ନୂଆଦିଲ୍ଲୀ,୧୦ା୧୦: କେନ୍ଦ୍ରୀୟ ବିଶ୍ୱବିଦ୍ୟାଳୟ ସମେତ ସମସ୍ତ ବୈଷୟିକ ଓ ଅଣବୈଷୟିକ ଶିକ୍ଷାନୁଷ୍ଠାନରେ ହିନ୍ଦୁକୁ ବାଧ୍ୟତାମୂଳକ ଭାବେ ପାଠପଢ଼ାର ମାଧ୍ୟମ କରାଯାଉ। ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହାଙ୍କ ନେତୃତ୍ୱରେ ଗଠିତ ଭାଷା ସମ୍ପର୍କିତ ସଂସଦୀୟ କମିଟି ଉପରୋକ୍ତ ସୁପାରିସ୍ କରିଛି। ଗତ ମାସରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଦିଆଯାଇଥିବା ରିପୋର୍ଟରେ କମିଟି କହିଛି, ଯେଉଁଠି ଅତି ଜରୁରୀ କେବଳ ସେହିଠାରେ ଇଂଲିଶକୁ ପଢ଼ା ମାଧ୍ୟମ କରାଯାଉ ଓ ଧୀରେ ଧୀରେ ଏହାକୁ ହିନ୍ଦୀରେ ପରିବର୍ତ୍ତନ କରାଯାଉ।
ପାଠପଢ଼ା ସମେତ ଅନ୍ୟାନ୍ୟ କାର୍ଯ୍ୟରେ ମଧ୍ୟ ହିନ୍ଦୀ ବ୍ୟବହାର ବାଧ୍ୟତାମୂଳକ ହେଉ। ଇଂଲିଶକୁ କେବଳ ଇଚ୍ଛାକୃତ ବ୍ୟବହାର ପାଇଁ ରଖାଯିବାକୁ କମିଟି ସୁପାରିସ କରିଛି। କେନ୍ଦ୍ର ସରକାରଙ୍କ ଅଧୀନରେ ଇଣ୍ଡିଆନ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି(ଆଇଆଇଟି), ଇଣ୍ଡିଆନ ଇନ୍ଷ୍ଟିଚ୍ୟୁଟ୍ ଅଫ୍ ମ୍ୟାନେଜ୍ମେଣ୍ଟ(ଆଇଆଇଏମ୍), ଅଲ୍ ଇଣ୍ଡିଆ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ (ଏମ୍ସ)ଗୁଡ଼ିକ ବୈଷୟିକ ଶିକ୍ଷାନୁଷ୍ଠାନ ଥିବାବେଳେ କେନ୍ଦ୍ରୀୟ ବିଦ୍ୟାଳୟ, ନବୋଦୟ ବିଦ୍ୟାଳୟ ଏବଂ କେନ୍ଦ୍ରୀୟ ବିଶ୍ୱବିଦ୍ୟାଳୟଗୁଡ଼ିକ ଅଣବୈଷୟିକ ଶିକ୍ଷାନୁଷ୍ଠାନ।
କମିଟି କହିବା ଅନୁଯାୟୀ ବିଶ୍ୱବିଦ୍ୟାଳୟ ଏବଂ ଉଚ୍ଚ ଶିକ୍ଷାନୁଷ୍ଠାନଗୁଡ଼ିକରେ ହିନ୍ଦୀକୁ ପାଠପଢ଼ାର ମାଧ୍ୟମ କରା ନ ଗଲେ, ଏହା ସର୍ବସାଧାରଣ ଭାଷା ହୋଇପାରିବ ନାହିଁ। ଆନୁଷ୍ଠାନିକ ଭାଷା ଆଇନ, ୧୯୬୩ ଅନୁଯାୟୀ ୧୯୭୬ରେ ଭାଷା ସମ୍ପର୍କିତ ସଂସଦୀୟ କମିଟି ଗଠନ କରାଯାଇଥିଲା। ଏଥିରେ ଲୋକ ସଭାରୁ ୨୦ ଏବଂ ରାଜ୍ୟ ସଭାରୁ ୧୦ ସଦସ୍ୟ ଅଛନ୍ତି।
