କୃଷି ବା ଏଗ୍ରିକଲ୍ଚର ଫିଲ୍ଡରେ କ୍ୟାରିୟର ଗଢ଼ିବାକୁ ଅଧିକାଂଶ ଯୁବପିଢ଼ି ଆଗ୍ରହୀ ହେଉଥିବାର ଦେଖିବାକୁ ମିଳୁଛି। କାରଣ ଏହି କ୍ଷେତ୍ରରେ ଟେକ୍ନୋଲୋଜିର ବହୁଳ ବ୍ୟବହାର ଦ୍ୱାରା ଭଲ ରୋଜଗାର ମଧ୍ୟ କରାଯାଇପାରୁଛି। ତେଣୁ ଏ ଦିଗରେ ଆଗ୍ରହୀ ଯୁବପିଢ଼ିଙ୍କ ପାଇଁ କ’ଣ ରହିଛି ଅପ୍ସନ ଜାଣିରଖନ୍ତୁ ସେ ସମ୍ପର୍କରେ…
କୋର୍ସ: କେତେକ ସ୍ଥାନରେ ସ୍କୁଲ୍ ସମୟରୁ ହିଁ ଏଗ୍ରିକଲ୍ଚରରେ ପାଠପଢ଼ା ଆରମ୍ଭ ହୋଇଯାଇଥାଏ। ଏଥିପାଇଁ ବାୟୋଲୋଜି, କେମେଷ୍ଟ୍ରି ଏବଂ ଏଗ୍ରିକଲ୍ଚର ସବ୍ଜେକ୍ଟ ରଖିବାକୁ ହୋଇଥାଏ। ଯୁକ୍ତ ଦୁଇ ପଢ଼ିବା ପରେ ଜଏଣ୍ଟ ଏଣ୍ଟ୍ରାନ୍ସ ପରୀକ୍ଷା ଦେବାକୁ ହୋଇଥାଏ। ପରେ ଏଥିପାଇଁ ଡିପ୍ଲୋମା, ଡିଗ୍ରୀ, ପିଜି, ପିଏଚ୍ଡି ଭଳି କୋର୍ସ କରିବାର ସୁବିଧା ରହିଛି।
କ୍ୟାରିୟର ଅପ୍ସନ୍: ଏହି ଫିଲ୍ଡରେ ଉଭୟ ସରକାରୀ ଏବଂ ବେସରକାରୀ ସ୍ତରରେ ବିଭିନ୍ନ ଚାକିରି ମିଳିବାର ସୁଯୋଗ ରହିଛି।
ସରକାରୀ ସ୍ତରରେ ଚାକିରୀ:
କୃଷି ପର୍ଯ୍ୟବେକ୍ଷକ: ଏଥିପାଇଁ ଅନ୍ତତଃ ଯୁକ୍ତ ଦୁଇରେ ଏଗ୍ରିକଲ୍ଚର ସବ୍ଜେକ୍ଟ ରଖି ଉତ୍ତୀର୍ଣ୍ଣ ହେବାକୁ ପଡ଼ିଥାଏ। ପ୍ରତି ଦୁଇ-ତିନି ଗ୍ରାମପଞ୍ଚାୟତ ପାଇଁ ଗୋଟିଏ ଲେଖାଏ ଏହି ପୋଷ୍ଟ ରହିଥାଏ। ଏଥିପାଇଁ ମଝିରେ ମଝିରେ ସରକାରୀସ୍ତରରୁ ଚୟନ ପରୀକ୍ଷା କରାଯାଇ ନିଯୁକ୍ତି ଦିଆଯାଇଥାଏ।
ପ୍ରାଣୀଧନ ସହାୟକ ଅଧିକାରୀ: ଯୁକ୍ତ ଦୁଇ ପଢ଼ିବା ପରେ ପ୍ରାଣୀଧନ ସହାୟକ ବା ଲାଇଭ୍ଷ୍ଟକ୍ ଆସିଷ୍ଟାଣ୍ଟ ଡିପ୍ଲୋମା କରିପାରିବେ। ଏହାପରେ ବିଭିନ୍ନ ପଞ୍ଚାୟତରେ ପ୍ରାଣୀଧନ ସହାୟକ ଅଧିକାରୀ ଭାବେ ସରକାରୀ ଚାକିରି କରିପାରିବେ।
ହର୍ଟିକଲ୍ଚର ସୁପରଭାଇଜର- ଏଗ୍ରିକଲ୍ଚର ଶିକ୍ଷା ଗ୍ରହଣ କରିଥିଲେ ଏ ସମ୍ପର୍କରେ ମଧ୍ୟ ପ୍ରଶିକ୍ଷଣ ନେଇପାରିବେ। ଆପଣ ଚାହିଁଲେ ନିଜର ନର୍ସରୀ ମଧ୍ୟ ଖୋଲିପାରିବେ। ଯଦି ଏଗ୍ରିକଲ୍ଚରରେ ଡିଗ୍ରୀ କରିଛନ୍ତି, ତେବେ କୃଷିଋଣ ସୁବିଧା ସହ ଅନ୍ୟ କେତେକ ସରକାରୀ ସୁବିଧା ରହିଛି। ଏହା ବ୍ୟତୀତ ଏଗ୍ରିକଲ୍ଚର ଅଫିସର, ଏଗ୍ରିକଲ୍ଚର ଇଞ୍ଜିନିୟର, ଫୁଡ୍ ମାଇକ୍ରୋବାୟୋଲୋଜିଷ୍ଟ, ସାଇଣ୍ଟିଷ୍ଟ, ଏଗ୍ରିକଲ୍ଚର କଲେଜ କିମ୍ବା ୟୁନିଭର୍ସିଟିରେ ଅଧ୍ୟାପନା କ୍ଷେତ୍ରରେ ବି ଜବ୍ କରିପାରିବେ। ଏଗ୍ରିକଲ୍ଚରରେ ରିସର୍ଚ୍ଚ କ୍ଷେତ୍ରରେ ମଧ୍ୟ ଆପଣ ଅନେକ ପ୍ରକାରର ଜବ୍ କରିପାରିବେ।
ବେସରକାରୀ ସ୍ତରରେ ଚାକିରୀ: ଏଗ୍ରିକଲ୍ଚର ଡିଗ୍ରୀ ଥିଲେ ପ୍ରାଇଭେଟ୍ ସେକ୍ଟରରେ ମାର୍କେଟିଂ ଅଫିସର, ସେଲ୍ସ ଡେଭେଲପମେଣ୍ଟ ଅଫିସର, ବ୍ୟାଙ୍କ୍ରେ ଏଗ୍ରିକଲ୍ଚର ଡେଭେଲପ୍ମେଣ୍ଟ ଅଫିସର ଭାବେ କାର୍ଯ୍ୟ କରିପାରିବେ। ଏହାବ୍ୟତୀତ ଫାର୍ମ ମ୍ୟାନେଜର, ଟେକ୍ନିକାଲ୍ ଏଗ୍ରିକଲ୍ଚର ଆସିଷ୍ଟାଣ୍ଟ ଭାବେ କାର୍ଯ୍ୟ ବି କରିପାରିବେ। ଏହି ପାଠ ପଢ଼ିଥିଲେ ବିଦେଶୀ କମ୍ପାନୀଗୁଡିକରେ ମଧ୍ୟ ଅନେକ ଜବ୍ ସୁବିଧା ରହିଛି। ଆପଣ ଚାହିଁଲେ ନିଜର ଷ୍ଟାର୍ଟଅପ୍ ଆରମ୍ଭ କରିପାରିବେ।
