ହରିଦ୍ୱାର, ୧୨।୧୦: ଫେସ୍ବୁକରେ ପ୍ରେମ ବଢ଼ିବାରେ ଲାଗିବା ପରେ ଜଣେ ମହିଳା ତାଙ୍କ ସ୍ବାମୀଙ୍କୁ ଛାଡ଼ି ପ୍ରେମିକ ସହ ଫେରାର୍ ହୋଇଯାଇଥିଲେ। ଶେଷରେ ସ୍ବାମୀ ନିଜ ସ୍ତ୍ରୀକୁ ଖୋଜିବା ଲାଗି ପୋଲିସର ସହାୟତା ନେଇଥିଲେ। ଦୀର୍ଘ ୩ ମାସ ପରେ ଶେଷରେ ପୋଲିସ ମହିଳାଙ୍କୁ ଉଦ୍ଧାର କରି ତାଙ୍କ ସମ୍ପର୍କୀୟଙ୍କୁ ହସ୍ତାନ୍ତର କରିଛି।
ଜଣାପଡ଼ିଛି ଯେ, ଲକ୍ସର ନିବାସୀ ଜଣେ ବ୍ୟକ୍ତିଙ୍କ ବିବାହ ରୁର୍କୀର ଜଣେ ମହିଳାଙ୍କ ସହ ହୋଇଥିଲା। ଜୁନ୍ ୩୦ରେ ମହିଳାଜଣଙ୍କ କିଛି କାମରେ ବାହାରକୁ ଯାଇ ଆଉ ଘରକୁ ଫେରି ନ ଥିଲେ। ଏହାପରେ ମହିଳାଙ୍କ ସ୍ବାମୀ ଥାନାରେ ତାଙ୍କ ସ୍ତ୍ରୀ ନିଖୋଜ ହୋଇଯାଇଥିବା ନେଇ ଅଭିଯୋଗ କରିଥିଲେ। ପୋଲିସ ପ୍ରାଥମିକ ଅନୁସନ୍ଧାନରୁ ଏହା ପ୍ରେମଜନିତ ବ୍ୟାପାର ବୋଲି ଜାଣିବାକୁ ପାଇଥିଲା। ଏହାପରେ ପୋଲିସ ମହିଳାଙ୍କ ଫୋନ୍ ରେକର୍ଡ ଯାଞ୍ଚ କରିବାରୁ ଅମରୋହାର ଜଣେ ଯୁବକଙ୍କ ସହ ସେ କଥାବାର୍ତ୍ତା ହେଉଥିବା ଜଣାପଡ଼ିଥିଲା। ପରେ ପୋଲିସ ଏକ ଭଡ଼ାଘରୁ ଉଭୟ ପ୍ରେମୀ ଯୁଗଳଙ୍କୁ ଧରିବାରେ ସଫଳ ହୋଇଥିଲା। ମହିଳାଜଣଙ୍କ କହିଛନ୍ତି ଯେ, ଦେଢ଼ବର୍ଷ ତଳେ ସେ ଅମରୋହାର ଏହି ଯୁବକଙ୍କ ସହ ଫେସ୍ବୁକ୍ ମାଧ୍ୟମରେ ପରିଚିତ ହୋଇଥିଲେ। ଏହାପରେ ଏହା ପ୍ରେମରେ ପରିଣତ ହୋଇଥିଲା ଏବଂ ଜୁନ୍ ୩୦ରେ ସେ ଘରୁ ପଳାଇ ଯାଇଥିଲେ। ପୋଲିସ ମହିଳାଙ୍କୁ ତାଙ୍କ ପରିବାରବର୍ଗଙ୍କୁ ହସ୍ତାନ୍ତର କରିଛି।
