ଦୁବାଇ,୧୮।୮ : ଭାରତ ଓ ଇଂଲଣ୍ଡ ମଧ୍ୟରେ ଲଡର୍ସଠାରେ ଖେଳାଯାଇଥିବା ଟେଷ୍ଟ ମ୍ୟାଚ୍ ଶେଷ ହେବା ପରେ ଖେଳାଳିଙ୍କ ମାନ୍ୟତାରେ ପରିବର୍ତ୍ତନ ଦେଖିବାକୁ ମିଳିଛି। ମ୍ୟାଚ୍ରେ ଶତକ ହାସଲ କରିଥିବା ଲୋକେଶ ରାହୁଲ ୧୯ଟି ସ୍ଥାନ ଉପରକୁ ଉଠିଛନ୍ତି। ଅଧିନାୟକ ବିରାଟ କୋହଲି ଏବେ ମଧ୍ୟ ଟେଷ୍ଟ ବ୍ୟାଟ୍ସମ୍ୟାନଙ୍କ ତାଲିକାର ଟପ୍-୫ରେ ମଧ୍ୟରେ ସ୍ଥାନ ପାଇବାରେ ଏକମାତ୍ର ଭାରତୀୟ। ଏହା ଦର୍ଶାଇଛି ବୁଧବାର ପ୍ରକାଶ ପାଇଥିବା ଆଇସିସିର ନୂଆ ର଼୍ୟାଙ୍କିଙ୍ଗ୍।
ଗତ ସପ୍ତାହରେ ବ୍ୟାଟ୍ସମ୍ୟାନଙ୍କ ର଼୍ୟାଙ୍କିଙ୍ଗ୍ରେ ୫୬ ତମ ସ୍ଥାନରେ ଥିବା ରାହୁଲ ଖେଳିଥିଲେ ୧୨୯ ରନ୍ର ଦର୍ଶନୀୟ ପାଳି। ଏଥି ଯୋଗୁ ସେ ଏବେ ୩୭ତମ ସ୍ଥାନ ହାସଲ କରିଛନ୍ତି। ଲଗାତାର ବିଫଳ ହେବାରୁ ଗତ ସପ୍ତାହରେ ଗୋଟିଏ ପାହଚ ତଳକୁ ଖସିଥିବା କୋହଲି ଟପ୍-୫ରେ ରହିଛନ୍ତି। ପୂର୍ବ ଭଳି ୬ଷ୍ଠ ଓ ୭ମ ସ୍ଥାନ ବଜାୟ ରଖିଛନ୍ତି ରୋହିତ ଶର୍ମା ଓ ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ।
ବୋଲରଙ୍କ ମଧ୍ୟରେ ଯଶପ୍ରୀତ ବୁମରା ଗୋଟିଏ ସ୍ଥାନ ତଳକୁ ଖସି ୧୦ମ ସ୍ଥାନରେ ପହଞ୍ଚିଛନ୍ତି। ତାଙ୍କ ସାଥି ପେସର ମହମ୍ମଦ ସିରାଜଙ୍କ ମାନ୍ୟତାରେ ଉଲ୍ଲେଖନୀୟ ଉନ୍ନତି ଘଟିଛି। ସେ ୫୬ତମ ସ୍ଥାନରୁ ୩୮କୁ ଲମ୍ଫ ଦେଇଛନ୍ତି।
