦଯାତ୍ରା କରିଥିଲେ। ଏହି ସମୟରେ ବିଭିନ୍ନ ସ୍ଥାନରେ ସେମାନଙ୍କର ସୁରକ୍ଷାକର୍ମୀଙ୍କ ସହ ଧସ୍ତିଧାସ୍ତି ହୋଇଥିଲା। ପୋଲିସ ପ୍ରଦର୍ଶନକାରୀମାନଙ୍କୁ ଘଉଡ଼ାଇବା ପାଇଁ ଲାଠିଚାର୍ଜ କରିଥିଲା ଏବଂ ଗ୍ୟାସ ଗୋଳା ପ୍ରୟୋଗ କରିଥିଲା। ଏହି ଲାଠିଚାର୍ଜରେ ଅନେକ ପ୍ରଦର୍ଶନକାରୀ ଆହତ ହୋଇଛନ୍ତି। ଏଭଳି ପରିସ୍ଥିତିରେ ଅର୍ଦ୍ଧରାତ୍ରିରେ CJPର ଜାତୀୟ ମୁଖପାତ୍ର ଆଶୁତୋଷ ରାଙ୍କା ଆହତମାନଙ୍କୁ ସାହାଯ୍ୟ କରିବା ପାଇଁ ଲୋକମାନଙ୍କୁ ତୁରନ୍ତ ଜରୁରୀ ସାମଗ୍ରୀ ସାହାଯ୍ୟ କରିବାକୁ ଅନୁରୋଧ କରିଛନ୍ତି।
ରାଙ୍କା ସୋସିଆଲ ମିଡିଆ ପ୍ଲାଟଫର୍ମ‘ଏକ୍ସ’ରେ ପୋଷ୍ଟ କରି କହିଛନ୍ତି ଯେ ଜନ୍ତର-ମନ୍ତରରେ ତୁରନ୍ତ ପୋର୍ଟେବଲ ମାଇକ, ମେଡିକାଲ କିଟ, ଟର୍ଚ୍ଚ ଏବଂ ଝାଡ଼ୁର ଆବଶ୍ୟକତା ରହିଛି। ସେ କହିଛନ୍ତି ଯେ ପ୍ରଦର୍ଶନକାରୀଙ୍କ ପାଇଁ ୨-୩ଟି ପୋର୍ଟେବଲ ମାଇକ, ବହୁ ପରିମାଣରେ ବ୍ୟାଣ୍ଡେଜ (ପଟି), ଡେଟଲ, ପାରାସିଟାମୋଲ ଏବଂ ଯନ୍ତ୍ରଣା ନିବାରକ ଔଷଧର ଆବଶ୍ୟକତା ରହିଛି।
ସେ ଅଭିଯୋଗ କରିଛନ୍ତି ଯେ ପୋଲିସ କାର୍ଯ୍ୟାନୁଷ୍ଠାନରେ ଅନେକ ପ୍ରଦର୍ଶନକାରୀ ଗୁରୁତର ଭାବେ ଆହତ ହୋଇଛନ୍ତି, ଯେଉଁଥିପାଇଁ ମେଡିକାଲ ସାମଗ୍ରୀ ଅତ୍ୟନ୍ତ ଜରୁରୀ। ଏହାବ୍ୟତୀତ ସେ କହିଛନ୍ତି ଯେ ପ୍ରଦର୍ଶନ ସ୍ଥଳରେ ଆଲୋକର ବ୍ୟବସ୍ଥା ନାହିଁ, ସେଥିପାଇଁ ପୋର୍ଟେବଲ ଟର୍ଚ୍ଚର ମଧ୍ୟ ଆବଶ୍ୟକତା ରହିଛି।
