ବରଗଡ଼ ଅଫିସ୍,୧୫।୨: ବରଗଡ଼ ଜିଲାରେ ରବି ଚାଷକାମ ଜୋର୍ ଧରିଛି। ଅଧିକାଂଶ ସ୍ଥାନରେ ଚାଷୀମାନେ ତଳିପକା, ଧାନ ବୁଣା ସାରିଦେଲେଣି। କେତେକ ସ୍ଥାନରେ ରୁଆକାର୍ଯ୍ୟ ମଧ୍ୟ ଶେଷ ହୋଇଛି। ବର୍ତ୍ତମାନ ସମୟରେ ଧାନ ଫସଲ ପାଇଁ ୟୁରିଆ ସାରର ଆବଶ୍ୟକତା ରହିଛି। ମାତ୍ର ଏହି ସାରର ଅଭାବ ଏବଂ ମୁନାଫାଖୋର ବେପାରୀଙ୍କ କଳାବଜାର ଚାଷୀକୁଳକୁ ଚିନ୍ତାରେ ପକାଇଛି। ୟୁରିଆ ଅଭାବ ଯୋଗୁ ଚାଷୀମାନଙ୍କୁ ଖୁବ୍ ହଟହଟାର ସମ୍ମୁଖୀନ ହେବାକୁ ପଡୁଛି। ଆବଶ୍ୟକତା ଦୃଷ୍ଟିରୁ ଚାଷୀମାନେ ଚଢ଼ାଦରରେ ସାର କିଣିବାକୁ ବାଧ୍ୟ ହେଉଛନ୍ତି। ୟୁରିଆ ସାର ପ୍ୟାକେଟ୍ (୪୫ କି.ଗ୍ରା) ପ୍ରତି ୨୬୫ ଟଙ୍କା ରହିଛି। କିନ୍ତୁ ଅସାଧୁ ବ୍ୟବସାୟୀମାନେ ଏହାକୁ ୩୦୦ରୁ ୩୫୦ ଟଙ୍କା ଦରରେ ବିକ୍ରି କରୁଥିବା ଅଭିଯୋଗ ହୋଇଛି।
ବରଗଡ଼ ଜିଲାରେ ୧ଲକ୍ଷ ୫୯ ହଜାର ହେକ୍ଟର ଜମିରେ ରବି ଧାନଚାଷ ହୋଇଥାଏ। ଏଥିପାଇଁ ଅତିକମ୍ରେ ୨୪ହଜାର ମେଟ୍ରିକ ଟନର ୟୁରିଆ ସାରର ଆବଶ୍ୟକତା ରହିଛି। ମାତ୍ର ଏପର୍ଯ୍ୟନ୍ତ ମାତ୍ର ୧୨ହଜାର ମେଟ୍ରିକ ଟନ୍ ୟୁରିଆ ଜିଲାକୁ ପହଞ୍ଚିଛି। ଆବଶ୍ୟକତାଠାରୁ କମ୍ ସାର ଆସିଥିବାରୁ ପ୍ୟାକ୍ସ ଗୁଡ଼ିକରେ ସାରର ଅଭାବ ଦେଖାଦେଇଛି। ଅନ୍ୟ କେତେକ ନିର୍ଦ୍ଦିଷ୍ଟ ଘରୋଇ ଲାଇସେନ୍ସପ୍ରାପ୍ତ ବିକ୍ରେତା ସରକାରଙ୍କ ଆଇନକୁ ବେଖାତିର୍ କରି ସାର କଳାବଜାର କରୁଥିବା ଅଭିଯୋଗ ହୋଇଛି।
ଜାମଟିକ୍ରାର ଚାଷୀ ସୁରେନ୍ଦ୍ର କଠାର ଅଭିଯୋଗ କରିଛନ୍ତି, ଗତ ୯ତାରିଖରେ ସେ ରେଙ୍ଗାଲିକ୍ୟାମ୍ପ ସ୍ଥିତ ଜଣେ ସାର ବିକ୍ରେତାଙ୍କଠାରୁ ଏକ ପ୍ୟାକେଟ୍ ୟୁରିଆ ସାର କିଣିଥିଲେ । ସାର ବିକ୍ରେତା ଜଣକ ତାଙ୍କଠାରୁ ୩୦୦ ଟଙ୍କା ନେଇ ରସିଦ ଦେଇ ନ ଥିଲେ। ଅଳ୍ପ କିଛି ସମୟ ପରେ କଠାରଙ୍କ ମୋବାଇଲ ଫୋନକୁ ସେ କିଣିଥିବା ୟୁରିଆ ସାରର ଦର ୨୬୫ ଟଙ୍କା ପଇଠ ହୋଇଥିବା ନେଇ ସୂଚନା ଆସିଥିଲା। ଏ ନେଇ କଠାର ଅତାବିରା ସହକାରୀ କୃଷି ଅଧିକାରୀଙ୍କଠାରେ ଲିଖିତ ଅଭିଯୋଗ କରିଛନ୍ତି। ଅତାବିରା, ଗୋଡ଼ଭଗା, ଲରମ୍ଭା ଅଞ୍ଚଳରେ ୩୫୦ ଟଙ୍କାରେ ୟୁରିଆ ସାର ବିକ୍ରି ହେଉଛି ବୋଲି ଗୋଡ଼ଭଗା ଅଞ୍ଚଳର ଚାଷୀ ଦୟାନିଧି କର୍ଣ୍ଣ କହିଛନ୍ତି । ଏ ସମ୍ପର୍କରେ ବରଗଡ଼ ମୁଖ୍ୟ ଜିଲା କୃଷି ଅଧିକାରୀ ଦୀନବନ୍ଧୁ ଗାନ୍ଧୀଙ୍କୁ ପଚାରିବାରୁ ଜିଲାକୁ ଆହୁରି ୧୨ହଜାର ମେଟ୍ରିକ ଟନ ୟୁରିଆ ସାରର ଆବଶ୍ୟକ ରହିଛି । ସାର କଳାବଜାର ଯେଭଳି ନ ହେବ, ସେଥିପ୍ରତି କୃଷି ବିଭାଗ ନଜର ରଖିଛି। କଳାବଜାର ନେଇ ପ୍ରମାଣ ମିଳିଲେ ସମ୍ପୃକ୍ତ ବିହନ ବିକ୍ରେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଗାନ୍ଧୀ କହିଛନ୍ତି ।
