ନୂଆଦିଲ୍ଲୀ, ୩୦୧୦: ସିବିଏସଇ ଗୁରୁବାର ୨୦୨୮ ଦଶମ ଶ୍ରେଣୀ ବୋର୍ଡ ପରୀକ୍ଷା ଢାଞ୍ଚା ସମ୍ପର୍କରେ ସ୍ପଷ୍ଟ କରିଛି। ଏଥିରେ ଛାତ୍ରୀଛାତ୍ରଙ୍କ ପାଇଁ ୫ଟି ବାଧ୍ୟତାମୂଳକ ବିଷୟ ରହିବ ସହିତ ଏକ ଅତିରିକ୍ତ ଦକ୍ଷତା ଭିତ୍ତିକ ପେପରର ବିକଳ୍ପ ରହିବ। ଯଦି ଛାତ୍ରୀଛାତ୍ରମାନେ ଗଣିତ, ବିଜ୍ଞାନ କିମ୍ବା ସାମାଜିକ ବିଜ୍ଞାନରେ ଫେଲ ହୁଅନ୍ତି, ତେବେ ମଧ୍ୟ ଏହି ଦକ୍ଷତା ପେପର ସେମାନଙ୍କୁ ପରୀକ୍ଷାରେ ପାସ୍ କରିବାରେ ସାହାଯ୍ୟ କରିପାରିବ। ବୋର୍ଡ ସ୍ପଷ୍ଟ କରିଛି ଯେ, ତା’ର ଶିକ୍ଷା ଯୋଜନାରେ ଅନ୍ତଃ-ଶୃଙ୍ଖଳିତ କ୍ଷେତ୍ର ଏବଂ ସିଟି ଓ ଏଆଇ ମଡ୍ୟୁଲ ଅନ୍ତର୍ଭୁକ୍ତ କରାଯିବ ନାହିଁ। ଏହି ସ୍ପଷ୍ଟୀକରଣ ବିଶେଷ ଭାବେ ୨୦୨୬-୨୭ ଶିକ୍ଷାବର୍ଷରେ ନବମ ଶ୍ରେଣୀରେ ପଢୁଥିବା ଛାତ୍ରୀଛାତ୍ରଙ୍କ ପାଇଁ ଲାଗୁ ହେବ, ଯେଉଁମାନେ ୨୦୨୮ରେ ସେମାନଙ୍କର ଦଶମ ବୋର୍ଡ ପରୀକ୍ଷା ଦେବେ। ଏହା ବର୍ତ୍ତମାନର ଦଶମ ଶ୍ରେଣୀ ବ୍ୟାଚ୍ ଉପରେ କୌଣସି ପ୍ରଭାବ ପକାଇବ ନାହିଁ। କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (ସିବିଏସ୍ଇ) ର ଏକାଡେମିକ୍ସ ନିର୍ଦ୍ଦେଶିକା ପ୍ରଜ୍ଞା ଏମ୍. ସିଂ ସ୍କୁଲ ଅଧ୍ୟକ୍ଷମାନଙ୍କୁ ପଠାଇଥିବା ଏକ ବିଜ୍ଞପ୍ତିରେ ଏହି ସୂଚନା ଦେଇଛନ୍ତି। ସେ ଆହୁରି କହିଛନ୍ତି, ଦଶମ ଶ୍ରେଣୀ (୨୦୨୮ ବ୍ୟାଚ) ର ଛାତ୍ରୀଛାତ୍ରଙ୍କ ପାଇଁ ବୃତ୍ତିଗତ ଶିକ୍ଷା ଏକ ବାଧ୍ୟତାମୂଳକ ପାଠ୍ୟକ୍ରମ ଭାବେ ରହିବ। ଏହି ଆବଶ୍ୟକତାକୁ ପୂରଣ କରିବା ପାଇଁ, ଛାତ୍ରୀଛାତ୍ରମାନେ ‘କୌଶଳ ବିକାଶ’ ବିଷୟ କିମ୍ବା ବୋର୍ଡ ଦ୍ୱାରା ବିଜ୍ଞପ୍ତି ଜାରି କରାଯାଇଥିବା ୨୨ଟି ଦକ୍ଷତା ଭିତ୍ତିକ ବିଷୟ ମଧ୍ୟରୁ ଯେକୌଣସି ଗୋଟିଏକୁ ଚୟନ କରିପାରିବେ। ସିବିଏସଇ ଧନ୍ଦାମୂଳକ ଶିକ୍ଷା ପାଇଁ ୨ଟି ବିକଳ୍ପ ରଖିଛି।
