ବ୍ରାସିଲିଆ,୩।୮: ନିଜକୁ “ଜୀବନ୍ତ ନୋଷ୍ଟ୍ରାଡାମସ” କହୁଥିବା ୩୯ ବର୍ଷୀୟ ବ୍ରାଜିଲର ପାରାଲୋଜିଷ୍ଟ ଆଥୋସ ସାଲୋମ ଏକ ବଡ଼ ଦାବି କରିଛନ୍ତି। ତାଙ୍କ କହିବା ଅନୁଯାୟୀ, ୨୦୨୬ ପାଇଁ ସେ କରିଥିବା ଦୁଇଟି ବଡ଼ ଭବିଷ୍ୟବାଣୀ ସତ ପ୍ରମାଣିତ ହୋଇଛି। ସାଲୋମ ଜଣାଇଛନ୍ତି ଯେ ତାଙ୍କର ପ୍ରଥମ ସଫଳ ଭବିଷ୍ୟବାଣୀ ମଧ୍ୟପ୍ରାଚ୍ୟରେ ବୃଦ୍ଧି ପାଉଥିବା ଉତ୍ତେଜନା ଥିଲା। ଏଥିରେ ବିଶେଷ କରି ଇରାନ ଏବଂ ଇସ୍ରାଏଲ ମଧ୍ୟରେ ପରମାଣୁ ବିକାଶକୁ ନେଇ ବୃଦ୍ଧି ପାଇଥିବା ବିବାଦ ସାମିଲ ରହିଛି। ଦ୍ୱିତୀୟ ଭବିଷ୍ୟବାଣୀ ଫୁଟବଲ ବିଶ୍ୱକପ ୨୦୨୬କୁ ନେଇ ଥିଲା। ସେ ଦାବି କରିଥିଲେ ଯେ ସ୍ପେନ ବିଜେତା ହେବ ବୋଲି ସେ ଭବିଷ୍ୟବାଣୀ କରିଥିଲେ।
ଦୁଇଟି ଦାବି ସତ ପ୍ରମାଣିତ ହେବା ପରେ ସାଲୋମ ବର୍ତ୍ତମାନ ଏକ ତୃତୀୟ ଏବଂ ଅତ୍ୟନ୍ତ ଭୟଙ୍କର ଘଟଣା ସମ୍ପର୍କରେ ଚେତାବନୀ ଦେଇଛନ୍ତି। ସେ କହିଛନ୍ତି ଯେ ଆର୍କଟିକ ଅଞ୍ଚଳରେ ରୁଷିଆ ଏବଂ ନାଟୋ ମଧ୍ୟରେ ଏକ ବଡ଼ ଧରଣର ସଂଘର୍ଷ ଘଟିପାରେ। ତରଳୁଥିବା ବରଫ ଯାତ୍ରା କାରଣରୁ ନୂତନ ଶକ୍ତି ସମ୍ବଳ ଏବଂ ବାଣିଜ୍ୟିକ ସାମୁଦ୍ରିକ ପଥଗୁଡ଼ିକ ଖୋଲିବାରେ ଲାଗିଛି। ଏହାଫଳରେ ଏହି ଶାନ୍ତ ଅଞ୍ଚଳ ଏକ ବଡ଼ ଯୁଦ୍ଧକ୍ଷେତ୍ରରେ ପରିଣତ ହୋଇପାରେ। ସାଲୋମ ଦାବି କରିଛନ୍ତି ଯେ ରୁଷ ଆର୍କଟିକର କୌଶଳଗତ ଅଞ୍ଚଳଗୁଡ଼ିକରେ କ୍ଷେପଣାସ୍ତ୍ର (ମିସାଇଲ) ସିଷ୍ଟମ ମୁତୟନ କରୁଛି। ଏହାବ୍ୟତୀତ ସେ ଆଫ୍ରିକାର ସାହେଲ ଅଞ୍ଚଳରେ ମଧ୍ୟ ବୃଦ୍ଧି ପାଉଥିବା ଉଗ୍ରବାଦ ଏବଂ ଅନ୍ତର୍ଜାତୀୟ ଉତ୍ତେଜନା କାରଣରୁ ଏକ ବଡ଼ ସଂଘର୍ଷର ଆଶଙ୍କା ପ୍ରକାଶ କରିଛନ୍ତି।
