ଇସଲାମାବାଦ,୨୮।୨ : ଗତ ୧୫ ଦିନ ମଧ୍ୟରେ ଆର୍ଥିକ ସଙ୍କଟ, ମୁଦ୍ରାସ୍ଫୀତି ଏବଂ ରାଜନୈତିକ ଅସ୍ଥିରତାର ସମ୍ମୁଖୀନ ହେଉଥିବା ପାକିସ୍ତାନରେ ତିନିଜଣ ବଡ ଆତଙ୍କବାଦୀଙ୍କୁ ହତ୍ୟା କରାଯାଇଛି। ଏହି ତିନିଜଣଙ୍କୁ ଭାରତ ସରକାରଙ୍କ ପକ୍ଷରୁ ମୋଷ୍ଟ ଓ୍ବାଣ୍ଟେଡ ଘୋଷଣା କରାଯାଇଥିଲା। ଭାରତରେ ଆତଙ୍କବାଦୀ କାର୍ଯ୍ୟକଳାପ ବୃଦ୍ଧିରେ ଏହି ତିନିଜଣଙ୍କର ଭୂମିକା ଗୁରୁତ୍ୱପୂର୍ଣ୍ଣ ଥିଲା। ବିଶେଷକରି ଜମ୍ମୁ-କଶ୍ମୀରରେ ସେମାନଙ୍କ ନିର୍ଦ୍ଦେଶରେ ଅନେକ ଆତଙ୍କବାଦୀ ଘଟଣା ଘଟିଥିଲା।
ପାକିସ୍ତାନ ପୋଲିସ ଏହାକୁ ଟାର୍ଗେଟ କିଲିଂ ମାମଲା ବୋଲି କହିଛି। ବିଶେଷ କଥା ହେଉଛି ଏହି ତିନିଜଣଙ୍କୁ ନିକଟରେ ଭାରତ ସରକାର ଆତଙ୍କବାଦୀ ଘୋଷିତ କରିଥିଲେ।
ଏଭଳି ପରିସ୍ଥିତିରେ ପ୍ରଶ୍ନ ଉଠୁଛି ଯେ ଏହି ଆତଙ୍କବାଦୀଙ୍କୁ କିଏ ହତ୍ୟା କରୁଛି? ଏହା ପଛରେ କିଏ ଅଛି? ଖାଲି ସେତିକି ନୁହେଁ, ପାକିସ୍ତାନରେ କଣ ଚାଲିଛି?
କଶ୍ମୀରର ଆତଙ୍କବାଦୀ ସଂଗଠନ ଅଲ-ବଦରର କମାଣ୍ଡର ସୟଦ ଖାଲିଦ ରଜାଙ୍କୁ ସୋମବାର ପାକିସ୍ତାନର କରାଚିରେ ହତ୍ୟା କରାଯାଇଛି। ଅଜ୍ଞାତ ଆକ୍ରମଣକାରୀମାନେ ତାଙ୍କ ଉପରକୁ ଗୁଳି ଚଳାଇଥିଲେ। ଖାଲିଦ ମୃତ୍ୟୁ ପୂର୍ବରୁ କାଶ୍ମୀରରେ ସକ୍ରିୟ ଆତଙ୍କବାଦୀଙ୍କ ସହ ଜଡିତ ଥିଲେ। ଗଣମାଧ୍ୟମ ରିପୋର୍ଟ ଅନୁଯାୟୀ, ଆକ୍ରମଣକାରୀମାନେ ଖାଲିଦ ରଜାଙ୍କୁ ତାଙ୍କ ଘର ବାହାରେ ଗୁଳି କରି ହତ୍ୟା କରିଥିଲେ। ଖାଲିଦ ରାଜା କଶ୍ମୀରରେ ଆତଙ୍କବାଦୀ କମାଣ୍ଡର ରହିଥିଲେ। ଏହା ପରେ ସେ କରାଚି ଯାଇଥିଲେ। ଏଠାରେ ସେ ବେସରକାରୀ ବିଦ୍ୟାଳୟ ଫେଡେରେଶନ ଉପାଧ୍ୟକ୍ଷ ହୋଇଥିଲେ।
ଏହାପୂର୍ବରୁ ଗତ ସପ୍ତାହରେ ଗୁରୁବାର ହିଜବୁଲ ମୁଜାହିଦ୍ଦିନର ବରିଷ୍ଠ କମାଣ୍ଡର ବଶିର ଅହମ୍ମଦ ପିରଙ୍କୁ ମଧ୍ୟ ହତ୍ୟା କରାଯାଇଥିଲା। ବଶିର ନମାଜ ପାଠ କରିବା ପାଇଁ ତାଙ୍କ ଘର ନିକଟସ୍ଥ ମସଜିଦକୁ ଯାଇଥିଲେ। ମସଜିଦରୁ ବାହାରିବା ପରେ ସେ ଏକ ଦୋକାନ ପାଖରେ ଠିଆ ହୋଇଥିଲେ। ଏହି ସମୟରେ ଦୁଇଜଣ ଆକ୍ରମଣକାରୀ ବାଇକରେ ଆସି ବଶିରଙ୍କୁ ଗୁଳି କରି ହତ୍ୟା କରିଥିଲେ।
ଫେବୃଆରୀ ୨୨ ରେ, ଆଫଗାନିସ୍ତାନରେ କଶ୍ମୀରରେ ଜନ୍ମିତ ଆତଙ୍କବାଦୀ ଏଜାଜ ଅହମ୍ମଦ ଅହଙ୍ଗାରଙ୍କୁ ହତ୍ୟା କରାଯାଇଥିଲା। ଇଜାଜ ଦୀର୍ଘ ସମୟ ଧରି ଇସଲାମିକ ଷ୍ଟେଟ ପାଇଁ ସକ୍ରିୟ ଥିଲେ ଏବଂ ଭାରତ ଉପରେ ଆତ୍ମଘାତୀ ଆକ୍ରମଣ କରୁଥିଲେ। ପାକିସ୍ତାନ ପୋଲିସ ବଶିର ଅହମ୍ମଦ ଛଦ୍ମନାମ ଇମତିଆଜ ଏବଂ ସୟଦ ଖାଲିଦ ରଜାଙ୍କ ହତ୍ୟାକୁ ଟାର୍ଗେଟ କିଲିଂ ବୋଲି କହିଛି।
