ଶାରଜା,୧।୧୧: ଚଳିତ ଟି୨୦ ବିଶ୍ୱକପ୍ରେ ଟସ୍ ଜିତିବାର ଅର୍ଥ ଏକତରଫା ମ୍ୟାଚ୍ ହାତେଇ ନେବା। ଏପର୍ଯ୍ୟନ୍ତ ଖେଳାଯାଇଥିବା ମ୍ୟାଚ୍ରେ ପ୍ରାୟତଃ ଟସ୍ ଜିତୁଥିବା ଦଳ ହିଁ ମ୍ୟାଚ୍ ଜିତୁଛନ୍ତି। କିନ୍ତୁ ଏହାକୁ ଭୁଲ କରି ଦେଖାଇଛି ଗତ ଥରର ରନର୍ସଅପ୍ ଇଂଲଣ୍ଡ। ଟସ୍ ହାରିବା ପରେ ମଧ୍ୟ ଇଂଲଣ୍ଡ ୨୬ ରନ୍ରେ ଶ୍ରୀଲଙ୍କାକୁ ହରାଇ ଦେଇଛି। ମ୍ୟାଚ୍ ବେଳେ କାକର ପଡ଼ିଥିଲା। ହେଲେ ଇଆନ ମୋର୍ଗାନଙ୍କ କ୍ୟାପଟେନଶିପ୍ ଆଗରେ ତାହା କାମ ଦେଇ ନ ଥିଲା। ଏହା ଇଂଲଣ୍ଡର ଲଗାତାର ଚତୁର୍ଥ ବିଜୟ। ଏହି ବିଜୟ ସହ ଦଳ ସେମିଫାଇନାଲରେ ସ୍ଥାନ ପକ୍କା କରିଛି।
ଟସ୍ ଜିତିବା ଠାରୁ ପ୍ରାରମ୍ଭିକ ୧୦ ଓଭର ପର୍ଯ୍ୟନ୍ତ ସବୁ କିଛି ଶ୍ରୀଲଙ୍କା ପକ୍ଷରେ ଥିଲା। ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ଇଂଲଣ୍ଡ ୧୦ ଓଭର ସୁଦ୍ଧା ୩ ପ୍ରମୁଖ ବ୍ୟାଟରଙ୍କ ଉଇକେଟ ହରାଇ ମାତ୍ର ୪୭ ରନ୍ କରିଥିଲା। କିନ୍ତୁ ପରବର୍ତ୍ତୀ ୧୦ ଓଭରରେ ବଟଲରଙ୍କ ଯୋଗୁ ୧୧୬ ରନ୍ ଯୋଡ଼ି ହୋଇଥିଲା। ବଟଲର ଅନ୍ତିମ ବଲରେ ଛକା ଲଗାଇ ଶତକ ପୂରଣ କରିଛନ୍ତି। ୬୭ ବଲର ସମ୍ମୁଖୀନ ହୋଇଥିବା ବଟଲରଙ୍କ ଇନିଂସରେ ସାମିଲ ଥିଲା ୬ ଲେଖାଏ ଚୌକା ଓ ଛକା। ତାଙ୍କୁ ଉଚିତ ସହଯୋଗ ଦେଇଥିଲେ ଅଧିନାୟକ ଇଆନ ମୋର୍ଗାନ। ସେ ୧ ଚୌକା ଓ ୩ ଛକା ବଳରେ ୪୦ ରନ୍ କରିଥିଲେ।
ଜବାବରେ ପ୍ରାରମ୍ଭକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିବା ଶ୍ରୀଲଙ୍କା ୭୬ ରନ୍ରେ ୫ ଉଇକେଟ ହରାଇ ସାରିଥିଲା। ଓ୍ବାନିନ୍ଦୁ ହାସରଙ୍ଗା (୩୪ ରନ୍, ୩ ଚୌକା ଓ ୧ ଛକା) ଓ ଅଧିନାୟକ ଦାସୁନ ଶନକା (୨୬ )ଙ୍କ ଯୋଡ଼ି ୬ଷ୍ଠ ଉଇକେଟ ପାଇଁ ୫୩ ରନ୍ ଯୋଡ଼ି ଶ୍ରୀଲଙ୍କାକୁ ଆଶା ଦେଇଥିଲେ। ହେଲେ ତାହା ଯଥେଷ୍ଟ ସାବ୍ୟସ୍ତ ହୋଇ ନ ଥିଲା। ଶ୍ରୀଲଙ୍କା ୧୯ ଓଭରରେ ୧୩୭ ରନ୍ରେ ଅଲଆଉଟ୍ ହୋଇଯାଇଥିଲା।
