ସୁରଟ, ୧୪ା୪: ‘ସବୁ ମୋଦି ଚୋର’ ମନ୍ତବ୍ୟ ପାଇଁ ମାନହାନି ମାମଲାରେ ମାଜିଷ୍ଟ୍ରେଟ କୋର୍ଟ ଦ୍ୱାରା ଦୋଷୀସାବ୍ୟସ୍ତ ହୋଇଥିବା କଂଗ୍ରେସ ନେତା ତଥା ପୂର୍ବତନ ଏମ୍ପି ରାହୁଲ ଗାନ୍ଧୀ ଏହା ଉପରେ ସ୍ଥଗିତାଦେଶ ଲାଗି ସୁରଟ ସେସନ୍ସ କୋର୍ଟରେ ଆବେଦନ କରିଥିଲେ। ଗୁରୁବାର ଉକ୍ତ ଅଦାଲତ ଉକ୍ତ ପିଟିଶନ୍ର ଶୁଣାଣି ଶେଷ କରି ରାୟ ସଂରକ୍ଷିତ ରଖିଛନ୍ତି। ଆସନ୍ତା ୨୦ ତାରିଖରେ ସେସନ୍ସ ଜଜ୍ ରବିନ ମୋଗେରା ରାୟ ଶୁଣାଇବେ। ରାୟ ସଂରକ୍ଷିତ ରଖିବା ପୂର୍ବରୁ ବିଚାରପତି ଉଭୟ ରାହୁଲ ଏବଂ ଅଭିଯୋଗକାରୀ ଭାଜପା ନେତା ପୂର୍ଣ୍ଣେଶ ମୋଦିଙ୍କ ବୟାନ ଶୁଣିଥିଲେ।
ସୂଚନାଯୋଗ୍ୟ, ୨୦୧୯ ନିର୍ବାଚନ ପୂର୍ବରୁ କର୍ନାଟକର କୋଲାରରେ ରାହୁଲ ଭାଷଣ ଦେଲାବେଳେ ସବୁ ଚୋରଙ୍କ ସାଙ୍ଗ୍ୟା ମୋଦି କାହିଁକି ବୋଲି କହିଥିଲେ। ଏନେଇ ପୂର୍ଣ୍ଣେଶ ଦାଏର କରିଥିବା ମାନହାନି ମାମଲାରେ ସୁରଟ ମାଜିଷ୍ଟ୍ରେଟ କୋର୍ଟ ଗତ ମାସ ୨୩ରେ ରାହୁଲଙ୍କୁ ଦୋଷୀସାବ୍ୟସ୍ତ କରିବା ସହ ୨ ବର୍ଷ ଜେଲ ଦଣ୍ଡାଦେଶ ଶୁଣାଇଥିଲେ। ଏହାର ଦିନକ ପରେ ରାହୁଲଙ୍କ ଲୋକ ସଭା ସଦସ୍ୟତା ରଦ୍ଦ ହୋଇଯାଇଥିଲା। ଉକ୍ତ ରାୟକୁ ଚ୍ୟାଲେଞ୍ଜ କରି ରାହୁଲ ସୁରଟ ସେସନ୍ସ କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ରାହୁଲଙ୍କ ପକ୍ଷରୁ ବରିଷ୍ଠ ଆଇନଜୀବୀ ଆର୍.ଏସ୍. ଚିମା ଉପସ୍ଥିତ ରହି ଅଦାଲତଙ୍କୁ କହିଥିଲେ, ମାନହାନି ଆଇନ ଅନୁଯାୟୀ ଯାହାଙ୍କର ସମ୍ମାନ ହାନି ହୋଇଥିବ, କେବଳ ସେହି ବ୍ୟକ୍ତି ହିଁ ମାମଲା ଦାଏର କରିପାରିବେ। ପୂର୍ଣ୍ଣେଶ ମୋଦି ମାନହାନି ମାମଲା ଦାଏର କରିବା କେତେଦୂର ଯୁକ୍ତିଯୁକ୍ତ, ଅଦାଲତ ତାହା ଅନୁଧ୍ୟାନ କରିବାକୁ ଚିମା ଅନୁରୋଧ କରିଥିଲେ। ମୋଦି ସାଙ୍ଗ୍ୟାଧାରୀ ସବୁ ବ୍ୟକ୍ତିଙ୍କୁ ଅପମାନିତ କରିବା ରାହୁଲଙ୍କ ଭାଷଣର ଉଦ୍ଦେଶ୍ୟ ଥିଲା କି ନାହିଁ ତାହା ମଧ୍ୟ ଅନୁଶୀଳନ କରାଯିବା ଆବଶ୍ୟକ ବୋଲି ଚିମା କହିଥିଲେ।
