ନୂଆଦିଲ୍ଲୀ,୩।୩: ଦିଲ୍ଲୀ ନଗର ନିଗମ ଉପନିର୍ବାଚନ ଫଳାଫଳ ପ୍ରକାଶ ପାଇଛି। ମୋଟ ୫ଟି ଆସନ ମଧ୍ୟରୁ ଆମ୍ ଆଦ୍ମୀ ପାର୍ଟି ୪ରେ ବିଜୟୀ ହୋଇଥିବାବେଳେ କଂଗ୍ରେସକୁ ଗୋଟିଏ ଆସନ ମିଳିଛି। ଅପରପକ୍ଷରେ ଭାଜପା ଖାତା ଖୋଲିବାକୁ ସକ୍ଷମ ହୋଇ ପାରି ନାହିଁ। ତ୍ରିଲୋକପୁରୀ, କଲ୍ୟାଣପୁରୀ, ରୋହିଣୀ ଏବଂ ଶାଲିମାର୍ ବାଗ୍ରେ ଆମ୍ ଆଦ୍ମୀ ପାର୍ଟି ସଫଳ ହୋଇଛି। ଅପରପକ୍ଷରେ ଇଷ୍ଟ ଚୌହ୍ବାନ ବାଙ୍ଗରରେ କଂଗ୍ରେସ ବିଜୟୀ ହୋଇଛି। ଦିଲ୍ଲୀ ନଗର ନିଗମ ଭାଜପା କବ୍ଜାରେ ରହିଛି। ତେଣୁ ୨୦୨୨ ନଗର ନିଗମ ନିର୍ବାଚନ ପୂର୍ବରୁ ଉପନିର୍ବାଚନରେ ଆମ୍ ଆଦ୍ମୀ ପାର୍ଟିର ସଫଳତା ବେଶ୍ ଗୁରୁତ୍ୱ ବହନ କରୁଛି ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି। ଉପନିର୍ବାଚନ ଫଳାଫଳ ଯୋଗୁ ଭାଜପାକୁ ଝଟ୍କା ଲାଗିଛି। ଅପରପକ୍ଷରେ ଆମ୍ ଆଦ୍ମୀ ପାର୍ଟି କର୍ମକର୍ତ୍ତାଙ୍କ ଉତ୍ସାହ ବୃଦ୍ଧି ପାଇଛି।
