ଅନୁଗୋଳ ଅଫିସ,୨୩ା୧୨: ୫ ବର୍ଷ ତଳୁ ଭଲ ପାଉଥିବା କିନ୍ନରଙ୍କୁ ମଙ୍ଗଳବାର ଜୀବନସାଥୀ କରିଛନ୍ତି ଜଣେ ଯୁବକ। ଏହି ଚର୍ଚ୍ଚିତ ବିବାହ ହୋଇଛି ଅନୁଗୋଳ ସହରସ୍ଥିତ ମା’ ବୁଢ଼ୀ ଠାକୁରାଣୀ ମନ୍ଦିରରେ। ଉଭୟଙ୍କ ପରିବାରରୁ କେହି ଉପସ୍ଥିତ ନ ଥିଲେ ମଧ୍ୟ ଜିଲା କିନ୍ନର ମହାସଂଘ ସଭାପତି, ଉପସଭାପତି ତଥା ଅନ୍ୟ ସଦସ୍ୟମାନଙ୍କ ଗହଣରେ ଏହି ନିଆରା ବିବାହ କାର୍ଯ୍ୟ ସମ୍ପନ୍ନ ହୋଇଛି।
ଅନୁଗୋଳ କିନ୍ନର ମହାସଂଘ ପକ୍ଷରୁ କୁହାଯାଇଛି ଯେ, ବଅଁରପାଳ ବ୍ଲକର କିନ୍ନର ଚିନୁ ସାମଲଙ୍କୁ ଦୀର୍ଘ ୫ ବର୍ଷ ହେଲା କଣିହଁା ଅଞ୍ଚଳର ବବ୍ଲୁ ପ୍ରେମ କରୁଥିଲେ। ଏପରି କି ଦୁହେଁ ଏକାଠି ରହି ଆସୁଥିଲେ। ବିବାହ ପାଇଁ ଉଭୟ ସ୍ଥିର କରିଥିବାରୁ ଏଥିରେ ସେମାନଙ୍କ ଘର ଲୋକେ ସହମତ ହୋଇଥିଲେ। ତେଣୁ ବୁଢ଼ୀ ଠାକୁରାଣୀ ମନ୍ଦିରରେ ବିବାହ ପାଇଁ ଦିନ ଧାର୍ଯ୍ୟ ହୋଇଥିଲା। କିନ୍ନର ସଂଘର କର୍ମକର୍ତ୍ତାମାନେ ସେଠାରେ ପହଞ୍ଚିଥିଲେ ମଧ୍ୟ ଚିନୁ ଓ ବବ୍ଲୁଙ୍କ ପରିବାରରୁ କେହି ଜଣେ ହେଲେ ଆସି ନ ଥିଲେ। ତେବେ ମା’ଙ୍କୁ ସାକ୍ଷୀ ରଖି ଉଭୟ ବିବାହ ବନ୍ଧନରେ ବାନ୍ଧି ହୋଇଥିବା ସଂଘ ପକ୍ଷରୁ ସୂଚନା ଦିଆଯାଇଛି।
