ବଇଣ୍ଡା, ୨୬ା୭(ଡି.ଏନ.ଏ.) ତାଙ୍କ ତୂଳୀରେ ରହିଛି ଯାଦୁ। ସ୍ପର୍ଶ ମାତ୍ରକେ ଚିତ୍ରସବୁ ଯେମିତି ହୋଇଉଠନ୍ତି ଜୀବନ୍ତ। ସ୍କୁଲରୁ ଆର୍ଟ କଲେଜ ଯାଏ ସେ ଆଙ୍କିଛନ୍ତି ଅନେକ ଚିତ୍ର। କେଉଁ ବିଶିଷ୍ଟ ବ୍ୟକ୍ତିଙ୍କର ହେଉ ଅବା ପ୍ରକୃତିର, ସବୁଥିରେ ରହିଛି ତାଙ୍କ ଯାଦୁକରୀ କଳାର ଛାପ। ଏହା ହିଁ ତାଙ୍କୁ ଆଣି ଦେଇଛି ସ୍ବତନ୍ତ୍ର ପରିଚୟ। ଏଥିପାଇଁ ରାଜ୍ୟ ଓ ରାଜ୍ୟ ବାହାରେ ମିଳିଛି ୭୦ ପୁରସ୍କାର। ଏବେ ଜାତୀୟ ଓ ଅନ୍ତର୍ଜାତୀୟ ପ୍ରତିଯୋଗିତା ପାଇଁ ପ୍ରସ୍ତୁତ ହେଉଥିବା ଏହି ଯୁବ ଚିତ୍ରଶିଳ୍ପୀ ହେଉଛନ୍ତି ଅନୁଗୋଳ ଜିଲା କିଶୋରନଗର ବ୍ଲକ ଅଙ୍ଗପଡା ପଞ୍ଚାୟତ ଅଙ୍ଗପଡା ଗ୍ରାମର କୁବେର ବାରିକ (୩୦)।
କୁବେରଙ୍କ କହିବା ଅନୁଯାୟୀ, ୭ମ ଶ୍ରେଣୀରୁ ଆରମ୍ଭ ହୋଇଥିଲା ଏହି ସାଧନା। ଚିତ୍ର ଆଙ୍କି ସେ ବିଦ୍ୟାଳୟରେ ପ୍ରଥମ ହୋଇଥିଲେ। ସେବେଠାରୁ ଆଉ ପଛକୁ ଫେରିନାହାନ୍ତି। ପ୍ରତିଦିନ ପେନ୍ସିଲରେ ବିଭିନ୍ନ ଚିତ୍ର ଆଙ୍କି ସେଥିରେ ଜୀବନ ଦେବାକୁ ଚେଷ୍ଟା କରୁଥିଲେ। ପରେ ଏହା ତାଙ୍କ ନିଶାରେ ପରିଣତ ହୋଇଗଲା। ୨୦୦୬ରେ ମାଟ୍ରିକ ପରୀକ୍ଷା ଦେଇସାରିବା ପରେ ବାମୁରର ଚିତ୍ରଶିଳ୍ପୀ ପୂର୍ଣ୍ଣଚନ୍ଦ୍ର ପ୍ରଧାନଙ୍କ ଠାରୁ ଏ ନେଇ ତାଲିମ ନେଲେ। ଯୁକ୍ତ ୩ ପରେ ଭୁବନେଶ୍ୱରସ୍ଥିତ ଆର୍ଟ କଲେଜରେ ପିଜି କଲେ। ଏଥିସହ ଅନେକ ଚିତ୍ର ଆଙ୍କି ଚର୍ଚ୍ଚାର ପରିସରକୁ ଆସିଲେ। କଲେଜରେ ପଢୁଥିବାବେଳେ ମହାବିଦ୍ୟାଳୟସ୍ତରୀୟ ଚିତ୍ର ପ୍ରତିଯୋଗିତାରେ ଅଂଶଗ୍ରହଣ କରି ରାଜ୍ୟରେ ଦ୍ୱିତୀୟ ସ୍ଥାନ ଅଧିକାର କରିଥିଲେ। ୨୦୧୧ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କଠାରୁ ସୂଚନା ଭବନରେ ପୁରସ୍କାର ଗ୍ରହଣ କରିଥିଲେ। ଗାଁଠାରୁ ଆରମ୍ଭ କରି ରାଜ୍ୟ ଓ ରାଜ୍ୟ ବାହାରେ ୭୦ଟି ସ୍ଥାନରୁ ତାଙ୍କୁ ପୁରସ୍କାର ମିଳିପାରିଛି। ମହାରାଷ୍ଟ୍ରର ପ୍ରଫୁଲ୍ଲ ଫାଉଣ୍ଡେଶନ ପକ୍ଷରୁ ଅନୁଷ୍ଠିତ ଜାତୀୟସ୍ତରୀୟ ପ୍ରତିଯୋଗିତାରେ ଶ୍ରେଷ୍ଠ ଚିତ୍ରଶିଳ୍ପୀ ପୁରସ୍କାର ପାଇଛନ୍ତି। ବିଭିନ୍ନ ଟିଭି ଶୋ’ରେ ଭାଗ ନେଇ ସେ ତାଙ୍କ କଳା ପ୍ରଦର୍ଶନ କରୁଛନ୍ତି। ଆଗାମୀ ଦିନରେ ଜାତୀୟ ଓ ଅନ୍ତର୍ଜାତୀୟସ୍ତରରେ ପ୍ରତିଭା ଦେଖାଇବା ଅପେକ୍ଷାରେ ରହିଥିବା କୁବେର ପ୍ରକାଶ କରିଛନ୍ତି। ଓଡ଼ିଶା ଲଳିତକଳା ଏକାଡେମୀ ପକ୍ଷରୁ ରାଜ୍ୟସ୍ତରୀୟ କୋଭିଡ୍-୧୯ ଅନ୍ଲାଇନ ଚିତ୍ରକଳା ପ୍ରତିଯୋଗିତାରେ ତାଙ୍କ ଚିତ୍ର ଜୁରି ସଦସ୍ୟଙ୍କ ଦ୍ୱାରା ମନୋନୀତ ସହ ପୁରସ୍କୃତ ନିମନ୍ତେ ତାଲିକାଭୁକ୍ତ ହୋଇଥିବା କୁବେର କହିଛନ୍ତି।
