ଭୁବନେଶ୍ୱର, ୧୩।୨(ବ୍ୟୁରୋ): ରାଜ୍ୟରେ ଡାକ୍ତରୀ ପାଠ୍ୟକ୍ରମରେ ନାମଲେଖା ପାଇଁ ପ୍ରଥମ ପର୍ଯ୍ୟାୟ କାଉନ୍ସେଲିଂ ପ୍ରକ୍ରିୟା ଚାଲିଛି। ଗତ ୮ ତାରିଖରୁ ଆରମ୍ଭ ହୋଇଥିବା ଏହି ପର୍ଯ୍ୟାୟ ନାମଲେଖା ରବିବାର ଶେଷ ହେଉଛି। ତେବେ ପ୍ରଥମଥର ଲାଗି ପୁରୀସ୍ଥିତ ଶ୍ରୀଜଗନ୍ନାଥ ମେଡିକାଲ କଲେଜ (ଏସ୍ଜେଏମ୍ସି) ପାଇଁ ୧୦୦ ସିଟ୍ରେ ନାମଲେଖାକୁ ଅନୁମତି ମିଳିଥିବାବେଳେ ଓଜେଇଇ ୮୫ଟି ସିଟ୍ ପାଇଁ ଆଡ୍ମିଶନ କରିଛି। ବଳକା ୧୫ ସିଟ୍ରେ ଏନ୍ଇଇଟି ମାଧ୍ୟମରେ ଅଲ୍ ଇଣ୍ଡିଆ କୋଟାରେ ନାମାଲେଖା ହେବ। ଓଜେଇଇ ପକ୍ଷରୁ ରାଜ୍ୟର ୯ଟି ସରକାରୀ ଓ ୩ଟି ଘରୋଇ ମେଡିକାଲ କଲେଜର ମୋଟ ୧,୩୧୨ ଏମ୍ବିବିଏସ୍ ଓ ୧୫୪ ବିଡିଏସ୍ ସିଟ୍ ପାଇଁ ନାମଲେଖା ହେଉଛି। ଚଳିତବର୍ଷ ହାଇଟେକ୍ ମେଡିକାଲ କଲେଜରେ ୫୦ ନୂଆ ସିଟ୍ ପାଇଁ ଆଡ୍ମିଶନ କରାଯାଉଛି। ରବିବାର ଏଥିପାଇଁ ନାମଲେଖା ହେବ। ଏହାପରେ ୧୪ ତାରିଖରେ ବଳକା ସିଟ୍ ତାଲିକା ପ୍ରକାଶ ପାଇବ। ଦ୍ୱିତୀୟ ପର୍ଯ୍ୟାୟ ନାମଲେଖା ଲାଗି ଆସନ୍ତା ୧୫ ଓ ୧୬ ତାରିଖରେ ଛାତ୍ରୀଛାତ୍ର ଅନ୍ଲାଇନ୍ ରେଜିଷ୍ଟ୍ରେଶନ କରିବେ। ତେବେ ପ୍ରଥମ ପର୍ଯ୍ୟାୟ କାଉନସେଲିଂ ପ୍ରକ୍ରିୟାରେ ମାତ୍ର ୮୦୭ଜଣ ଛାତ୍ରୀଛାତ୍ର ନାମ ଲେଖାଇଛନ୍ତି।
