କେନ୍ଦୁଝର,୨୧।୧୦(ସ୍ବ.ପ୍ର.)- ସ୍ତ୍ରୀ ହତ୍ୟା ମାମଲାର ଶୁଣାଣି କରି କେନ୍ଦୁଝର ଜିଲା ଓ ଦୌରାଜଜ ଚିତ୍ତରଞ୍ଜନ ମହାପାତ୍ର ଶୁକ୍ରବାର ସ୍ତ୍ରୀ ହତ୍ୟାକାରୀ ସଦର ଥାନା ବାୟାପଣ୍ଡାଧର ଗ୍ରାମର ସୁମନ୍ତ ଜୁଆଙ୍ଗ(୪୦)ଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏପରି କି ୫୦ ହଜାର ଟଙ୍କାର ଜରିମାନା ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦାୟ ଅଧିକ ଦେଢ଼ ବର୍ଷ ଜେଲ ଦଣ୍ଡାଦେଶ ଭୋଗିବାକୁ କୋର୍ଟ ରାୟ ପ୍ରକାଶ କରିଛନ୍ତି।
ଅଭିଯୋଗ ମୁତାବକ, ୨୦୧୮ ଏପ୍ରିଲ ୧୧ରେ ସ୍ବାମୀ ସୁମନ୍ତ ଏବଂ ସ୍ତ୍ରୀ ପୁରୁଣ୍ଡି ଜୁଆଙ୍ଗଙ୍କ ମଧ୍ୟରେ ବଚସା ହୋଇଥିଲା। ଏଥିରେ ସୁମନ୍ତ ଉତ୍ତ୍ୟକ୍ତ ହୋଇ ଏକ ଶାବଳରେ ପୁରୁଣ୍ଡିଙ୍କୁ ଆକ୍ରମଣ କରିଥିଲେ। ଫଳରେ ପୁରଣ୍ଡିଙ୍କ ମୃତ୍ୟୁ ଘଟିଥିଲା। ଏନେଇ ପୁରୁଣ୍ଡିଙ୍କ ଭଉଣୀ ସାଧବାଣୀ ଜୁଆଙ୍ଗ ଥାନାରେ ଏତଲା ଦେଇଥିଲେ। ପୋଲିସ ଏକ ମାମଲା(ନଂ.୧୧/୧୮) ରୁଜୁ କରି ଅଭିଯୁକ୍ତ ସୁମନ୍ତଙ୍କୁ ଗିରଫ କରିଥିଲା। ସମସ୍ତ ସାକ୍ଷୀଙ୍କ ବୟାନ ଏବଂ ପୋଲିସ ରିପୋର୍ଟକୁ ଭିତ୍ତି କରି ଜିଲା ଓ ଦୌରାଜଜ ଏହି ଦଣ୍ଡାଦେଶ ଶୁଣାଇଛନ୍ତି। ଜରିମାନା ରାଶି ସାଙ୍ଗକୁ ସରକାରଙ୍କ ପକ୍ଷରୁ ଥିବା ସହାୟତା ବ୍ୟବସ୍ଥା ଅନୁସାରେ ମୃତାଙ୍କ ୩ ଛୁଆଙ୍କୁ ଦେବାକୁ କୋର୍ଟ ଆଦେଶ କରିଥିବା ପବ୍ଲିକ ପ୍ରସିକ୍ୟୁଟର ପ୍ରଦୀପ ଦାସ ଏହି ସୂଚନା ଦେଇଛନ୍ତି।
