ଅହମଦାବାଦ,୧୮।୧୦ : କେନ୍ଦ୍ର ଆଇନ ମନ୍ତ୍ରୀ କିରେନ ରିଜିଜୁ କହିଛନ୍ତି ଯେ କଲେଜିୟମ ବ୍ୟବସ୍ଥାରେ ଦେଶର ଲୋକମାନେ ଖୁସି ନୁହଁନ୍ତି ଏବଂ ସମ୍ବିଧାନ ଅନୁଯାୟୀ ବିଚାରପତି ନିଯୁକ୍ତ କରିବା ସରକାରଙ୍କ କାମ। ଆରଏସଏସର ମୁଖପତ୍ର ପଞ୍ଚଜନ୍ୟ ଦ୍ୱାରା ଏଠାରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେଇ ରିଜିଜୁ କହିଛନ୍ତି ଯେ ବିଚାରପତିମାନେ ନିଯୁକ୍ତି ସମ୍ପର୍କିତ ନିଷ୍ପତ୍ତି ନେବାରେ ବ୍ୟସ୍ତ ରହୁଛନ୍ତି। ଯେଉଁଥିପାଇଁ ନ୍ୟାୟ ପ୍ରଦାନ କରିବା ଭଳି ସେମାନଙ୍କର ପ୍ରାଥମିକ କାର୍ଯ୍ୟ ପ୍ରଭାବିତ ହେଉଛି।
ଗତ ମାସରେ ଉଦୟପୁରରେ ଅନୁଷ୍ଠିତ ଏକ ସମ୍ମିଳନୀରେ ସେ କହିଥିଲେ ଯେ ସୁପ୍ରିମକୋର୍ଟରେ ନିଯୁକ୍ତିର କଲେଜିୟମ ବ୍ୟବସ୍ଥା ଉପରେ ପୁନର୍ବିଚାର କରିବାର ଆବଶ୍ୟକତା ରହିଛି।
ବିଚାରପତି ନିଯୁକ୍ତି ପ୍ରକ୍ରିୟା ଉପରେ ଏକ ପ୍ରଶ୍ନର ଉତ୍ତରରେ ରିଜିଜୁ କହିଛନ୍ତି, ୧୯୯୩ ପର୍ଯ୍ୟନ୍ତ ଭାରତର ପ୍ରତ୍ୟେକ ବିଚାରପତି ଭାରତର ପ୍ରଧାନ ବିଚାରପତିଙ୍କ ପରାମର୍ଶ କ୍ରମେ ଆଇନ ମନ୍ତ୍ରଣାଳୟ ଦ୍ୱାରା ନିଯୁକ୍ତ ହେଉଥିଲେ। ସେତେବେଳେ ଆମର ବହୁ ବିଶିଷ୍ଟ ବିଚାରପତି ଥିଲେ। ସମ୍ବିଧାନରେ ଏହା ସ୍ପଷ୍ଟ ହୋଇଛି ଯେ ଭାରତର ରାଷ୍ଟ୍ରପତି ବିଚାରପତିମାନଙ୍କୁ ନିଯୁକ୍ତ କରିବେ, ଅର୍ଥାତ ଆଇନ ମନ୍ତ୍ରଣାଳୟ ଭାରତର ପ୍ରଧାନ ବିଚାରପତିଙ୍କ ପରାମର୍ଶ କ୍ରମେ ବିଚାରପତିମାନଙ୍କୁ ନିଯୁକ୍ତ କରିବେ।
ସୁପ୍ରିମକୋର୍ଟ କଲେଜିୟମ ମୁଖ୍ୟ ବିଚାରପତିଙ୍କ ଅଧ୍ୟକ୍ଷତାରେ ଚାରିଜଣ ବରିଷ୍ଠ ବିଚାରପତିଙ୍କୁ ନେଇ ଗଠିତ। କଲେଜିୟମର ସୁପାରିଶକୁ ନେଇ ସରକାର ଆପତ୍ତି ଉଠାଇ ପାରନ୍ତି କିମ୍ବା ସ୍ପଷ୍ଟୀକରଣ ମାଗିପାରନ୍ତି, ଯଦି ପାଞ୍ଚ ସଦସ୍ୟ ବିଶିଷ୍ଟ ସଂସ୍ଥା ଏହାକୁ ଦୋହରାନ୍ତି ତେବେ ନାମଗୁଡିକର ଅନୁମୋଦନ ପ୍ରକ୍ରିୟା ବାଧ୍ୟତାମୂଳକ ହୋଇଥାଏ।
ସେ କହିଛନ୍ତି, ଦେଶର ଆଇନ ମନ୍ତ୍ରୀ ହୋଇ ମୁଁ ଦେଖିଛି ଯେ ପରବର୍ତ୍ତୀ ବିଚାରପତି କିଏ ହେବ ତାହା ସ୍ଥିର କରିବାକୁ ବିଚାରପତିଙ୍କ ଅଧା ସମୟ ଏବଂ ମନ ଉତ୍ସର୍ଗୀକୃତ ରହୁଛି।
ରିଜିଜୁ କହିଛନ୍ତି ଯେ ଯେପରି ଗଣମାଧ୍ୟମ ଉପରେ ନଜର ରଖିବା ପାଇଁ ଭାରତର ପ୍ରେସ କାଉନସିଲ ଅଛି, ସେହିଭଳି ନ୍ୟାୟପାଳିକା ଉପରେ ନଜର ରଖିବାର ବ୍ୟବସ୍ଥା ରହିବା ଉଚିତ ଏବଂ ଯଦି ନ୍ୟାୟପାଳିକା ନିଜେ ପଦକ୍ଷେପ ନିଅନ୍ତି ତେବେ ଏହା ଦେଶ ପାଇଁ ଭଲ ହେବ। ସେ ଏହା ମଧ୍ୟ କହିଛନ୍ତି ଯେ ଗଣତନ୍ତ୍ରରେ କାର୍ଯ୍ୟନିର୍ବାହୀ ଉପରେ ନଜର ରଖିବାର ଏକ ବ୍ୟବସ୍ଥା ଅଛି। କିନ୍ତୁ ନ୍ୟାୟପାଳିକା ମଧ୍ୟରେ ସେପରି କୌଣସି ପ୍ରଣାଳୀ ନାହିଁ। ସେ କହିଛନ୍ତି ଯେ ବିଚାରପତି ଚୟନ ପ୍ରକ୍ରିୟାରେ ବେଳେବେଳେ ଦଳଗତତା ମଧ୍ୟ ରହିଥାଏ ଏବଂ ଏହା ଅତ୍ୟନ୍ତ ଜଟିଳ ଏବଂ ସ୍ବଚ୍ଛ ନୁହେଁ।
