ବ୍ରହ୍ମପୁର ଅଫିସି,୧୩।୭: ଗଞ୍ଜାମ ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ବ୍ରହ୍ମପୁର ସହର ଜିଲାର ଏକ ମାତ୍ର ପ୍ରମୁଖ ସହର ତଥା ବ୍ୟବସାୟିକ ପେଣ୍ଠସ୍ଥଳୀ। ଏହି ସହରର ସ୍ଥିତି ଏବେ ଦିନକୁ ଦିନ ବିଗିଡ଼ିବାରେ ଲାଗିଛି । ଲକ୍ଡାଉନ୍ କୋହଳ ହେବା ପରେ ସକାଳ ହେଲା ମାତ୍ରେ ସହର ଚାରିପଟେ ଲୋକଙ୍କ ଅସମ୍ଭାଳ ଭିଡ଼ ଦେଖିବାକୁ ମିଳୁଛି। ଏ ନେଇ ଦକ୍ଷିଣାଞ୍ଚଳ ରେଞ୍ଜ ଡିଆଇଜି ସତ୍ୟବ୍ରତ ଭୋଇ ଓ ବ୍ରହ୍ମପୁର ଏସ୍ପି ପିନାକ ମିଶ୍ରଙ୍କ ନିର୍ଦ୍ଦେଶ କ୍ରମେ ସୋମବାରଠାରୁ ଫାଷ୍ଟଗେଟକୁ ଅନର୍ଦ୍ଦିଷ୍ଟ କାଳ ପାଇଁ ସିଲ କରିଦିଆଯାଇଛି। କେବଳ ଜରୁରୀକାଳୀନ କାମରେ ସହର ଭିତରକୁ ପ୍ରବେଶ କରିବାକୁ ଅନୁମତି ମିଳିବ ବୋଲି ବଡ଼ବଜାର ଥାନାଧିକାରୀ ପ୍ରଶାନ୍ତ କୁମାର ଭୂପତି ସୂଚନା ଦେଇଛନ୍ତି। ଶଟଡାଉନ କଟକଣା ରହିଥିଲେ ମଧ୍ୟ ଲୋକମାନେ ବିଭିନ୍ନ ଗ୍ରାମଞ୍ଚଳରୁ ଫାଷ୍ଟଗେଟ ଦେଇ ସହର ମଧ୍ୟକୁ ପ୍ରବେଶ କରୁଛନ୍ତି । ଏହାକୁ ରୋକିବା ଓ ଅମାନିଆଙ୍କ ସାବଡ଼ କରିବା ପାଇଁ ଏବେ ସେଠାରେ ଜଣେ ପୋଲିସ ଇନ୍ସପେକ୍ଟରଙ୍କ ନେତୃତ୍ୱରେ ୨ ସେକ୍ସନ ପୋଲିସ ମୁତୟନ କରାଯାଇଛି ବୋଲି ସେ କହିଛନ୍ତି । ଅଧିକାଂଶ ଲୋକ ଅଯଥାରେ ମେଡିଶିନ କ୍ରୟ କରିବା ଓ ମେଡିକାଲ କାମ କହି ସହର ଭିତରକୁ ପ୍ରବେଶ କରୁଛନ୍ତି । ଏହା ଉପରେ ଏବେ କଡା କଟକଣା ଲାଗୁ ହେବ ବୋଲି ସେ କହିଛନ୍ତି। ସେହିପରି ସହର ଅନ୍ୟ ପ୍ରବେଶ ପଥ ଗୁଡିକରେ ଏଭଳି କଟକଣା ମଧ୍ୟ ଲାଗୁହେବ ବୋଲି ଜଣାପଡ଼ିଛି ।
