ନୂଆଦିଲ୍ଲୀ,୧୮ା୯: ତାମିଲନାଡୁରେ ଭାଜପା ସହ ମେଣ୍ଟ ନ ଥିବା ଏଆଇଏଡଇଏମ୍କେ ସୋମବାର ଘୋଷଣା କରିଛି। ମେଣ୍ଟ ସମ୍ପର୍କିତ କୌଣସି ନିଷ୍ପତ୍ତି ନିର୍ବାଚନ ବେଳେ ନିଆଯିବ ବୋଲି ଦଳ ପକ୍ଷରୁ ସ୍ପଷ୍ଟ କରାଯାଇଛି। ଏନେଇ ତାମିଲନାଡୁ ଭାଜପା ସଭାପତି ଆନ୍ନାମଲାଇଙ୍କୁ ଏଆଇଏଡିଏମ୍କେ ଦାୟୀ କରିଛି। ଭାଜପା କର୍ମୀମାନେ ମେଣ୍ଟ ସପକ୍ଷରେ ଥିବାବେଳେ ସଭାପତି ଆନ୍ନାମଲାଇ ଏହା ବିରୋଧରେ କାର୍ଯ୍ୟ କରୁଥିବା ଅଭିଯୋଗ ହୋଇଛି।
ଏଆଇଏଡିଏମ୍କେ ଦୀର୍ଘଦିନ ଧରି ଭାଜପା ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ (ଏନ୍ଡିଏ)ର ଅଂଶବିଶେଷ ରହିଥିଲା। ଗତ ଜୁଲାଇରେ ନୂଆଦିଲ୍ଲୀରେ ଅନୁଷ୍ଠିତ ଏନ୍ଡିଏ ବୈଠକରେ ଦଳ ଯୋଗ ଦେଇଥିଲା। ତେବେ ଆନ୍ନାମଲାଇ ମେଣ୍ଟ ଚାହୁଁ ନାହାନ୍ତି। ସେ ସବୁବେଳେ ଏଆଇଏଡଇଏମ୍କେ ନେତାମାନଙ୍କୁ ସମାଲୋଚନା କରୁଛନ୍ତି। ସେ ଭାଜପା ରାଜ୍ୟ ସଭାପତି ହେବାକୁ ଯୋଗ୍ୟ ନୁହନ୍ତି ବୋଲି ବରିଷ୍ଠ ଏଆଇଏଡିଏମ୍କେ ନେତା ଡି. ଜୟକୁମାର ପ୍ରକାଶ କରିଛନ୍ତି।
