ଭୁବନେଶ୍ୱର,୭ା୬(ବ୍ୟୁରୋ): କରୋନା ସଙ୍କଟ ଭିତରେ ଓଡ଼ିଶା, ଭାରତ ସମେତ ସମଗ୍ର ବିଶ୍ୱ ଫସି ରହିଛି। ଲକ୍ଷ ଲକ୍ଷ ଲୋକ ରୋଜଗାର ହରାଇ ଭୋକରେ ରହୁଥିବାବେଳେ ଏଭଳି ଘଡିସନ୍ଧି ମୁହୂର୍ତ୍ତରେ ଅନେକ ସହୃଦୟ ବ୍ୟକ୍ତି ଓ ଅନୁଷ୍ଠାନ ସହଯୋଗର ହାତ ବଢାଉଛନ୍ତି। ସେପରି ଜଣେ ବ୍ୟକ୍ତି ହେଉଛନ୍ତି କୃଷ୍ଣ ଚନ୍ଦ୍ର ପ୍ରଧାନ। ଗତବର୍ଷଠାରୁ ସେ କରୋନା ଲଢେଇରେ ସାମିଲ ହୋଇଛନ୍ତି। ଭୁବନେଶ୍ୱରର ନୟାପଲ୍ଲୀ ଅଞ୍ଚଳରେ ରହୁଥିବା କୃଷ୍ଣ ଏକ ଘରୋଇ ହସ୍ପିଟାଲରେ କାମ କରୁଛନ୍ତି। ଯାହା ଦରମା ପାଉଛନ୍ତି ସେଥିରେ ନିଜ ଖର୍ଚ୍ଚ ମେଣ୍ଟାଇବା ସହ ଭୋକରେ ରହୁଥିବା ଲୋକଙ୍କୁ ଖାଦ୍ୟ ଦେଉଛନ୍ତି। କୌଣସି ଅନୁଷ୍ଠାନ ସହ ଜଡିତ ନ ହୋଇ ନିଜ ଦରମାରୁ ହିଁ ସମସ୍ତ ଖର୍ଚ୍ଚ ବହନ କରୁଛନ୍ତି। ଗତବର୍ଷ କରୋନା ସମୟରେ ପ୍ରବାସୀ ଓଡ଼ିଆଙ୍କୁ ରନ୍ଧା ଖାଦ୍ୟ ବଣ୍ଟନ କରୁଥିଲେ। ପ୍ରବାସୀମାନେ ଆସୁଥିବା ବିଭିନ୍ନ ଗାଡି, ବସ, ଟ୍ରକ୍ ଓ ରେଳ ଷ୍ଟେଶନ ନିକଟରେ ରହି ସେମାନଙ୍କୁ ଖାଇବାକୁ ଦେଉଥିଲେ। ଏହା ବ୍ୟତୀତ ରେଳ ଷ୍ଟେଶନ ଅଞ୍ଚଳରେ ପ୍ରତିଦିନ ପାଖାପାଖି ୩ଶହ ଅସହାୟ ଲୋକଙ୍କୁ ମଧ୍ୟ ଖାଦ୍ୟ ଦେଉଥିଲେ। ଏବର୍ଷ ମଧ୍ୟ କୃଷ୍ଣ କରୋନା ଆକ୍ରାନ୍ତଙ୍କ ଆଟେଣ୍ଡାଣ୍ଟମାନଙ୍କୁ ଖାଇବାକୁ ଦେଉଛନ୍ତି। ଏମ୍ସ ଓ ଏସ୍ସିବି ମେଡିକାଲରେ ଏହି ସେବା ଜାରି ରଖିଛନ୍ତି। ତାଙ୍କର ଏହି ସେବା ମନୋଭାବକୁ ଦେଖି ଏବେ ଆଉ ୩ଜଣ ତାଙ୍କ ସହ ଯୋଡି ହୋଇଛନ୍ତି। ତେବେ ସମସ୍ତ ଖର୍ଚ୍ଚ କୃଷ୍ଣ ବହନ କରୁଥିବାବେଳେ ଅନ୍ୟମାନେ ଖାଦ୍ୟ ରାନ୍ଧିବା ଓ ମେଡିକାଲରେ ନେଇ ପହଞ୍ଚାଇବାରେ ତାଙ୍କୁ ସହଯୋଗ କରୁଛନ୍ତି। ଦିନକୁ ଏବେ ୧୨୦ରୁ ୧୪୦ ଜଣଙ୍କୁ ଖାଇବାକୁ ଦିଅଯାଉଥିବାବେଳେ ରବିବାର ଦିନ ଅଧିକ ରହୁଛି।
କୃଷ୍ଣ କୁହନ୍ତି, ଅନ୍ୟକୁ ସାହାଯ୍ୟ କରିବାର ପ୍ରେରଣା ମୋ ମା’ଠାରୁ ପାଇଥିଲି। ସେ ଗାଁରେ ରହିଲେ ବି ବହୁ ଅସହାୟ ଲୋକଙ୍କୁ ଖାଇବାକୁ ଦିଏ, ସେମାନଙ୍କୁ ସାହାଯ୍ୟ କରେ। ହସ୍ପିଟାଲରେ କାମ କରୁଥିବାରୁ ପ୍ରତ୍ୟେକ ଦିନ ଅନେକ କରୋନା ଆକ୍ରାନ୍ତ ଏଠାକୁ ଆସୁଥିବା ଦେଖୁଥିଲି। ରୋଗୀଙ୍କୁ ହସ୍ପିଟାଲ ପକ୍ଷରୁ ଖାଇବାକୁ ମିଳି ଯାଉଥିଲେ ହେଁ ସେମାନଙ୍କ ଆଟେଣ୍ଡାଣ୍ଟ୍ମାନେ ଖାଇବା ପାଇଁ ବହୁ ହଇରାଣ ହେଉଥିବା ଦେଖିଛି। ତେଣୁ ସେମାନଙ୍କ ପାଇଁ ମାଗଣାରେ ରନ୍ଧା ଖାଦ୍ୟ ଦେବାକୁ ମନସ୍ଥ କରିଥିଲି। ଅନ୍ନଦାନ କରି ପୁଣ୍ୟ ଅର୍ଜନ କରିବା ସହ ନିଜକୁ ଏ ଲଢେଇରେ ସାମିଲ କରିପାରିଥିବାରୁ ଭାରି ଖୁସି ଲାଗୁଛି।
