ସେଞ୍ଚୁରିଆନ୍,୨୬।୧୨: ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ଶନିବାରଠାରୁ ଆରମ୍ଭ ହୋଇଛି ପ୍ରଥମ ଟେଷ୍ଟ ମ୍ୟାଚ୍। ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିବା ଟିମ୍ ଇଣ୍ଡିଆକୁ ୧୧୭ ରନ୍ର ଶତକୀୟ ଆରମ୍ଭ ଦେଇଥିଲେ ଦୁଇ ଓପନର ଲୋକେଶ ରାହୁଲ ଓ ମୟଙ୍କ ଅଗ୍ରଓ୍ବାଲ। ଅର୍ଦ୍ଧଶତକ ପୂରଣ କରି ମୟଙ୍କ (୬୦ ରନ୍, ୯ ଚୌକା) ୪୧ତମ ଓଭରରେ ଲୁଙ୍ଗି ଏନ୍ଗିଡିଙ୍କ ଦ୍ୱାରା ଏଲବିଡବ୍ଲ୍ୟୁ ଆଉଟ୍ ହୋଇଥିଲେ। ପରବର୍ତ୍ତୀ ବଲରେ ପଡ଼ିଥିଲା ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରାଙ୍କ ଉଇକେଟ। ସେ ପ୍ରଥମ ବଲରେ କ୍ୟାଚ୍ ଆଉଟ୍ ହୋଇଥିଲେ। ଲଗାତାର ଦୁଇ ଉଇକେଟ ପଡ଼ିବା ପରେ ରାହୁଲଙ୍କ ସହ କ୍ରିଜରେ ଯୋଗ ଦେଇଥିଲେ ଅଧିନାୟକ ବିରାଟ କୋହଲି। ଚା’ ପାନ ବିରତି ସୁଦ୍ଧା ଭାରତ ୫୭ ଓଭରରେ ୨ ଉଇକେଟ ହରାଇ ୧୫୭ ରନ୍ କରିଛି। ରାହୁଲ ୬୮ (୧୧ ଚୌକା) ଓ କୋହଲି ୧୯ (୨ ଚୌକା)ରନ୍ରେ ବ୍ୟାଟିଂ କରୁଛନ୍ତି।
