ନାଣ୍ଡେଡ,୬।୨ : ଜାତୀୟ ରାଜନୀତି ଉପରେ ଆଖି ପକାଇଥିବା ତେଲଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ (କେସିଆର୍) ତାଙ୍କ ଦଳର ନାଁ ବଦଳାଇ ଭାରତ ରାଷ୍ଟ୍ର ସମିତି (ବିଆର୍ଏସ୍) ରଖିଥିଲେ। ଏହି ଦଳ ପ୍ରଥମ ଥର ପାଇଁ ତେଲଙ୍ଗାନା ବାହାରେ ରାଲି କରିଛି। ମହାରାଷ୍ଟ୍ରର ନାଣ୍ଡେଡ୍ରେ ଆୟୋଜିତ ରାଲିରେ କେସିଆର୍ ଯୋଗଦେଇ ‘ଆସନ୍ତା ଥର କୃଷକ ସରକାର’ ବୋଲି ସ୍ଲୋଗାନ ଦେଇଛନ୍ତି। ଏହି ସୀମାନ୍ତ ରାଜ୍ୟର କେତେକ ଗ୍ରାମ ତେଲଙ୍ଗାନାରେ ମିଶିବା ପାଇଁ ଅନୁମତି ଦେବାକୁ ପୂର୍ବରୁ ଦାବି କରିଥିଲେ। ମହାରାଷ୍ଟ୍ରର ସମସ୍ତ ଆସନରେ ବିଆର୍ଏସ୍ ନିର୍ବାଚନ ଲଢ଼ିବ ବୋଲି କେସିଆର୍ କହିଛନ୍ତି। ସ୍ବାଧୀନତାର ୭୫ ବର୍ଷ ପରେ ଚାଷୀମାନେ ଦେଶର ଶାସନ ଡୋରି ହାତକୁ ନେବାର ସମୟ ଆସିଛି ବୋଲି ତେଲଙ୍ଗାନା ମୁଖ୍ୟମନ୍ତ୍ରୀ କହିଛନ୍ତି। ସେ କହିଥିଲେ, ଆମେ ଏକାଠି ହୋଇପାରିଲେ କିଛି ଅସମ୍ଭବ ନୁହେଁ। ଜନସଂଖ୍ୟାର ୪୨ ପ୍ରତିଶତରୁ ଊର୍ଦ୍ଧ୍ୱ ହେଉଛନ୍ତି କୃଷକ। ସେମାନଙ୍କ ସହ କୃଷି ଶ୍ରମିକଙ୍କୁ ମିଶାଇଲେ ଏହି ସଂଖ୍ୟା ୫୦ ପ୍ରତିଶତରୁ ଅଧିକ ହେବ, ଯାହା ସରକାର ଗଢ଼ିବା ପାଇଁ ଯଥେଷ୍ଟ ବୋଲି କେସିଆର୍ କହିଥିଲେ।
