ଜମନକିରା,୪ା୮(ରବୀନ୍ଦ୍ର ପ୍ରସାଦ ଦାନି): ଲଘୁଚାପ ଜନିତ ଲଗାଣ ବର୍ଷାରେ ଜମନକିରା ବ୍ଲକ ଅଞ୍ଚଳରେ ବହୁ ପରିବାର ବାସହରା ହୋଇପଡିଛନ୍ତି।
ସୂଚନା ଅନୁଯାୟୀ, ବ୍ଲକ ଅଧୀନ ୨୧ ପଞ୍ଚାୟତରେ ବର୍ଷା ବିତ୍ପାତ ଦେଖାଦେଇଛି। କେଉଁଠି ଚାଷଜମି ବୁଡିରହିଛି ତ ଆଉ କେଉଁଠି ଘରେ ପାଣି ପଶିବାରୁ ଲୋକେ ଅନ୍ୟତ୍ର ଆଶ୍ରୟ ନେଇଛନ୍ତି। ଅନେକ ସ୍ଥାନରେ ମାଟିଘର ଭାଙ୍ଗି ଲୋକଙ୍କୁ ବେସାହାରା କରିଦେଇଛି। ଖାରସନମାଳ ପଞ୍ଚାୟତ କୁମୁକପାଲି ଗାଁର କୃପାସିନ୍ଧୁ ଭଇଁସା, ସେହି ଗାଁର ଲକ୍ଷ୍ମୀ ସେଠ, ବଡରମା ପଞ୍ଚାୟତ ଖରମୁଣ୍ଡା ଗାଁର ଭରତ ପ୍ରଧାନ, ଜମନକିରା ଖାଇରଡ଼ିହି ଗାଁର ବର୍ଜ ମୁଣ୍ଡାଙ୍କ ଘର ଭାଙ୍ଗିଯାଇଥିବାରୁ ସେମାନେ ଦୁର୍ଦ୍ଦଶାର ଜୀବନ ବିତାଉଛନ୍ତି। ଏ ସମ୍ପର୍କରେ ବିଡ଼ିଓ ପ୍ରସନ୍ନ କୁମାର ପଟେଲଙ୍କୁ ପଚାରିବାରୁ ଯୁଦ୍ଧକାଳୀନ ଭିତ୍ତିରେ ଲୋକଙ୍କୁ ଥଇଥାନ କରାଯିବ ବୋଲି ସେ ମତ ରଖିଛନ୍ତି।
