କଟକ,୨୨ା୭ (କାର୍ତ୍ତିକ ସାହୁ): କଟକ ଅପମିଶ୍ରିତ ସାମଗ୍ରୀର ପେଣ୍ଠସ୍ଥଳ ପାଲଟିଛି। କିଛି ମାସ ବ୍ୟବଧାନ ପରେ ମାଲଗୋଦାମ ଅଞ୍ଚଳର ଏକ ନିର୍ଦ୍ଦିଷ୍ଟ ସ୍ଥାନରେ ଶୁକ୍ରବାର କମିଶନରେଟ୍ ପୋଲିସ କଟକ ମହାନଗର ନିଗମ(ସିଏମ୍ସି)ର ସ୍ବାସ୍ଥ୍ୟ ବିଭାଗ ସହଯୋଗରେ ଚଢାଉ କରି ୨୪ ବସ୍ତାରୁ ଊର୍ଦ୍ଧ୍ୱ ବିଭିନ୍ନ ପ୍ରକାର ନକଲି ମସଲାଗୁଣ୍ଡ ଜବତ କରିଛି। ରୋଷେଇରେ ବ୍ୟବହାର ହେଉଥିବା ହଳଦୀ ଗୁଣ୍ଡ, ଲଙ୍କା ଗୁଣ୍ଡ, ଜିରା ଗୁଣ୍ଡ, ଧନିଆ ଗୁଣ୍ଡ, ବେସନ ଆଦି ଅପମିଶ୍ରଣ ହେଉଥିବା ପୋଲିସ ଚଢ଼ାଉବେଳେ ଜାଣିବାକୁ ପାଇଛି। ଏହି କାରବାରର ମୁଖ୍ୟ ଅଭିଯୁକ୍ତ ଅରୁଣ ଗନ୍ତାୟତଙ୍କୁ ମାଲଗୋଦାମ ପୋଲିସ ଗିରଫ କରିଛି। ଏ ନେଇ ଥାନାରେ ଏକ ମାମଲା ରୁଜୁ ହୋଇଛି।
ମାଲଗୋଦାମ ଅଞ୍ଚଳର ଉକ୍ତ ସ୍ଥାନରେ ମସଲା ଅପମିଶ୍ରଣ ୟୁନିଟ୍ ଚାଲିଥିବା ପୋଲିସ ସୂଚନା ପାଇଥିଲା। ତୁରନ୍ତ ମାଲଗୋଦାମ ଆଇଆଇସି ରଜନୀକାନ୍ତ ଦାସଙ୍କ ନେତୃତ୍ୱରେ ପୋଲିସ ଟିମ୍ ଓ ସିଏମ୍ସି ସ୍ବାସ୍ଥ୍ୟ ଅଧିକାରୀ ସତ୍ୟବ୍ରତ ମହାପାତ୍ରଙ୍କ ନେତୃତ୍ୱରେ ଗଠିତ ସ୍ବାସ୍ଥ୍ୟ ବିଭାଗ ଟିମ୍ ସେଠାରେ ଚଢ଼ାଉ କରିଥିଲା। ଚଢ଼ାଉରେ ସାମିଲ ଥିବା ଏସିପି ଅରୁଣ କୁମାର ସ୍ବାଇଁ କହିଛନ୍ତି, ଅଭିଯୁକ୍ତ ଜଣଙ୍କ ଏକ ବିଦ୍ୟୁତ୍ଚାଳିତ ମସଲା ପେଷା ମେଶିନ୍ ରଖିଛନ୍ତି। ଅପମିଶ୍ରଣ ପାଇଁ ବସ୍ତା ବସ୍ତା ରାସାୟନିକ ରଙ୍ଗ ସେଠାରେ ମହଜୁଦ୍ ରହିଛି। ସେହି ରଙ୍ଗଗୁଡ଼ିକୁ ମସଲାର ରଙ୍ଗ ଅନୁଯାୟୀ ମିଳାଇ ସେଥିରେ ମିଶ୍ରଣ କରାଯାଉଛି, ଯାହା ସ୍ବାସ୍ଥ୍ୟ ପାଇଁ ଅତ୍ୟନ୍ତ କ୍ଷତିକାରକ। ନକଲି ଲଙ୍କାଗୁଣ୍ଡ ପ୍ରସ୍ତୁତବେଳେ ଶୁଖିଲା ଲଙ୍କା ୩୦% ଓ ଚାଉଳ ଗୁଣ୍ଡ ୭୦% ସହିତ ରାସାୟନିକ ରଙ୍ଗ ମିଶ୍ରଣ କରି ପେଷାଯାଉଛି। ସେହିପରି ନକଲି ହଳଦୀ, ଧନିଆ, ଜିରା, ବେସନ ଆଦି ଖାଦ୍ୟ ସାମଗ୍ରୀ ପ୍ରସ୍ତୁତ କରାଯାଉଛି। ସେଗୁଡ଼ିକୁ ଓଜନ କରି ପ୍ୟାକିଂ କରାଯାଉଥିବା ଦେଖିବାକୁ ମିଳିଛି। ବିଶେଷକରି ରାସ୍ତାକଡ଼ରେ ଫାଷ୍ଟଫୁଡ୍ ବିକୁଥିବା ବ୍ୟବସାୟୀ ଏହି ସାମଗ୍ରୀଗୁଡ଼ିକୁ ଶସ୍ତାରେ କିଣିନେଉଛନ୍ତି। ସେହିପରି ବଜାର ଦରଠାରୁ କମ୍ ଦାମ୍ରେ ମିଳୁଥିବାରୁ ଲୋକମାନେ ମଧ୍ୟ ଆଗ୍ରହର ସହ ଏହାକୁ କିଣୁଛନ୍ତି। ଅପରପକ୍ଷରେ ସିଏମ୍ସି ସ୍ବାସ୍ଥ୍ୟ ଅଧିକାରୀ ମହାପାତ୍ର କହିଛନ୍ତି, ଜବତ ସାମଗ୍ରୀର ନମୁନା ପରୀକ୍ଷା ପାଇଁ ଲାବରେଟୋରିକୁ ପଠାଯିବ। ରିପୋର୍ଟ ଆସିଲେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସୂଚନାଯୋଗ୍ୟ, ପୂର୍ବରୁ କଟକ ସହରର ବିଭିନ୍ନ କାରଖାନା ଓ ଗୋଦାମରେ ଚଢ଼ାଉ କରାଯାଇ ନକଲି ମସଲା ଗୁଣ୍ଡ, ସିମେଣ୍ଟ, ଘିଅ, ଚା’ପତି ଜବତ କରାଯାଇଛି। ଏହି କାରବାରରେ ସମ୍ପୃକ୍ତ ଅସାଧୁ ବ୍ୟବସାୟୀଙ୍କୁ ଗିରଫ କରି ଜେଲ୍ ପଠାଯାଇଛି। କଟକ ବଣିକ ସଂଘ ମଧ୍ୟ ଅପମିଶ୍ରଣକାରୀଙ୍କ ବିରୋଧରେ କଡ଼ା ଆଭିମୁଖ୍ୟ ଗ୍ରହଣ କରିଛି। ଏପରି କି ଅପମିଶ୍ରଣ ଧରାପଡ଼ିଲେ ମାଲଗୋଦାମରେ ବ୍ୟବସାୟ କରିପାରିବେ ନାହିଁ ବୋଲି ଚେତାବନୀ ଦିଆଯାଇଛି। ଏସବୁ ସତ୍ତ୍ୱେ କଟକରେ ନକଲି ଓ ଅପମିଶ୍ରଣ ସାମଗ୍ରୀ ପ୍ରସ୍ତୁତ ଉପରେ ରୋକ୍ ଲଗାଯାଇପାରୁନାହିଁ। ଏହାକୁ ଖାଇବା ଦ୍ୱାରା ଲୋକମାନେ ରୋଗର ଶିକାର ହେଉଥିବାବେଳେ ବ୍ୟବସାୟୀ ମାଲାମାଲ୍ ହେଉଛନ୍ତି। ତେଣୁ ଆଗାମୀ ଦିନରେ ଏଭଳି କାରବାର ରୋକିବାକୁ ସିଏମ୍ସି ଓ ପୋଲିସ ପ୍ରଶାସନ କିଭଳି ପନ୍ଥା ଆପଣାଉଛନ୍ତି ତାହାକୁ ନେଇ ବୁଦ୍ଧିଜୀବୀମାନେ ପ୍ରଶ୍ନ ଉଠାଇଛନ୍ତି।
