ଦୁବାଇ,୧୫।୧୦: ୨୦୧୦, ୨୦୧୧ ଓ ୨୦୧୮ ପରେ ୪ର୍ଥ ଥର ପାଇଁ ଆଇପିଏଲ ଟ୍ରଫି ହାତେଇଛି ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)। ଶୁକ୍ରବାର ଖେଳାଯାଇଥିବା ଫାଇନାଲରେ କୋଲକାତା ନାଇଟ୍ ରାଇଡର୍ସ (କେକେଆର)କୁ ୨୭ ରନ୍ରେ ହରାଇ ଦେଇଛି ଚେନ୍ନାଇ। ଏହା ଅଧିନାୟକ ଭାବେ ଧୋନୀଙ୍କ ପାଇଁ ଥିଲା ୩୦୦ ତମ ଟି୨୦ ମ୍ୟାଚ୍।
ଦୁବାଇ ଗ୍ରାଉଣ୍ଡରେ ଅନ୍ତିମ ୫ ମ୍ୟାଚ୍ରେ ପ୍ରଥମେ ବ୍ୟାଟିଂ କରିଥିବା ଦଳକୁ ପରାଜୟର ସମ୍ମୁଖୀନ ହେବାକୁ ପଡ଼ିଥିଲା। ଏଣୁ ସିଏସ୍କେ ମଧ୍ୟ ଚାହୁଁ ନ ଥିଲା ପ୍ରଥମେ ବ୍ୟାଟିଂ। କିନ୍ତୁ ଟସ୍ ଜିତି କେକେଆର୍ ଅଧିନାୟକ ଇଆନ ମୋର୍ଗାନ ବ୍ୟାଟିଂ ନିଷ୍ପତ୍ତି ନେଇଥିଲେ।
ମ୍ୟାଚ୍ ଜିତିବା ପାଇଁ ସିଏସ୍କେକୁ ଏକ ବଡ଼ ସ୍କୋର ଛିଡ଼ା କରିବା। ସିଏସ୍କେକୁ ଆବଶ୍ୟକ ଥିବା ଭଳି ୬୧ ରନ୍ର ଷ୍ଟାର୍ଟ ଦେଇଥିଲେ ରୁତୁରାଜ ଗାଏକ୍ୱାଡ (୩୨) ଓ ଫାଫ ଡୁ’ପ୍ଲେସିଙ୍କ ଓପନିଂ ଯୋଡ଼ି। ଗାଏକ୍ୱାଡ ଆଉଟ୍ ହେବା ପରେ ଛକା ଭାର ସମ୍ଭାଳିଥିଲେ ରବି ଉଥପ୍ପା। ୩ ଛକା ବଳରେ ଉଥପ୍ପା ୩୧ ରନ୍ କରିଥିଲେ। ତାଙ୍କ ପରେ ମୋଇନ ଅଲି (୩୭ ରନ୍, ୨ ଚୌକା ଓ ୩ ଛକା) ଓ ଡୁ’ପ୍ଲେସି (୮୬ ରନ୍, ୭ ଚୌକା ଓ ୩ ଛକା) ୩ୟ ଉଇକେଟ ପାଇଁ ୬୮ ରନ୍ ଯୋଡ଼ିଥିଲେ। ସିଏସ୍କେ ୨୦ ଓଭରରେ ୩ ଉଇକେଟ ହରାଇ ୧୯୨ ରନ୍ କରିଥିଲା।
ଜବାବରେ ଭେଙ୍କଟେଶ ଆୟର (୫୦ ରନ୍, ୫ ଚୌକା ଓ ୩ ଛକା) ଓ ଶୁବମାନ ଗିଲ (୫୧ରନ୍, ୬ ଚୌକା)ଙ୍କ ଯୋଡ଼ି କେକେଆରକୁ ଦେଇଥିଲା ୯୧ ରନ୍ର ଆରମ୍ଭ। କିନ୍ତୁ ୧୧ତମ ଓଭରରେ ମ୍ୟାଚ୍କୁ ବଦଳି ଦେଇଥିଲେ ଶାର୍ଦ୍ଦୁଳ ଠାକୁର। ସେ ଗୋଟିଏ ଓଭରରେ ଦୁଇ ଉଇକେଟ ନେଇଥିଲେ। ତା’ ପରେ ବିଗିଡ଼ି ଯାଇଥିଲା କେକେଆର ବ୍ୟାଟିଂ ଲାଇନଅପ୍। ଦଳ ୩୪ ରନ୍ ମଧ୍ୟରେ ୮ ଉଇକେଟ ହରାଇ ପରାଜୟକୁ ସ୍ବୀକାର କରି ନେଇଥିଲା। ଶେଷକୁ ଚେନ୍ନାଇ ୨୦ ଓଭରରେ ୯ ଉଇକେଟ ହରାଇ ୧୬୫ ରନ୍ କରିବାକୁ ସକ୍ଷମ ହୋଇଥିଲା। କେକେଆର ପାଇଁ ଶାର୍ଦ୍ଦୁଳ ୩ ଉଇକେଟ ନେଇଥିବା ବେଳେ ଜୋସ ହାଜେଲ ଉଡ ଓ ରବୀନ୍ଦ୍ର ଜାଡେଜା ୨ ଲେଖାଏ ଉଇକେଟ ନେଇଥିଲେ।
