ବାର୍ସିଲୋନା,୧।୭: ଆର୍ଜେଣ୍ଟିନା ଫୁଟବଲ ସୁପରଷ୍ଟାର ଲିଓନେଲ ମେସି ନିଜ ଦେଶ ଓ କ୍ଲବ ପାଇଁ ୭୦୦ ଗୋଲ ସ୍କୋର କରିଛନ୍ତି। ମଙ୍ଗଳବାର ଅନୁଷ୍ଠିତ ଲା ଲିଗାର ଏକ ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ବାର୍ସିଲୋନା ଓ ଆଟ୍ଲେଟିକୋ ମାଡ୍ରିଡ୍ ପରସ୍ପରକୁ ଭେଟିଥିଲେ। ତେବେ ଏହି ମ୍ୟାଚ୍ ୨-୨ ଗୋଲରେ ଡ୍ର ରହିଥିଲା। ମେସି ୫୦ତମ ମିନିଟ୍ରେ ପେନାଲ୍ଟି ଜରିଆରେ ଗୋଲ ଦେଇ ଏହି ମାଇଲ୍ଖୁଣ୍ଟ ସ୍ଥାପନ କରିଛନ୍ତି। ତେବେ ବାର୍ସିଲୋନ ପାଇଁ ମେସି ୭୨୪ଟି ମ୍ୟାଚ୍ ଖେଳି ୬୩୦ତମ ଗୋଲ ସ୍କୋର କରିଛନ୍ତି। ସେହିପରି ସେ ଆର୍ଜେଣ୍ଟିନା ପାଇଁ ମେସି ୧୩୮ଟି ମ୍ୟାଚ୍ ଖେଳି ୭୦ ଅନ୍ତର୍ଜାତୀୟ ଗୋଲ ସ୍କୋର କରିଛନ୍ତି। ମେସିଙ୍କ ପୂର୍ବରୁ ତାଙ୍କ ପାରମ୍ଭରିକ ପ୍ରତିଦ୍ୱନ୍ଦ୍ୱୀ କ୍ରିଷ୍ଟିଆନୋ ରୋନାଲ୍ଡୋ ୨୦୧୯ ଅନ୍ତିମ ଭାଗରେ ୭୦୦ ଗୋଲ ସ୍କୋର କରି ରେକର୍ଡ କରିଥିଲେ। ରୋନାଲ୍ଡୋ ଏପର୍ଯ୍ୟନ୍ତ ୧,୦୦୫ ମ୍ୟାଚ୍ ଖେଳି ୭୨୮ ଗୋଲ ସ୍କୋର କରିଛନ୍ତି। ମେସି ୮୬୨ ମ୍ୟାଚ୍ ଖେଳି ୭୦୦ ଗୋଲ ସ୍କୋର କରିଛନ୍ତି।
ତେବେ ଏହି ଗୁରୁତ୍ୱପୂର୍ଣ୍ଣ ମ୍ୟାଚ୍ ଡ୍ର ରଖିଥିବାରୁ ବାର୍ସିଲୋନାର ଟାଇଟଲ ଆଶାକୁ ଜବରଦସ୍ତ ଧକ୍କା ଲାଗିଛି। ଗତ ୪ଟି ରାଉଣ୍ଡ ମ୍ୟାଚ୍ରେ ବାର୍ସିଲୋନାର ଏଡା ତୃତୀୟ ଡ୍ର। ଫଳରେ ବାର୍ସିଲୋନା ଗୋଟିଏ ପଏଣ୍ଟ କମ୍ ପାଇଁ ରିୟଲ ମାଡ୍ରିଡ୍ ପଛରେ ରହିଛି। ମାଡ୍ରିଡ୍ ୩୨ଟି ମ୍ୟାଚ୍ ଖେଳି ୨୧ ବିଜୟ, ୮ ଡ୍ର, ୩ ପରାଜୟ ସହ ୭୧ ପଏଣ୍ଟ ପାଇ ତାଲିକାରେ ଶୀର୍ଷରେ ରହିଛି। ଅନ୍ୟପଟେ ବାର୍ସିଲୋନ ୩୩ ମ୍ୟାଚ୍ ଖେଳି ୨୧ ବିଜୟ, ୭ ଡ୍ର ଓ ୫ ପରାଜୟ ସହ ୭୦ ପଏଣ୍ଟ ପାଇ ଦ୍ୱିତୀୟ ସ୍ଥାନରେ ରହିଛି।
