ନୂଆଦିଲ୍ଲୀ,୩।୩ : ମୋଟର ସାଇକେଲ ଦୁର୍ଘଟଣାରେ ଗୁରୁତର ହୋଇଥିବା ଜଣେ ବ୍ୟକ୍ତିଙ୍କୁ ମୃତ ଘୋଷଣା କରିବା ପରେ ବ୍ୟବଚ୍ଛେଦ ପାଇଁ ପଠାଯାଇଥିଲା। ମାତ୍ର ବ୍ୟବଚ୍ଛେଦ ପ୍ରକ୍ରିୟା ଆରମ୍ଭ କରିବା ପୂର୍ବରୁ ସେ ବଞ୍ଚିଥିବା ଦେଖିବାକୁ ପାଇଥିଲେ ପାଥାଲୋଜିଷ୍ଟ। କର୍ନାଟକରେ ଏଭଳି ଆଶ୍ଚର୍ଯ୍ୟଜନକ ଘଟଣା ଘଟିଛି।
କର୍ନାଟକର ମାହାଲିନଗପୁର ସହରର ୨୭ ବର୍ଷୀୟ ଯୁବକଙ୍କୁ ରବିବାର ଗୁରୁତର ଅବସ୍ଥାରେ ବେସରକାରୀ ମେଡିକାଲ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିବା ପରେ ଭେଣ୍ଟିଲେଟରରୁ ହଟାଇ ଦେଇଥିଲେ। ଏହାପରେ ବ୍ୟବଚ୍ଛେଦ ପାଇଁ ସୋମବାର ସରକାରୀ ମେଡିକାଲ ନେଇଥିଲେ ତାଙ୍କ ପରିବାର ଲୋକେ। ଅଟପ୍ସି ଟେବୁଲ ଉପରେ ଶୋଇଥିବାବେଳେ ତାଙ୍କ ଶରୀରରେ ଜୀବନ ଥିବା ଦେଖିବାକୁ ପାଇଥିଲେ ପାଥୋଲୋଜିଷ୍ଟ। ସରକାରୀ ସ୍ବାସ୍ଥ୍ୟ ଅଧିକାରୀ ଏହି ଘଟଣା ସ୍ପଷ୍ଟ କରିଛନ୍ତି। ଉକ୍ତ ଯୁବକଙ୍କୁ ଅନ୍ୟ ଏକ ମେଡିକାଲରେ ଭର୍ତ୍ତି କରାଯାଇଛି। ତେବେ ପରିବାର ପକ୍ଷରୁ ମେଡିକାଲ ବିରୋଧରେ ଅଭିଯୋଗ କରାଯାଇ ନାହିଁ।
