ମୁମ୍ବାଇ,୨୪।୪: ସ୍ଥାନୀୟ ଓ୍ବାଙ୍ଖ୍ଡେ ଷ୍ଟାଡିୟମରେ ରବିବାର ଅନୁଷ୍ଠିତ ମ୍ୟାଚରେ ମୁମ୍ବାଇ ଇଣ୍ଡିଆନ୍ସକୁ ୩୬ ରନ୍ରେ ହରାଇ ଦେଇଛି ଲକ୍ଷ୍ନୌ ସୁପର ଜିଆଣ୍ଟ୍ସ। ଅଧିନାୟକ ଲୋକେଶ ରାହୁଲଙ୍କ ଅପରାଜିତ ୧୦୩ ରନ୍ର ଶତକୀୟ ଇନିଂସ୍ ଯୋଗୁ ଲକ୍ଷ୍ନୌ ୨୦ ଓଭରରେ ୬ ଉଇକେଟ ହରାଇ ୧୬୮ ରନ୍ କରିଛି। ଜବାବରେ ମୁମ୍ବାଇ ଇଣ୍ଡିଆନ୍ସ ଶେଷ ପର୍ଯ୍ୟନ୍ତ ଖେଳି ୮ ଉଇକେଟ ହରାଇ ୧୩୨ ରନ୍ କରିବାକୁ ସକ୍ଷମ ହୋଇଥିଲା। ୫ଥର ଚାମ୍ପିୟନ ମୁମ୍ବାଇର ଏହା କ୍ରମାଗତ ଅଷ୍ଟମ ପରାଜୟ। ଦଳ ଏବେ ବି ଖାତା ଖୋଲିବା ଅପେକ୍ଷାରେ ରହିଛି। ଅନ୍ୟପକ୍ଷେ ବିଜୟ ସହ ଲକ୍ଷ୍ନୌ ପଏଣ୍ଟ ଟେବୁଲରେ ୪ର୍ଥ ସ୍ଥାନକୁ ଉଠିଛି।
ଟସ୍ ହାରି ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିବା ଲକ୍ଷ୍ନୌ ଦଳ ପକ୍ଷରୁ ଅଧିନାୟକ ଲୋକେଶ ରାହୁଲଙ୍କୁ ଛାଡ଼ିଦେଲେ ଅନ୍ୟ କୌଣସି ବ୍ୟାଟର ଅଧିକ ସମୟ କ୍ରିଜରେ ତିଷ୍ଠିପାରି ନ ଥିଲେ। ରାହୁଲ ୬୨ ବଲ୍ରେ ୧୨ ଚୌକା ଓ ୪ ଛକା ସହ ୧୦୩ ରନକରି ଅପରାଜିତ ରହିଥିଲେ। ଚଳିତ ସିଜନରେ ଏହା ତାଙ୍କର ଦ୍ୱିତୀୟ ଓ ଆଇପିଏଲରେ ଚତୁର୍ଥ ଶତକ। ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ଏହାଥିଲା ତାଙ୍କର ତୃତୀୟ ଶତକ। ଆଇପିଏଲ୍ରେ କୌଣସି ଗୋଟିଏ ଦଳ ବିପକ୍ଷରେ ୩ ଶତକ ହାସଲ କରିବାରେ ରାହୁଲ ପ୍ରଥମ। ମୁମ୍ବାଇ ପକ୍ଷରୁ କିରନ ପୋଲାର୍ଡ ଓ ରିଲେ ମେରେଡିଥ ୨ ଲେଖାଏ ଉଇକେଟ ନେଇଥିଲେ।
