ପାଇକମାଳ, ୩।୭: ବରଗଡ଼ ଜିଲା ପାଇକମାଳ ଥାନା ଅଧୀନ ଜାମସେଠ ଅଞ୍ଚଳର ଜଣେ ଯୁବତୀଙ୍କ ଅଶ୍ଳୀଳ ଭିଡିଓ ଏବଂ ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିବା ଅଭିଯୋଗ ହୋଇଛି। ପୋଲିସ ଅଭିଯୋଗକୁ ଭିତ୍ତି କରି ଜଣେ ଯୁବକଙ୍କୁ କଟକରୁ ଗିରଫ କରିଛି। ଗିରଫ ଅଭିଯୁକ୍ତ ଜଣକ ହେଲେ କଟକ ଜିଲା ବଡମ୍ବା ଥାନା ସାନବଡସିଂ ଗ୍ରାମର ସୁଗମ କେଶରୀ ନାୟକ(୨୬)। ଶନିବାର ତାଙ୍କୁ ପଦ୍ମପୁର କୋର୍ଟ ଚାଲାଣ କରାଯାଇଛି।
ସୂଚନା ଅନୁସାରେ, ସୁଗମ ବର୍ଷେ ତଳେ ପାଇକମାଳ ଜାମସେଠ ଅଞ୍ଚଳର ଜନୈକା ଯୁବତୀଙ୍କ ଟିକ୍ଟିକ୍ ଦେଖି ଲାଇକ୍ କରିଥିଲେ। ପରେ ଯୁବକ ଜଣକ ଯୁବତୀଙ୍କ ସହ ପ୍ରେମ ସମ୍ପର୍କ ରଖି ତାଙ୍କର ଅଶ୍ଳୀଳ ଭିଡିଓ ନେଇଯାଇଥିଲେ। ଗତ କିଛିଦିନ ତଳେ ଉକ୍ତ ଭିଡିଓ ସୋସିଆଲ ମିଡିଆରେ ଭାଇରାଲ କରି ସୁଗମ ଯୁବତୀଙ୍କ ଘରକୁ ଫୋନ କରି ଗାଳିଗୁଲଜ ସହ ଧମକଚମକ ଦେଇଥିଲେ। ଏ ନେଇ ଯୁବତୀ ଜଣକ ପାଇକମାଳ ଥାନାରେ ଅଭିଯୋଗ କରିବା ପରେ ପୋଲିସ ଏକ ମାମଲା (ନଂ.୧୦୦/୨୧) ରୁଜୁ କରି ତଦନ୍ତ ଚଳାଇଥିଲା। ପାଇକମାଳ ପୋଲିସର ଏକ ଟିମ୍ କଟକ ଜିଲା ବଡମ୍ବା ଅଞ୍ଚଳକୁ ଯାଇ ସୁଗମଙ୍କୁ ଗିରଫ କରିଥିଲା।
