ଭୋପାଳ,୧୭।୫: ଦେଶରେ କରୋନା ଭାଇରସ୍ ଦ୍ୱିତୀୟ ଲହରର ପ୍ରକୋପ ଜାରି ରହିଥିବା ବେଳେ ବିଭିନ୍ନ ରାଜ୍ୟରେ ଲକ୍ଡାଉନ କଟକଣା ଲାଗୁ କରାଯାଇଛି। କରୋନାକୁ ରୋକିବା ପାଇଁ ରାଜ୍ୟରେ ଲକ୍ଡାଉନ କରାଯାଇଥିବା ବେଳେ କିଛି ଅମାନିଆ ଏବେ ବି ରାସ୍ତାରେ ବୁଲୁଥିବାର ନଜିର ରହିଛି। ଆଉ ଏମାନଙ୍କୁ ସାବାଡ କରିବା ଲାଗି ବିଭିନ୍ନ ରାଜ୍ୟର ପୋଲିସ ଭିନ୍ନ ଭିନ୍ନ ଉପାୟରେ ଦଣ୍ଡିତ କରୁଛନ୍ତି। ଏହି କ୍ରମରେ ଏଭଳି ଅମାନିଆଙ୍କୁ ସାବାଡ଼ କରିବା ଲାଗି ମଧ୍ୟପ୍ରଦେଶ ପୋଲିସ ନିଆରା ପଦକ୍ଷେପ ଗ୍ରହଣ କରିଛି। ସହରରେ ଯେଉଁମାନେ ଅନାବଶ୍ୟକରେ ବାହାରେ ବୁଲୁଛନ୍ତି ସେମାନଙ୍କୁ ସତନା ଜିଲାର କୋଲଗଓ୍ବାଁ ଥାନାର ଏସ୍ଆଇ ୪ରୁ ୫ ପୃଷ୍ଠାରେ ରାମ ନାମ ଲେଖିବାକୁ ଦଣ୍ଡ ଦେଉଛନ୍ତି। ଏହାକୁ ଲେଖିବାକୁ ୩୦ରୁ ୪୦ ମିନିଟ୍ ସମୟ ଲାଗୁଛି। ଏଭଳି ଭଗବାନଙ୍କ ନାମ ଲେଖାଇବା ପରେ ଘରେ ରହି ପରିବାରର ଯତ୍ନ ନେବା ପାଇଁ ପୋଲିସ ସେମାନଙ୍କୁ ପରାମର୍ଶ ଦେଉଛନ୍ତି ବୋଲି ଏସ୍ଆଇ କହିଛନ୍ତି। ପୋଲିସର ଏଭଳି କାର୍ଯ୍ୟ ଏବେ ଚର୍ଚ୍ଚାର ବିଷୟ ପାଲଟିଛି।
