ଭଞ୍ଜନଗର,୧୦।୮(ବାବୁଲା ପ୍ରଧାନ)ଗଞ୍ଜାମ ଜିଲା ଭଞ୍ଜନଗର ନିକଟସ୍ଥ ଜାତୀୟ ରାଜପଥରେ ମଙ୍ଗଳବାର ରାତି ପ୍ରାୟ ୧ଟା ବେଳେ ଏକ ଗାଡ଼ି ଧକ୍କାରେ ଗୋଟିଏ ମାଈ କଲରାପତରିଆ ବାଘର ମୃତ୍ୟୁ ହୋଇଛି। ବାଘଟିର ବୟସ ପ୍ରାୟ ୨ବର୍ଷରୁ ଊର୍ଦ୍ଧ୍ୱ ହେବ ବୋଲି ଅନୁମାନ କରାଯାଉଛି। ବୁଧବାର ଅପରାହ୍ନ ସାଢ଼େ ୪ଟାରେ ବାଘଟିକୁ ବ୍ୟବଚ୍ଛେଦ କରାଯାଇ ଲିଭର, ଫୁସ୍ଫୁସ୍, ହୃତ୍ପିଣ୍ଡ, ଯକୃତ ଆଦି ଅଧିକ ପରୀକ୍ଷା ପାଇଁ ଭୁବନେଶ୍ୱର ପଠାଯାଇଛି। ସ୍ଥାନୀୟ ଲାଲସିଂ ନର୍ସରି ପରିସରରେ ସନ୍ଧ୍ୟାରେ ବାଘଟିକୁ ପୋଡ଼ି ଦିଆଯାଇଛି। ପ୍ରକାଶ ଯେ, ସୋମବାର ରାତି ପ୍ରାୟ ୧ଟା ସମୟରେ ଗୋଟିଏ କଲରାପତରିଆ
ବାଘ ଭଞ୍ଜନଗର ସହରଠାରୁ ପ୍ରାୟ ୧୦ କିମି ଦୂର ଭଞ୍ଜନଗର-ଫୁଲବାଣୀ ଜାତୀୟ ରାଜପଥର ବୁଦୁଲି ପାଇପ୍ ଫ୍ୟାକ୍ଟ୍ରି ନିକଟରେ ରାସ୍ତା ପାର ହେଉଥିଲା । ଏହି ସମୟରେ କୌଣସି ଗାଡ଼ି ବାଘକୁ ଧକ୍କା ଦେଇ ଚାଲିଯାଇଥିଲା। ବାଘଟି ରାଜପଥ ଉପରେ ପଡ଼ି ଗର୍ଜନ କରିବା ସହ ଛଟପଟ ହେଉଥିଲା । ଉକ୍ତ ରାସ୍ତାରେ ଯାଉଥିବା ଲୋକେ ଦେଖି ଡିଏଫଓ ସୁଦର୍ଶନ ବେହେରାଙ୍କୁ ଖବର ଦେଇଥିଲେ। ଏହାପରେ ଡିଏଫଓ ବେହେରା, ମୁଜାଗଡ଼ ରେଞ୍ଜର ବିମ୍ବାଧର ସାହୁ, କେନ୍ଦ୍ରୀୟ ବନାଞ୍ଚଳ ଅଧିକାରୀ କୁମର ବେହେରା, ବନପାଳ ବଂଶୀଧର ବିଷୋୟୀ ପ୍ରମୁଖ ଘଟଣାସ୍ଥଳରେ ପହଞ୍ଚତ୍ ଆହତ ବାଘକୁ ଉଦ୍ଧାର କରି ଚିକିସତ୍ା ପାଇଁ ଭଞ୍ଜନଗର ପ୍ରାଣୀ ଚିକିସତ୍ାଳକୁ ଆଣିଥିଲେ। ବାଘର ଚିକିସତ୍ା ଚାଲିଥିବା ବେଳେ ରାତି ପ୍ରାୟ ସାଢ଼େ ୩ଟାରେ ବାଘଟିର ମୃତ୍ୟୁ ହୋଇଥିଲା। ବୁଧବାର ଅପରାହ୍ନରେ ମାଜିଷ୍ଟ୍ରେଟ ଦାୟିତ୍ୱରେ ଥିବା ଭଞ୍ଜନଗର ତହସିଲଦାର ଅଚ୍ୟୁତାନନ୍ଦ ଜାନି, ବ୍ରହ୍ମପୁର ଡିଏଫଓ ଆର.ଆର.ପଟ୍ଟନାୟକ, ଡିଏଫଓ ସୁଦର୍ଶନ ବେହେରା, ଦକ୍ଷିଣ ଘୁମୁସର ବନଖଣ୍ଡ ଅଧିକାରୀ ବିନୋଦ ଆଚାର୍ଯ୍ୟ, ଏସିଏଫ୍ ବିକ୍ରମ ଦେବ ପଟ୍ଟନାୟକ, ପ୍ରଭାକର ନାୟକ, ପୂର୍ବତନ ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଶୁଳପାଣି ଶତପଥୀ, ଅନୁପମ ବାନାର୍ଜି ପ୍ରମୁଖଙ୍କ ଉପସ୍ଥିତିରେ ବାଘର ବ୍ୟବଚ୍ଛେଦ କରାଯାଇଥିଲା । ଭଞ୍ଜନଗର ପ୍ରାଣୀ ଚିକିସତ୍ାଧିକାରୀ ଡା. ନିଶିକାନ୍ତ ବଳ, ତାରସିଂ ଭିଏଏସ୍ ଡା.ବିଜୟିନୀ ପଣ୍ଡା, ବେଲଗୁଣ୍ଠା ଭିଏଏସ୍ ଡା. ରାକେଶ ପତି ପ୍ରମୁଖ ବାଘଟିର ବ୍ୟବଚ୍ଛେଦ କରିଥିଲେ ।
