କେନ୍ଦୁଝର/ଆନନ୍ଦପୁର,୨୦ା୪(ସ୍ବ.ପ୍ର./ଡି.ଏନ୍.ଏ.): ରାଜ୍ୟ ମୁଖ୍ୟ ଶାସନ ସଚିବ ପ୍ରଦୀପ ଜେନା ବୁଧବାର କେନ୍ଦୁଝର ଗସ୍ତରେ ଆସି ବିଭିନ୍ନ ପ୍ରକଳ୍ପ ବୁଲି ଦେଖିବା ସହ ଅଗ୍ରଗତିର ସମୀକ୍ଷା କରିଛନ୍ତି। ଯୋଡ଼ା ବ୍ଲକ୍ କାନପୁର ଜଳସେଚନ ପ୍ରକଳ୍ପ ଗସ୍ତ କରି ଏହି ପ୍ରକଳ୍ପ ଡିସେମ୍ବର ସୁଦ୍ଧା ସରିବ ବୋଲି କହିଥିଲେ। ଏଥିସହ ଜିଲାରେ ଗମନାଗମନ, ଯାତାୟାତ ବ୍ୟବସ୍ଥା ଆଦି ଉପରେ ସମୀକ୍ଷା କରିଥିଲେ। ଧରଣୀଧର ବିଶ୍ୱବିଦ୍ୟାଳୟ, ମେଡିିକାଲ କଲେଜ, ଓଡ଼ିଶା ମାଇନିଂ ସ୍କୁଲ କ୍ୟାମ୍ପସ ପରିଦର୍ଶନ କରି ସେଠାରେ ଭିତ୍ତିଭୂମି ବିକାଶ, ଶିକ୍ଷା ବ୍ୟବସ୍ଥା ଆଦି ଦେଖିବା ସହ ଛାତ୍ରୀଛାତ୍ରଙ୍କ ସହ ଆଲୋଚନା କରି ବିଭିନ୍ନ ସୁବିଧା ଅସୁବିଧା ବୁଝିଥିଲେ। ମୁକୁନା ଗ୍ରାମକୁ ଯାଇ ମହିଳା ଚାଷୀମାନଙ୍କ ସହ ଆଲୋଚନା କରିଥିଲେ। ସେମାନଙ୍କର ଆୟ କିପରି ଦ୍ୱିଗୁଣିତ ହୋଇଛି ସେ ବିଷୟରେ ଜାଣି ଖୁସିବ୍ୟକ୍ତ କରିଥିଲେ। ପୁରୁଣାବଜାରସ୍ଥିତ ବହୁ ପୁରାତନ ଶ୍ରୀ ଗୋପାଳ ଜୀଉ ପାଠାଗାରର ନୂତନ ଗୃହ ଉଦ୍ଘାଟନ କରିଥିଲେ। ପରେ ଜିଲାପାଳଙ୍କ ମିନି କନଫରେନ୍ସ ହଲ୍ରେ ବିଭିନ୍ନ ପ୍ରକଳ୍ପର ସମୀକ୍ଷା କରିଥିଲେ। ବୈଠକରେ ଜିଲାପାଳ ଆଶିଷ ଠାକରେ, ଆଇଏଏସ୍ (ପ୍ରୋବେସନ) ଧିମନ ଚକମାଙ୍କ ସମେତ ବିଭିନ୍ନ ବିଭାଗର ପଦାଧିକାରୀମାନେ ଉପସ୍ଥିତ ଥିଲେ। କେନ୍ଦୁଝର ଜିଲାର ବୃହତ ଜଳସେଚନ ପ୍ରକଳ୍ପ କାନପୁର ଜଳସେଚନ ପ୍ରକଳ୍ପ ଚଳିତ ବର୍ଷ ଶେଷ ସୁଦ୍ଧା ଶେଷ ହେବ ବୋଲି କହିଥିଲେ। ଆନନ୍ଦପୁର ବ୍ୟାରେଜରୁ ପାଣି ବିଦ୍ୟାଧରପୁର ବ୍ୟାରେଜକୁ ଚଳିତ ଖରିଫ ଋତୁରେ ଛଡ଼ାଯିବ। ଏହାଦ୍ୱାରା ଖଣିଫ ଋତୁରେ ଚାଷୀମାନେ ଉପକୃତ ହୋଇପାରିବେ। ସେହିପରି ଆନନ୍ଦପୁର ବ୍ୟାରେଜ ଓ କାନପୁର ଡ୍ୟାମ ଉପର ପାର୍ଶ୍ୱରେ ଥିବା ଚାଷୀମାନଙ୍କୁ ମେଗା ଉଠାଜଳସେଚନ ପ୍ରକଳ୍ପ ମାଧ୍ୟମରେ ଜଳ ଯୋଗାଇ ଦିଆଯିବ ବୋଲି ମତ ରଖିଥିଲେ। ବିଭିନ୍ନ ଗ୍ରାମ, ପଡ଼ା ତଥା ବିଶ୍ୱବିଦ୍ୟାଳୟ କ୍ୟାମ୍ପସକୁ କିପରି ସବୁଦିନିଆ ଗମନାଗମନ ଓ ଯାତାୟାତ ବ୍ୟବସ୍ଥା ହୋଇପାରିବ, ପାନୀୟ ଜଳ ଯୋଗାଣ ବ୍ୟବସ୍ଥା ଆଦି ଉପରେ ଆଲୋଚନା କରିଥିଲେ।
