ଥୁଆମୂଳ ରାମପୁର, ୬।୫ (ଦୁର୍ଗା କୀର୍ତ୍ତି): କୁଟ୍ରୁମାଳି ବକ୍ସାଇଟ୍ ଖଣି ପ୍ରକଳ୍ପକୁ ନେଇ କଳାହାଣ୍ଡି ଓ ରାୟଗଡ଼ା ଜିଲ୍ଲାର ଖଣି ପ୍ରଭାବିତ ଅଞ୍ଚଳରେ ତୀବ୍ର ଜନଅସନ୍ତୋଷ ଦେଖାଦେଇଛି। ଏହି ପ୍ରକଳ୍ପ ପାଇଁ ପ୍ରସ୍ତାବିତ ଜନଶୁଣାଣିକୁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ସାମୟିକ ଭାବେ ସ୍ଥଗିତ ରଖାଯାଇଥିଲେ ହେଁ, ସ୍ଥାନୀୟ ଲୋକଙ୍କ ଆନ୍ଦୋଳନ ପ୍ରଶମିତ ହେବାର ନାଁ ନେଉନାହିଁ। “ଜାନ ଯାଉ ପଛେ ଜୀବନ ଯାଉ, କୁଟ୍ରୁମାଳି ବଞ୍ଚିଥାଉ” ନାରାରେ ଏବେ ଗାଁକୁ ଗାଁ କମ୍ପୁଛି।
ଆଦାନୀ କମ୍ପାନୀକୁ ଆବଣ୍ଟିତ ଏହି ଖଣି ପ୍ରକଳ୍ପକୁ ବିରୋଧ କରି “ମା-ମାଟି-ମାଳି ସୁରକ୍ଷା ମଞ୍ଚ” ପକ୍ଷରୁ ଗତ ୩ ତାରିଖଠାରୁ ଏକ ବିଶାଳ ପଦଯାତ୍ରା ଓ ସଚେତନତା ଅଭିଯାନ ଜାରି ରହିଛି। ଥୁଆମୂଳ ରାମପୁର ଓ କାଶୀପୁର ବ୍ଲକର କୁଟ୍ରୁମାଳି, ଲେଲିଙ୍ଗପଦର, ରାଖିଗୁଡ଼ା ଓ ଭିକାପଙ୍ଗା ଭଳି ପ୍ରଭାବିତ ଗ୍ରାମଗୁଡ଼ିକରେ ଲୋକମାନେ ନିଜର ପ୍ରାକୃତିକ ସମ୍ପଦ ରକ୍ଷା ପାଇଁ ଏକଜୁଟ ହେଉଛନ୍ତି। ଆନ୍ଦୋଳନକାରୀଙ୍କ ମତରେ, ଖଣି ଖନନ ହେଲେ ଜଳସ୍ରୋତ ଶୁଖିଯିବ, ନିର୍ମଳ ବାୟୁ ଦୂଷିତ ହେବ ଏବଂ ଜୀବିକାର ଆଧାର ପାହାଡ଼ ନଷ୍ଟ ହୋଇଯିବ।
ଜନଶୁଣାଣି ପାଇଁ ସ୍ଥିର କରାଯାଇଥିବା ସ୍ଥାନକୁ ନେଇ ଗୁରୁତର ପ୍ରଶ୍ନ ଉଠିଛି। ପ୍ରଭାବିତ ଗ୍ରାମଗୁଡ଼ିକଠାରୁ ପ୍ରାୟ ୫୦ରୁ ୮୦ କିଲୋମିଟର ଦୂର ଥୁଆମୂଳ ରାମପୁର ବ୍ଲକ କାର୍ଯ୍ୟାଳୟଠାରେ ଆସନ୍ତା ମେ ୧୨ ଓ ୧୩ ତାରିଖରେ ଶୁଣାଣି କରିବାକୁ ପ୍ରଶାସନ ଯେଉଁ ଯୋଜନା କରିଥିଲା, ତାକୁ ଲୋକେ ତୀବ୍ର ବିରୋଧ କରିଛନ୍ତି। ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, କମ୍ପାନୀର ଭଡ଼ାଟିଆ ଲୋକଙ୍କୁ ନେଇ ପୋଲିସ ଘେରାଉ ମଧ୍ୟରେ ଏହି ପ୍ରକ୍ରିୟା ଶେଷ କରିବାକୁ ଚକ୍ରାନ୍ତ କରାଯାଇଛି, ଯାହା ଗଣତାନ୍ତ୍ରିକ ପ୍ରକ୍ରିୟାର ଉଲ୍ଲଂଘନ।
ନିକଟସ୍ଥ ସିଜିମାଳି ଅଞ୍ଚଳରେ ବେଦାନ୍ତ କମ୍ପାନୀ ସ୍ୱାର୍ଥରେ ପୋଲିସ ଦମନଲୀଳା ଜାରି ରହିଥିବା ଏବଂ ବହୁ ନିରୀହ ଲୋକ ମିଥ୍ୟା ମକଦ୍ଦମାରେ ଜେଲରେ ଥିବା ବେଳେ ଏହି ଶୁଣାଣି ଆୟୋଜନ କରିବା ସ୍ଥାନୀୟ ଲୋକଙ୍କ ପାଇଁ “କଟା ଘାରେ ଚୂନ” ଦେବା ସଦୃଶ ହୋଇଛି। ଏହାକୁ ବାତିଲ କରିବା ପାଇଁ ପ୍ରଦୂଷଣ ନିୟନ୍ତ୍ରଣ ବୋର୍ଡ ସଦସ୍ୟ ସଚିବଙ୍କ ନିକଟରେ ତିନୋଟି ପିଟିସନ୍ ଦାଖଲ କରାଯାଇଥିଲା।
ଜନଶୁଣାଣି ସ୍ଥଗିତ ହେବା ପରେ ମଞ୍ଚ ପକ୍ଷରୁ ସ୍ପଷ୍ଟ କରାଯାଇଛି ଯେ, ଏହା କେବଳ ସାମୟିକ ସ୍ଥଗିତ ଆଦେଶ, ବାତିଲ ନୁହେଁ। କମ୍ପାନୀକୁ ଦିଆଯାଇଥିବା ଖଣି ଲିଜ୍ ଏବେ ବି ବଳବତ୍ତର ରହିଛି। ତେଣୁ ଏହି ସାମୟିକ ସଫଳତାରେ ଅତ୍ୟଧିକ ଉତ୍ସାହିତ ନ ହୋଇ ବେଦାନ୍ତ ଓ ଆଦାନୀ କମ୍ପାନୀର ଲିଜ୍ ସମ୍ପୂର୍ଣ୍ଣ ବାତିଲ ଏବଂ ଜଳ-ଜମି-ଜଙ୍ଗଲର ସୁରକ୍ଷା ପାଇଁ ଜନ ଆନ୍ଦୋଳନକୁ ଆହୁରି ବ୍ୟାପକ ଓ ଜୋରଦାର କରିବାକୁ ସୁରକ୍ଷା ମଞ୍ଚ ଅଞ୍ଚଳବାସୀଙ୍କୁ ଆହ୍ୱାନ ଦେଇଛି।
