ବନ୍ତ,୨।୯(ସ୍ବ.ପ୍ର.)-ଭଦ୍ରକ ଜିଲା ବନ୍ତ ବ୍ଲକ ଦେଇ ୩ ନଦୀ ସାଳନ୍ଦୀ, କପାଳି ଓ ସରୁସାଗର ପ୍ରବାହିତ। ସାଳନ୍ଦୀ ବ୍ୟତୀତ ସରୁସାଗର ଓ କପାଳିକୁ ସରକାରୀ ଖାତାରେ ଅଦ୍ୟାବଧି ନଦୀର ମାନ୍ୟତା ମିଳିନାହିଁ। ପ୍ରତ୍ୟେକ ବର୍ଷ ବର୍ଷାଋତୁରେ ଏହି ୨ ନଦୀର ବନ୍ୟାପାଣିରେ ନଦୀକୂଳିଆ ଲୋକେ ନାହିଁ ନ ଥିବା ସମସ୍ୟାର ସମ୍ମୁଖୀନ ହୋଇଥାନ୍ତି। କପାଳି ବନ୍ୟା ଜଳରେ ନଦୀକୂଳିଆ ଚାଷଜମି ବହୁ ମାତ୍ରାରେ କ୍ଷତିଗ୍ରସ୍ତ ହେଉଛି। ଏହା ନଦୀକୂଳିଆ ଚାଷୀଙ୍କ ଦୁଃଖ ପାଲଟିଛି।
କପାଳି କେନ୍ଦୁଝର ଜିଲା ହାଟଡିହୀ ଅଞ୍ଚଳରୁ ଏକ ଛୋଟ ନାଳ ରୂପେ ବାହାରି ବକ୍ର ଗତିରେ ବନ୍ତ ବ୍ଲକର ବସନ୍ତିଆ, ରାମଚନ୍ଦ୍ରପୁୁର, ବନ୍ତ, ଟିଲୋ, ଛୟାଳସିଂ, ଗଣିଜାଙ୍ଗ, ରାମକୃଷ୍ଣପୁର, ରାମପୁର ପଞ୍ଚାୟତ ଦେଇ ପ୍ରବାହିତ ହୋଇ ଧାମନଗର ବ୍ଲକର ଗେଙ୍ଗୁଟି ନଦୀରେ ବିଲୀନ ହୋଇଛି। ବକ୍ର ଗତି କାରଣରୁ ସିଧାସଳଖ ଜଳ ନିଷ୍କାସନ ହୋଇ ନ ପାରି ନଦୀର ଉଭୟ ପାର୍ଶ୍ୱକୁ ବାହାରି ଚାଷଜମିରେ ମାଡ଼ିଯାଇ ବହୁ କ୍ଷତି ଘଟାଇଥାଏ। ପ୍ରତ୍ୟେକ ବର୍ଷାଋତୁରେ ଏହି ନଦୀ ବହୁବାର କୂଳ ଲଙ୍ଘିଥାଏ। ସରକାରୀ ଭାବେ ନଦୀ ମାନ୍ୟତା ପାଇ ନ ଥିବାରୁ କ୍ଷତିଗ୍ରସ୍ତ ଚାଷୀମାନେ ସହାୟତାରୁ ବଞ୍ଚିତ ହେଉଛନ୍ତି। ବିଗତ ବର୍ଷଗୁଡ଼ିକରେ ଲଘୁଚାପ ସମୟରେ ବନ୍ୟାପାଣି ମାଡ଼ିଯାଇ ନଦୀକୂଳିଆ ଜମିର ଫସଲ ନଷ୍ଟ ହୋଇଥିଲେ ସୁଦ୍ଧା ଚାଷୀମାନେ ସହାୟତା ପାଇନାହାନ୍ତି। ସେହିପରି ନଦୀ ସଂସ୍କାର ଯୋଜନା ଏଠାରେ ବିଫଳ ହୋଇଛି। ଫଳରେ ନଦୀ ଗର୍ଭ କଳମ ବୁଦାରେ ଭର୍ତ୍ତି ହେବା ସହ ଅନେକ ସ୍ଥାନରେ ପୋତି ହୋଇଗଲାଣି। ସମସ୍ୟାର ସମାଧାନ ପାଇଁ ଏହି ୨ ନଦୀକୁ ସରକାରୀ ସ୍ତରରେ ମାନ୍ୟତା ପାଇଁ ଚାଷୀ ମହଲରେ ବାରମ୍ବାର ଦାବି ହେଉଥିଲେ ମଧ୍ୟ ବିଭାଗ କିମ୍ବା ପ୍ରଶାସନ ଏଥିପ୍ରତି ଦୃଷ୍ଟି ଦେଉ ନ ଥିବା ଅଭିଯୋଗ ହେଉଛି। ଗତ ଫାଇଲିନ ବାତ୍ୟା ସମୟରେ ସ୍ଥାନୀୟ ବିଧାୟକ କପାଳିକୁ ସରକାରୀ ଭାବେ ନଦୀର ମାନ୍ୟତା ନେଇ ପ୍ରତିଶ୍ରୁତି ଦେଇଥିଲେ। ଅଦ୍ୟାବଧି ଏହା ପ୍ରତିଶ୍ରୁତିରେ ହିଁ ରହିଯାଇଛି। ବ୍ଲକର ଚାଷୀମାନଙ୍କ ସ୍ବାର୍ଥକୁ ଦୃଷ୍ଟିରେ ରଖି ପ୍ରଶାସନ ଓ ସ୍ଥାନୀୟ ରାଜନେତାମାନେ ଏ ଦିଗରେ ପଦକ୍ଷେପ ନେବାକୁ ଦାବି ହୋଇଛି। ଏ ସମ୍ପର୍କରେ ଅତିରିକ୍ତ ତହସିଲଦାର ବନିତାରାଣୀ କିସ୍କୁଙ୍କୁ ପଚାରିବାରୁ କପାଳି ନଦୀକୁ ସରକାରୀ ମାନ୍ୟତା ପାଇଁ ପ୍ରକ୍ରିୟା ଜାରି ରହିଛି ବୋଲି କହିଛନ୍ତି।
