ମହାକାଳପଡା,୪।୫ (ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ଅଞ୍ଚଳର ରାଜନେତା ବିଜୟ କୁମାର ପ୍ରଧାନ(୭୪)ଙ୍କ ସୋମବାର ରାତିରେ ପରଲୋକକୁ ହୋଇଯାଇଛି। ସାରେ ସେ ହଠାତ ଅସୁସ୍ଥ ହୋଇପଡ଼ିବାରୁ ତାଙ୍କୁ ଭୁବନେଶ୍ୱର ଏକ ହସ୍ପିଟାଲକୁ ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ବିଳମ୍ବିତ ରାତିରେ ହୃଦ୍ଘାତରେ ମୃତ୍ୟୁ ଘଟିଥିଲା। ସ୍ବର୍ଗତ ପ୍ରଧାନ ମହାକାଳପଡ଼ା ବ୍ଲକ ବାରଡ଼ାଙ୍ଗ ପଞ୍ଚାୟତର ଭିତରସୁବଳା ଗଁାରେ ୧୯୪୯ରେ ଜନ୍ମଗ୍ରହଣ କରିଥିଲେ। ଉଚ୍ଚଶିକ୍ଷା ସରିବା ପରେ ଛାତ୍ର ଜୀବନରୁ ରାଜନୀତିରେ ପ୍ରବେଶ କରିଥିଲେ। ବାତ୍ୟା, ବନ୍ୟା ସମୟରେ ବ୍ଲକରେ ପ୍ରତି ଘରକୁ ଘର ବୁଲି ବିପନ୍ନ ପରିବାରକୁ ଭେଟିବା ସହ ଦୁଃଖ ସୁଖ ବୁଝୁଥିଲେ। ସେ ଦୁଇଥର ସ୍ଥାନୀୟ ବାରଡ଼ାଙ୍ଗ ପଞ୍ଚାୟତର ସରପଞ୍ଚ ହୋଇଥିଲେ। ପରବର୍ତ୍ତୀ ସମୟରେ ୧୯୮୫, ୧୯୯୦, ୨୦୦୦ରେ କଂଗ୍ରେସରୁ ରାଜନଗର ବିଧାନସଭା ନିବାଚନମଣ୍ଡଳୀ ବିଧାୟକ ପ୍ରାର୍ଥୀ ହୋଇ ପରାଜୟ ହୋଇଥିଲେ। ପରେ ଭାଜପାରେ ଯୋଗଦେଇ ୨୦୧୯ରେ ମହାକାଳପଡ଼ା ବିଧାନସଭା ନିର୍ବାଚନ ମଣ୍ଡଳୀରୁ ବିଧାୟକ ପ୍ରାର୍ଥୀ ହୋଇ ପରାଜୟ ବରଣ କରିଥିଲେ। ସ୍ବର୍ଗତ ପ୍ରଧାନଙ୍କ ମୃତଦେହ ଭୁବନେଶ୍ୱର ବାସଭବନରୁ ଅଣାଯାଇ ମହାକାଳପଡ଼ା ବ୍ଲକ ପରିସରରେ ପହଞ୍ଚତ୍ବା ପରେ ତାଙ୍କ ଅନୁଗତ ଓ ଶୁଭେଚ୍ଛୁମାନେ ଶେଷ ଦର୍ଶନ କରିଥିଲେ। କଂଗ୍ରେସ ରାଜ୍ୟ ମୁଖାପାତ୍ର ଜ୍ଞାନଦେବ ବେଉରା, ଭାଜପା ରାଜ୍ୟ କାର୍ଯ୍ୟକାରିଣୀ ସଦସ୍ୟ ବିଷ୍ଣୁ ଦାସ, ବାରଡ଼ାଙ୍ଗ ସରପଞ୍ଚ ଅରବିନ୍ଦ ଜେନା, ଭାଜପା ଯୁବନେତା ସୌଭାଗ୍ୟ ପରିଡା, ତେଜେଶ୍ୱର ପରିଡ଼ା, ଦୁର୍ଗା ପ୍ରସନ୍ନ ନାୟକ, ଉମାକାନ୍ତ ପଟ୍ଟନାୟକଙ୍କ ସମେତ ବିଧାୟକ ଅତନୁ ସବ୍ୟସାଚୀ ନାୟକ ସ୍ବର୍ଗତ ପ୍ରଧାନଙ୍କ ପାର୍ଥିବ ଶରୀରରେ ପୁଷ୍ପମାଲ୍ୟ ଅର୍ପଣ କରିଥିଲେ। ମହାକାଳପଡ଼ା ପ୍ରେସ୍ କ୍ଲବ, ବ୍ଲକର ବିଭିନ୍ନ ଅନୁଷ୍ଠାନ, ବରିଷ୍ଠ ନାଗରିକମାନେ ସମବେଦନା ଜଣାଇଥିଲେ। ମରଶରୀରକୁ ବ୍ଲକର ବିଭିନ୍ନ ପଞ୍ଚାୟତ ପରିକ୍ରମା କରାଯିବା ପରେ ସଂସ୍କାର ପାଇଁ ପୁରୀ ସ୍ବର୍ଗଦ୍ୱାର ନିଆଯାଇଥିଲା।
