ସୋନପୁର,୧୯।୫(ମୃତ୍ୟୁଞ୍ଜୟ ଶତପଥୀ): ବିଭିନ୍ନ ଦାବି ନେଇ ଆସନ୍ତା ୨୦ ତାରିଖରେ ସମସ୍ତ ଔଷଧ ଦୋକାନ ବନ୍ଦ ରହିବ। ସର୍ବଭାରତୀୟ ଔଷଧ ଦୋକାନ ବନ୍ଦ ଆନ୍ଦୋଳନକୁ ସୁବର୍ଣ୍ଣପୁର ଜିଲା ଔଷଧ ବ୍ୟବସାୟୀ ସଂଘ ସମର୍ଥନ ଘୋଷଣା କରିଛି।
ସଂଘର ନ୍ୟାୟ ସଙ୍ଗତ ଦାବିକୁ ସମର୍ଥନ ଜଣାଇ ଜିଲାପାଳ ଡ. ନୃପରାଜ ସାହୁ, ଆରକ୍ଷୀ ଅଧୀକ୍ଷକ ନାରାୟଣ ନାୟକ, ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡା. ଉଷାରାଣୀ ଦାଶ ଓ ଜିଲା ଭେଷଜ ନିରୀକ୍ଷକ ଟିକେଶ୍ୱରୀ ମାଝୀଙ୍କୁ ସ୍ମାରକପତ୍ର ପ୍ରଦାନ କରାଯାଇଛି।
ସଂଘ ପକ୍ଷରୁ ଦର୍ଶାଯାଇଛି, ଦେଶବ୍ୟାପୀ ଇ-ଫାର୍ମାସୀ କାର୍ଯ୍ୟାଳୟ, କର୍ପୋରେଟ୍ ସଂସ୍ଥାମାନଙ୍କ ଅତ୍ୟଧିକ ରିହାତି, ନକଲି ଓ ଅନିୟନ୍ତ୍ରିତ ଔଷଧ ବିକ୍ରୟ ଭଳି ସମସ୍ୟା ଫଳରେ ସ୍ଥାନୀୟ କେମିଷ୍ଟ ଓ ସାଧାରଣ ଜନସ୍ବାସ୍ଥ୍ୟ ଗୁରୁତର ପ୍ରଭାବିତ ହେଉଛି।
ଏହାର ପ୍ରତିବାଦରେ ଅଲ ଇଣ୍ଡିଆ ଅର୍ଗାନାଇଶେନ ଅଫ୍ କେମିଷ୍ଟ ଆଣ୍ଡ ଡ୍ରଗିଷ୍ଟଙ୍କ ଆହ୍ବାନକ୍ରମେ ୨୦ ତାରିଖ ଦିନ ଔଷଧ ଦୋକାନ ବନ୍ଦ କରାଯିବ। ଜିଲା ସଂଘ ସଭାପତି ଉମେଶ ଚନ୍ଦ୍ର ସାହୁ, ସମ୍ପାଦକ ସତ୍ୟନାରାୟଣ ଦରଓ୍ବାନ, କୋଷାଧ୍ୟକ୍ଷ ପ୍ରଭାତ ଶତପଥୀଙ୍କ ସମେତ ସଂଘର ସଞ୍ଜୀବ ପାଣିଗ୍ରାହୀ, ଶାନ୍ତନୁ ମହାପାତ୍ର, ବିବେକାନନ୍ଦ ମହାଣା ଓ ସୁବାସ ଚନ୍ଦ୍ର ପଣ୍ଡା ପ୍ରମୁଖ ଏହି ସୂଚନା ଦେଇଛନ୍ତି।
